# תהילים ל״ב

> מקור: https://rabenu.app/books/tehillim/perek-32/

לדוד משכיל אשרי נשוי־פשע כסוי חטאה׃

אשרי אדם לא יחשב יהוה לו עון ואין ברוחו רמיה׃

כי־החרשתי בלו עצמי בשאגתי כל־היום׃

כי ׀ יומם ולילה תכבד עלי ידך נהפך לשדי בחרבני קיץ סלה׃

חטאתי אודיעך ועוני לא־כסיתי אמרתי אודה עלי פשעי ליהוה ואתה נשאת עון חטאתי סלה׃

על־זאת יתפלל כל־חסיד ׀ אליך לעת מצא רק לשטף מים רבים אליו לא יגיעו׃

אתה ׀ סתר לי מצר תצרני רני פלט תסובבני סלה׃

אשכילך ׀ ואורך בדרך־זו תלך איעצה עליך עיני׃

אל־תהיו ׀ כסוס כפרד אין הבין במתג־ורסן עדיו לבלום בל קרב אליך׃

רבים מכאובים לרשע והבוטח ביהוה חסד יסובבנו׃

שמחו ביהוה וגילו צדיקים והרנינו כל־ישרי־לב׃