# י

> מקור: https://rabenu.app/books/thlym/897/10/

כפי בחירתו וכפי כסופיו וכפי אמתת התחזקותו ואמונתו בה' יתברך, כמו כן ה' יתברך מתגלגל עמו ברחמיו: (לקו"ה על פס' י)

א למה יהוה תעמד ברחוק, תעלים לעתות בצרה:

ב בגאות רשע ידלק עני, יתפשו | במזמות זו חשבו:

ג כי־הלל רשע על־תאות נפשו, ובצע ברך נאץ | יהוה:

ד רשע כגבה אפו בל־ידרש, אין אלהים כל־מזמותיו:

ה יחילו דרכו | בכל־עת, מרום משפטיך מנגדו, כל־צורריו יפיח בהם:

ו אמר בלבו בל־אמוט, לדר ודר אשר לא־ברע:

ז אלה | פיהו מלא ומרמות ותך, תחת לשונו עמל ואון:

ח ישב | במארב חצרים, במסתרים יהרג נקי, עיניו לחלכה יצפנו:

ט יארב במסתר | כאריה בסכה, יארב לחטוף עני, יחטף עני במשכו ברשתו:

י ידכה ודכה ישח, ונפל בעצומיו חל כאים חלכאים:

יא אמר בלבו שכח אל, הסתיר פניו, בל־ראה לנצח:

יב קומה יהוה, אל נשא ידך, אל־תשכח ענוים עניים:

יג על־מה | נאץ רשע | אלהים, אמר בלבו לא תדרש:

יד ראתה, כי־אתה | עמל וכעס | תביט, לתת בידך, עליך יעזב חלכה, יתום, אתה | היית עוזר:

טו שבר זרוע רשע, ורע תדרוש־רשעו בל־תמצא:

טז יהוה מלך עולם ועד, אבדו גוים מארצו:

יז תאות ענוים שמעת יהוה, תכין לבם, תקשיב אזנך:

יח לשפט יתום ודך, בל־יוסיף עוד לערץ אנוש מן־הארץ: