כד

צָרִיךְ לְהִתְפַּלֵּל בְּרַחֲמִים וְתַחֲנוּנִים כְּעָנִי וָרָשׁ הַשּׁוֹאֵל עַל הַפְּתָחִים וְיוֹתֵר מִזֶּה, וְלֹא יִדְחֹק אֶת הַשָּׁעָה: (לקו"ה על פס' ד)

א לְדָוִ֗ד מִ֫זְמ֥וֹר, ֖לַיהֹוָה הָאָ֣רֶץ וּמְלוֹאָ֑הּ, ֜תֵּבֵ֗ל וְיֹ֣שְׁבֵי בָֽהּ:

ב כִּי־֖הוּא עַל־יַמִּ֣ים יְסָדָ֑הּ, וְעַל־֜נְהָר֗וֹת יְכוֹנְנֶֽהָ:

ג מִֽי־יַעֲלֶ֥ה בְהַר־יְהֹוָ֑ה, וּמִֽי־֜יָק֗וּם בִּמְק֥וֹם קׇדְשֽׁוֹ:

ד נְקִ֥י כַפַּ֗יִם וּבַר־לֵ֫בָ֥ב, אֲשֶׁ֤ר | לֹא־נָשָׂ֣א לַשָּׁ֣וְא נַפְשִׁ֑י נפשו, וְלֹ֖א נִשְׁבַּ֣ע לְמִרְמָֽה:

ה יִשָּׂ֣א ֖בְרָכָה מֵאֵ֣ת יְהֹוָ֑ה, ֜וּצְדָקָ֗ה מֵאֱלֹהֵ֥י יִשְׁעֽוֹ:

ו ֖זֶה דּ֣וֹר דֹּרְשָׁ֑יו, מְבַקְשֵׁ֨י פָנֶ֖יךָ יַעֲקֹ֣ב סֶֽלָה:

ז שְׂא֤וּ שְׁעָרִ֨ים | רָאשֵׁיכֶ֗ם ֖וְֽהִנָּ֣שְׂאוּ פִּתְחֵ֣י עוֹלָ֑ם, ֜וְיָב֗וֹא מֶ֣לֶךְ הַכָּבֽוֹד:

ח מִ֥י זֶה֘ מֶ֪לֶךְ הַכָּ֫ב֥וֹד, ֖יְהֹוָה עִזּ֣וּז וְגִבּ֑וֹר, ֜יְהֹוָ֗ה גִּבּ֥וֹר מִלְחָמָֽה:

ט שְׂא֤וּ שְׁעָרִ֨ים | רָאשֵׁיכֶ֗ם, ֖וּשְׂאוּ פִּתְחֵ֣י עוֹלָ֑ם, ֜וְיָבֹ֗א מֶ֣לֶךְ הַכָּבֽוֹד:

י מִ֤י ה֣וּא זֶה֘ מֶ֤לֶךְ הַכָּ֫ב֥וֹד, יְהֹוָ֥ה צְבָא֑וֹת, ה֤וּא מֶ֖לֶךְ הַכָּב֣וֹד סֶֽלָה: