ו

מא וִיבֹאֻ֣נִי חֲסָדֶ֣ךָ יְהֹוָ֑ה, ֜תְּשׁוּעָתְךָ֗ כְּאִמְרָתֶֽךָ:

מב וְאֶעֱנֶ֣ה חֹרְפִ֣י דָבָ֑ר, כִּֽי־בָ֜טַ֗חְתִּי בִּדְבָרֶֽךָ:

מג וְֽאַל־תַּצֵּ֬ל מִפִּ֣י דְבַר־אֱמֶ֣ת עַד־מְאֹ֑ד, כִּ֖י לְמִשְׁפָּטֶ֣ךָ יִחָֽלְתִּי:

מד וְאֶשְׁמְרָ֖ה תוֹרָתְךָ֥ תָמִ֗יד לְעוֹלָ֥ם וָעֶֽד:

מה וְאֶתְהַלְּכָ֥ה בָרְחָבָ֑ה, כִּ֖י פִקֻּדֶ֣יךָ דָרָֽשְׁתִּי:

מו וַאֲדַבְּרָ֣ה ֖בְעֵדֹתֶיךָ נֶ֥גֶד מְלָכִ֗ים וְלֹ֣א אֵבֽוֹשׁ:

מז וְאֶשְׁתַּעֲשַׁ֥ע בְּמִצְוֹתֶ֗יךָ אֲשֶׁ֣ר אָהָֽבְתִּי:

מח וְאֶשָּֽׂא־כַפַּ֗י אֶֽל־֖מִצְוֹתֶיךָ אֲשֶׁ֥ר אָהָ֗בְתִּי, וְאָשִׂ֥יחָה בְחֻקֶּֽיךָ: