# תהילים ק״א

> מקור: https://rabenu.app/books/tehillim/perek-101/

לדוד מזמור חסד־ומשפט אשירה לך יהוה אזמרה׃

אשכילה ׀ בדרך תמים מתי תבוא אלי אתהלך בתם־לבבי בקרב ביתי׃

לא־אשית ׀ לנגד עיני דבר־בליעל עשה־סטים שנאתי לא ידבק בי׃

לבב עקש יסור ממני רע לא אדע׃

מלושני [מלשני] בסתר ׀ רעהו אותו אצמית גבה־עינים ורחב לבב אתו לא אוכל׃

עיני ׀ בנאמני־ארץ לשבת עמדי הלך בדרך תמים הוא ישרתני׃

לא־ישב ׀ בקרב ביתי עשה רמיה דבר שקרים לא־יכון לנגד עיני׃

לבקרים אצמית כל־רשעי־ארץ להכרית מעיר־יהוה כל־פעלי און׃