# תהילים ק״ח

> מקור: https://rabenu.app/books/tehillim/perek-108/

שיר מזמור לדוד׃

נכון לבי אלהים אשירה ואזמרה אף־כבודי׃

עורה הנבל וכנור אעירה שחר׃

אודך בעמים ׀ יהוה ואזמרך בל־אמים׃

כי־גדול מעל־שמים חסדך ועד־שחקים אמתך׃

רומה על־שמים אלהים ועל כל־הארץ כבודך׃

למען יחלצון ידידיך הושיעה ימינך וענני׃

אלהים ׀ דבר בקדשו אעלזה אחלקה שכם ועמק סכות אמדד׃

לי גלעד ׀ לי מנשה ואפרים מעוז ראשי יהודה מחקקי׃

מואב ׀ סיר רחצי על־אדום אשליך נעלי עלי־פלשת אתרועע׃

מי יבלני עיר מבצר מי נחני עד־אדום׃

הלא־אלהים זנחתנו ולא־תצא אלהים בצבאתינו׃

הבה־לנו עזרת מצר ושוא תשועת אדם׃

באלהים נעשה־חיל והוא יבוס צרינו׃