כד

צָרִיךְ לְהִתְפַּלֵּל בְּרַחֲמִים וְתַחֲנוּנִים כְּעָנִי וָרָשׁ הַשּׁוֹאֵל עַל הַפְּתָחִים וְיוֹתֵר מִזֶּה, וְלֹא יִדְחֹק אֶת הַשָּׁעָה: (לקו"ה על פס' ד)

א לדָוִ֗ד מִ֫זְמ֥וֹר, ֖לַיהֹוָה הָאָ֣רֶץ וּמְלוֹאָ֑הּ, ֜תֵּבֵ֗ל ויֹ֣שׁבֵי בָֽהּ:

ב כִּי־֖הוּא עַל־יַמִּ֣ים יסָדָ֑הּ, ועַל־֜נהָר֗וֹת יכוֹננֶֽהָ:

ג מִֽי־יַעֲלֶ֥ה בהַר־יְהֹוָ֑ה, וּמִֽי־֜יָק֗וּם בִּמְק֥וֹם קׇדְשֽׁוֹ:

ד נקִ֥י כַפַּ֗יִם וּבַר־לֵ֫בָ֥ב, אֲשֶׁ֤ר | לֹא־נָשָׂ֣א לַשָּׁ֣וְא נַפְשִׁ֑י נפשו, ולֹ֖א נִשְׁבַּ֣ע למִרְמָֽה:

ה יִשָּׂ֣א ֖ברָכָה מֵאֵ֣ת יְהֹוָ֑ה, ֜וּצְדָקָ֗ה מֵאֱלֹהֵ֥י יִשְׁעֽוֹ:

ו ֖זֶה דּ֣וֹר דֹּרשָׁ֑יו, מבַקְשֵׁ֨י פָנֶ֖יךָ יַעֲקֹ֣ב סֶֽלָה:

ז שׂא֤וּ שׁעָרִ֨ים | רָאשֵׁיכֶ֗ם ֖וֽהִנָּ֣שׂאוּ פִּתְחֵ֣י עוֹלָ֑ם, ֜ויָב֗וֹא מֶ֣לֶךְ הַכָּבֽוֹד:

ח מִ֥י זֶה֘ מֶ֪לֶךְ הַכָּ֫ב֥וֹד, ֖יְהֹוָה עִזּ֣וּז וגִבּ֑וֹר, ֜יְהֹוָ֗ה גִּבּ֥וֹר מִלְחָמָֽה:

ט שׂא֤וּ שׁעָרִ֨ים | רָאשֵׁיכֶ֗ם, ֖וּשְׂאוּ פִּתְחֵ֣י עוֹלָ֑ם, ֜ויָבֹ֗א מֶ֣לֶךְ הַכָּבֽוֹד:

י מִ֤י ה֣וּא זֶה֘ מֶ֤לֶךְ הַכָּ֫ב֥וֹד, יְהֹוָ֥ה צבָא֑וֹת, ה֤וּא מֶ֖לֶךְ הַכָּב֣וֹד סֶֽלָה: