ס

בְּכָל עֵת וָעֵת בִּפְרָט בְּעֵת צָרָה חַס וְשָׁלוֹם, יִתֵּן עֵינֵי לִבּוֹ וְדַעְתּוֹ לְהִסְתַּכֵּל וּלְהִתְבּוֹנֵן הֵיטֵב עַל חַסְדֵי ה' וְטוֹבוֹתָיו שֶׁעָשָׂה עִמּוֹ עַד הֵנָּה: (לקו"ה על פס' יא)

א ֖לַֽמְנַצֵּחַ, עַל־שׁוּשַׁ֣ן עֵד֑וּת, מִכְתָּ֖ם לְדָוִ֣ד לְלַמֵּֽד:

ב בְּהַצּוֹת֨וֹ | אֶ֥ת אֲרַ֣ם נַֽהֲרַֽיִם֘ וְאֶת־אֲרַ֪ם צ֫וֹבָ֥ה, וַיָּ֤שׇׁב יוֹאָ֗ב וַיַּ֣ךְ אֶת־אֱד֣וֹם בְּגֵיא־מֶ֑לַח שְׁנֵ֖ים עָשָׂ֣ר אָֽלֶף:

ג ֖אֱלֹהִים זְנַחְתָּ֣נוּ פְרַצְתָּ֑נוּ, ֜אָנַ֗פְתָּ, תְּשׁ֣וֹבֵֽב לָֽנוּ:

ד הִרְעַ֣שְׁתָּה אֶ֣רֶץ פְּצַמְתָּ֑הּ, רְפָ֖ה שְׁבָרֶ֣יהָ כִי־מָֽטָה:

ה הִרְאִ֣יתָ עַמְּךָ֣ קָשָׁ֑ה, ֜הִשְׁקִיתָ֗נוּ יַ֣יִן תַּרְעֵלָֽה:

ו נָ֘תַ֤תָּה לִּירֵאֶ֣יךָ ֖נֵּס לְהִתְנוֹסֵ֑ס, ֜מִפְּנֵ֖י קֹ֣שֶׁט סֶֽלָה:

ז ֖לְמַעַן יֵחָלְצ֣וּן יְדִידֶ֑יךָ, הוֹשִׁ֖יעָה יְמִינְךָ֣ וַעֲנֵֽנִי ועננו:

ח אֱלֹהִ֤ים | דִּבֶּ֥ר בְּקׇדְשׁ֗וֹ, אֶ֫עְלֹ֥זָה, אֲחַלְּקָ֥ה שְׁכֶ֑ם, וְעֵ֖מֶק סֻכּ֣וֹת אֲמַדֵּֽד:

ט לִ֤י גִלְעָ֨ד | וְלִ֬י מְנַשֶּׁ֗ה, ֖וְאֶפְרַיִם מָע֣וֹז רֹאשִׁ֑י, ֜יְהוּדָ֗ה מְחֹקְקִֽי:

י מוֹאָ֤ב | סִ֬יר רַחְצִ֗י, עַל־֖אֱדוֹם אַשְׁלִ֣יךְ נַֽעֲלִ֑י, ֜עָלַ֗י פְּלֶ֣שֶׁת הִתְרוֹעָֽעִי:

יא מִ֣י ֖יוֹבִלֵנִי עִ֣יר מָצ֑וֹר, מִ֖י נָחַ֣נִי עַד־אֱדֽוֹם:

יב הֲלֹֽא־אַתָּ֣ה אֱלֹהִ֣ים זְנַחְתָּ֑נוּ, וְֽלֹא־תֵצֵ֥א ֜אֱלֹהִ֗ים בְּצִבְאוֹתֵֽינוּ:

יג הָֽבָה־לָּ֣נוּ עֶזְרָ֣ת מִצָּ֑ר, ֜וְשָׁ֗וְא תְּשׁוּעַ֥ת אָדָֽם:

יד בֵּאלֹהִ֥ים נַֽעֲשֶׂה־חָ֑יִל, ֜וְה֗וּא יָב֥וּס צָרֵֽינוּ: