קיג

יִשְׁתַּדֵּל לְהַבִּיט עַל ה' וְנִפְלְאוֹתָיו אֲשֶׁר הִפְלִיא חַסְדּוֹ עִמָּנוּ, וְיַעֲנֶה לַה' דְּבָרִים הַרְבֵּה לְהוֹדוֹת וּלְהַלֵּל אוֹתוֹ יִתְבָּרַךְ עַל חַסְדּוֹ וְנִפְלְאוֹתָיו: (לקו"ה על פס' ז)

א הַֽלְלוּ־יָ֨הּ |, ֖הַלְלוּ עַבְדֵ֣י יְהֹוָ֑ה, ֜הַלְל֗וּ אֶת־שֵׁ֥ם יְהֹוָֽה:

ב יְהִ֤י שֵׁ֣ם יְהֹוָ֣ה מְבֹרָ֑ךְ, ֜מֵעַתָּ֗ה וְעַד־עוֹלָֽם:

ג מִמִּזְרַח־שֶׁ֥מֶשׁ עַד־מְבוֹא֑וֹ, ֜מְהֻלָּ֗ל שֵׁ֣ם יְהֹוָֽה:

ד רָ֖ם עַל־כׇּל־גּוֹיִ֥ם | יְהֹוָ֑ה, עַ֖ל הַשָּׁמַ֣יִם כְּבוֹדֽוֹ:

ה ֖מִי כַּיהֹוָ֣ה אֱלֹהֵ֑ינוּ, הַֽמַּגְבִּיהִ֥י לָשָֽׁבֶת:

ו הַֽמַּשְׁפִּילִ֥י לִרְא֑וֹת, בַּשָּׁמַ֥יִם וּבָאָֽרֶץ:

ז מְקִֽימִ֣י מֵעָפָ֣ר דָּ֑ל, ֜מֵאַשְׁפֹּ֗ת יָרִ֥ים אֶבְיֽוֹן:

ח לְהוֹשִׁיבִ֥י עִם־נְדִיבִ֑ים, ֜עִם נְדִיבֵ֥י עַמּֽוֹ:

ט מֽוֹשִׁיבִ֨י | עֲקֶ֬רֶת הַבַּ֗יִת, אֵֽם־הַבָּנִ֥ים שְׂמֵחָ֗ה, הַֽלְלוּ־יָֽהּ: