קיח

להתעורר כל אחד ממקומו אשר הוא שם לצעק ולזעק ולשאג לה' יתברך מעמק הלב שזה העקר, ובלא זה אי אפשר להתחיל ולתקן שום דבר: (לקו"ה על פס' ה)

א הודו ליהוה כי־טוב, כי לעולם חסדו:

ב יאמר־נא ישראל, כי לעולם חסדו:

ג יאמרו־נא בית־אהרן, כי לעולם חסדו:

ד יאמרו־נא יראי יהוה, כי לעולם חסדו:

ה מן־המצר קראתי יה, ענני במרחב יה:

ו יהוה לי לא אירא, מה־יעשה לי אדם:

ז יהוה לי בעזרי, ואני אראה בשנאי:

ח טוב לחסות ביהוה, מבטוח באדם:

ט טוב לחסות ביהוה, מבטח בנדיבים:

י כל־גוים סבבוני, בשם יהוה כי אמילם:

יא סבוני גם־סבבוני, בשם יהוה כי אמילם:

יב סבוני כדבורים דעכו כאש קוצים, בשם יהוה כי אמילם:

יג דחה דחיתני לנפל, ויהוה עזרני:

יד עזי וזמרת יה, ויהי־לי לישועה:

טו קול | רנה וישועה באהלי צדיקים, ימין יהוה עשה חיל:

טז ימין יהוה רוממה, ימין יהוה עשה חיל:

יז לא־אמות כי־אחיה, ואספר מעשי יה:

יח יסר יסרני יה, ולמות לא נתנני:

יט פתחו־לי שערי־צדק, אבא־בם אודה יה:

כ זה־השער ליהוה, צדיקים יבאו בו:

כא אודך כי עניתני, ותהי־לי לישועה:

כב אבן מאסו הבונים, היתה לראש פנה:

כג מאת יהוה היתה זאת, היא נפלאת בעינינו:

כד זה־היום עשה יהוה, נגילה ונשמחה בו:

כה אנא יהוה הושיעה נא, אנא יהוה הצליחה נא:

כו ברוך הבא בשם יהוה, ברכנוכם מבית יהוה:

כז אל | יהוה ויאר לנו, אסרו־חג בעבותים, עד־קרנות המזבח:

כח אלי אתה ואודך, אלהי ארוממך:

כט הודו ליהוה כי־טוב, כי לעולם חסדו: