קכז

כְּשֶׁזּוֹכֵר בַּה' יִתְבָּרַךְ וּמַמְשִׁיךְ אֱלֹקוּתוֹ בְּכָל דָּבָר, עַל יְדֵי זֶה נִשְׁמָר הַדָּבָר מִכָּל רַע: (לקו"ה על פס' א)

א שִׁ֥יר הַֽמַּעֲל֗וֹת לִשְׁלֹ֫מֹ֥ה, אִם־יְהֹוָ֤ה | לֹֽא־יִבְנֶ֬ה בַ֗יִת שָׁ֤וְא עָמְל֣וּ בוֹנָ֣יו בּ֑וֹ, אִם־יְהֹוָ֥ה לֹֽא־יִשְׁמׇר־֜עִ֗יר שָׁ֤וְא | שָׁקַ֬ד שׁוֹמֵֽר:

ב שָׁ֤וְא לָכֶ֨ם מַשְׁכִּ֪ימֵי ק֡וּם, מְאַֽחֲרֵי־שֶׁ֗בֶת, ֖אֹֽכְלֵי לֶ֣חֶם הָֽעֲצָבִ֑ים, כֵּ֤ן יִתֵּ֖ן לִידִיד֣וֹ שֵׁנָֽא:

ג הִנֵּ֤ה נַחֲלַ֣ת יְהֹוָ֣ה בָּנִ֑ים, ֜שָׂכָ֗ר פְּרִ֣י הַבָּֽטֶן:

ד כְּחִצִּ֥ים בְּיַד־גִּבּ֑וֹר, ֜כֵּ֗ן בְּנֵ֣י הַנְּעוּרִֽים:

ה אַשְׁרֵ֤י הַגֶּ֗בֶר אֲשֶׁ֤ר מִלֵּ֥א אֶת־אַשְׁפָּת֗וֹ מֵ֫הֶ֥ם, לֹֽא־יֵבֹ֑שׁוּ כִּֽי־יְדַבְּר֖וּ אֶת־אוֹיְבִ֣ים בַּשָּֽׁעַר: