קלח

עִקַּר הַשִּׁירָה עַל יְדֵי שֶׁיּוֹדְעִין וּמַאֲמִינִים כִּי יְשָׁרִים דַּרְכֵי ה' מִשְׁפָּטָיו וְהַנְהָגוֹתָיו יִתְבָּרַךְ: (לקו"ה על פס' ה)

א לְדָוִ֨ד |, אוֹדְךָ֥ בְכׇל־לִבִּ֑י, נֶ֖גֶד אֱלֹהִ֣ים אֲזַמְּרֶֽךָּ:

ב אֶשְׁתַּחֲוֶ֨ה אֶל־הֵיכַ֪ל קׇדְשְׁךָ֡ וְא֘וֹדֶ֤ה אֶת־שְׁמֶ֗ךָ, עַל־חַסְדְּךָ֥ וְעַל־אֲמִתֶּ֑ךָ, כִּֽי־הִגְדַּ֥לְתָּ עַל־כׇּל־שִׁ֜מְךָ֗ אִמְרָתֶֽךָ:

ג בְּי֣וֹם ֖קָרָֽאתִי וַֽתַּעֲנֵ֑נִי, תַּרְהִבֵ֖נִי בְנַפְשִׁ֣י עֹֽז:

ד יוֹד֣וּךָ ֖יְהֹוָה כׇּל־מַלְכֵי־אָ֑רֶץ, כִּ֥י ֜שָׁמְע֗וּ אִמְרֵי־פִֽיךָ:

ה ֖וְיָשִׁירוּ בְּדַרְכֵ֣י יְהֹוָ֑ה, כִּֽי־֜גָד֗וֹל כְּב֣וֹד יְהֹוָֽה:

ו כִּי־רָ֣ם ֖יְהֹוָה וְשָׁפָ֣ל יִרְאֶ֑ה, ֜וְגָבֹ֗הַּ מִמֶּרְחָ֥ק יְיֵדָֽע:

ז אִם־אֵלֵ֤ךְ | בְּקֶ֥רֶב צָרָ֗ה תְּחַ֫יֵּי֥נִי, עַ֤ל אַ֣ף ֖אֹיְבַי תִּשְׁלַ֣ח יָדֶ֑ךָ, וְת֖וֹשִׁיעֵ֣נִי יְמִינֶֽךָ:

ח יְהֹוָה֘ יִגְמֹ֪ר בַּ֫עֲדִ֥י, ֖יְהֹוָה חַסְדְּךָ֣ לְעוֹלָ֑ם, מַעֲשֵׂ֖י יָדֶ֣ךָ אַל־תֶּֽרֶף: