# כד

> מקור: https://rabenu.app/books/thlym/897/24/

צריך להתפלל ברחמים ותחנונים כעני ורש השואל על הפתחים ויותר מזה, ולא ידחק את השעה: (לקו"ה על פס' ד)

א לדוד מזמור, ליהוה הארץ ומלואה, תבל וישבי בה:

ב כי־הוא על־ימים יסדה, ועל־נהרות יכוננה:

ג מי־יעלה בהר־יהוה, ומי־יקום במקום קדשו:

ד נקי כפים ובר־לבב, אשר | לא־נשא לשוא נפשי נפשו, ולא נשבע למרמה:

ה ישא ברכה מאת יהוה, וצדקה מאלהי ישעו:

ו זה דור דרשיו, מבקשי פניך יעקב סלה:

ז שאו שערים | ראשיכם והנשאו פתחי עולם, ויבוא מלך הכבוד:

ח מי זה מלך הכבוד, יהוה עזוז וגבור, יהוה גבור מלחמה:

ט שאו שערים | ראשיכם, ושאו פתחי עולם, ויבא מלך הכבוד:

י מי הוא זה מלך הכבוד, יהוה צבאות, הוא מלך הכבוד סלה: