נט

ה' יתברך נמצא בכל עת לכל קוראיו אפלו אם נתעו כמו שנתעו, כי רחמיו אינם כלים לעולם: (לקו"ה על פס' יז)

א למנצח, אל־תשחת, לדוד מכתם, בשלח שאול וישמרו את־הבית להמיתו:

ב הצילני מאיבי | אלהי, ממתקוממי תשגבני:

ג הצילני מפעלי און, ומאנשי דמים הושיעני:

ד כי הנה ארבו לנפשי, יגורו עלי עזים, לא־פשעי ולא־חטאתי יהוה:

ה בלי־עון ירצון ויכוננו, עורה לקראתי וראה:

ו ואתה יהוה־אלהים | צבאות, אלהי ישראל, הקיצה לפקד כל־הגוים, אל־תחן כל־בגדי און סלה:

ז ישובו לערב, יהמו ככלב, ויסובבו עיר:

ח הנה | יביעון בפיהם, חרבות בשפתותיהם, כי־מי שמע:

ט ואתה יהוה תשחק־למו, תלעג לכל־גוים:

י עזו אליך אשמרה, כי־אלהים משגבי:

יא אלהי חסדי חסדו יקדמני, אלהים יראני בשררי:

יב אל־תהרגם | פן־ישכחו עמי, הניעמו בחילך והורידמו, מגננו אדני:

יג חטאת־פימו דבר־שפתימו, וילכדו בגאונם, ומאלה ומכחש יספרו:

יד כלה בחמה, כלה ואינמו, וידעו כי־אלהים משל ביעקב, לאפסי הארץ סלה:

טו וישבו לערב, יהמו ככלב, ויסובבו עיר:

טז המה יניעון ינועון לאכל, אם־לא ישבעו וילינו:

יז ואני | אשיר עזך, וארנן לבקר חסדך, כי־היית משגב לי, ומנוס ביום צר־לי:

יח עזי, אליך אזמרה, כי־אלהים משגבי, אלהי חסדי: