קח

יַזְכִּיר אֶת עַצְמוֹ רִבּוּי הַטּוֹבוֹת וְהַחֲסָדִים שֶׁעָשָׂה ה' יִתְבָּרַךְ עִמּוֹ מֵעוֹדוֹ עַד הַיּוֹם הַזֶּה, וְעַל יְדֵי זֶה יִתְחַזֵּק לְבָבוֹ לִבְטֹחַ בַּה' שֶׁיִּשְׁמַע תְּפִלָּתוֹ גַּם עַתָּה: (לקו"ה על פס' יא)

א שִׁ֖יר מִזְמ֣וֹר לְדָוִֽד:

ב נָכ֣וֹן לִבִּ֣י אֱלֹהִ֑ים, אָשִׁ֥ירָה ֜וַאֲזַמְּרָ֗ה, אַף־כְּבוֹדִֽי:

ג ֖עוּרָֽה הַנֵּ֥בֶל וְכִנּ֗וֹר, אָעִ֥ירָה שָּֽׁחַר:

ד אֽוֹדְךָ֖ בָעַמִּ֥ים | יְהֹוָ֑ה, ֜וַאֲזַמֶּרְךָ֗ בַּלְאֻמִּֽים:

ה כִּי־גָד֣וֹל מֵעַל־שָׁמַ֣יִם חַסְדֶּ֑ךָ, וְֽעַד־שְׁחָקִ֥ים אֲמִתֶּֽךָ:

ו ר֣וּמָה עַל־שָׁמַ֣יִם אֱלֹהִ֑ים, וְעַ֖ל כׇּל־הָאָ֣רֶץ כְּבוֹדֶֽךָ:

ז ֖לְמַעַן יֵחָלְצ֣וּן יְדִידֶ֑יךָ, הוֹשִׁ֖יעָה יְמִינְךָ֣ וַעֲנֵֽנִי:

ח אֱלֹהִ֤ים | דִּבֶּ֥ר בְּקׇדְשׁ֗וֹ, אֶֽ֫עְלֹ֥זָה, אֲחַלְּקָ֥ה שְׁכֶ֑ם, וְעֵ֖מֶק סֻכּ֣וֹת אֲמַדֵּֽד:

ט לִ֤י גִלְעָ֨ד | לִִ֤י מְנַשֶּׁ֗ה, ֖וְאֶפְרַיִם מָע֣וֹז רֹאשִׁ֑י, ֜יְהוּדָ֗ה מְחֹקְקִֽי:

י מוֹאָ֤ב | סִ֬יר רַחְצִ֗י, עַל־֖אֱדוֹם אַשְׁלִ֣יךְ נַֽעֲלִ֑י, עֲלֵי־֜פְלֶ֗שֶׁת אֶתְרוֹעָֽע:

יא מִ֣י ֖יוֹבִילֵנִי עִ֣יר מִבְצָ֑ר, מִ֖י נָחַ֣נִי עַד־אֱדֽוֹם:

יב הֲלֹֽא־אֱלֹהִ֥ים זְנַחְתָּ֑נוּ, וְֽלֹא־תֵצֵ֥א ֜אֱלֹהִ֗ים בְּצִבְאֹתֵֽינוּ:

יג הָבָה־לָּ֣נוּ עֶזְרָ֣ת מִצָּ֑ר, ֜וְשָׁ֗וְא תְּשׁוּעַ֥ת אָדָֽם:

יד בֵּאלֹהִ֥ים נַעֲשֶׂה־חָ֑יִל, ֜וְה֗וּא יָב֥וּס צָרֵֽינוּ: