קח

יזכיר את עצמו רבוי הטובות והחסדים שעשה ה' יתברך עמו מעודו עד היום הזה, ועל ידי זה יתחזק לבבו לבטח בה' שישמע תפלתו גם עתה: (לקו"ה על פס' יא)

א שיר מזמור לדוד:

ב נכון לבי אלהים, אשירה ואזמרה, אף־כבודי:

ג עורה הנבל וכנור, אעירה שחר:

ד אודך בעמים | יהוה, ואזמרך בלאמים:

ה כי־גדול מעל־שמים חסדך, ועד־שחקים אמתך:

ו רומה על־שמים אלהים, ועל כל־הארץ כבודך:

ז למען יחלצון ידידיך, הושיעה ימינך וענני:

ח אלהים | דבר בקדשו, אעלזה, אחלקה שכם, ועמק סכות אמדד:

ט לי גלעד | לי מנשה, ואפרים מעוז ראשי, יהודה מחקקי:

י מואב | סיר רחצי, על־אדום אשליך נעלי, עלי־פלשת אתרועע:

יא מי יובילני עיר מבצר, מי נחני עד־אדום:

יב הלא־אלהים זנחתנו, ולא־תצא אלהים בצבאתינו:

יג הבה־לנו עזרת מצר, ושוא תשועת אדם:

יד באלהים נעשה־חיל, והוא יבוס צרינו: