סֵפֶר רִאשׁוֹן

לְהַתְחִיל תָּמִיד מִבְּחִינַת תְּהִלִּים, לְהוֹדוֹת וּלְהַלֵּל לַה' יִתְבָּרַךְ עַל כָּל הַחֲסָדִים, שֶׁעַל יְדֵי זֶה עִקַּר הַהִתְקָרְבוּת לַה' יִתְבָּרַךְ שֶׁעַל יְדֵי זֶה תָּבוֹא הַגְּאֻלָּה: (לקו"ה על פס' א)

א אַֽשֽׁרֵי־הָאִ֗ישׁ אֲשֶׁ֤ר | לֹ֥א הָלַךְ֘ בַּעֲצַ֪ת רשָׁ֫עִ֥ים, וּבְדֶ֣רֶךְ ֖חַטָּאִים לֹ֥א עָמָ֑ד, וּבְמוֹשַׁ֥ב ֜לֵצִ֗ים לֹ֣א יָשָֽׁב:

ב כִּ֤י אִ֖ם בּתוֹרַ֥ת יְהֹוָ֗ה חֶ֫פְצ֥וֹ, וּבְתוֹרָת֥וֹ ֜יֶהְגֶּ֗ה יוֹמָ֥ם וָלָֽיְלָה:

ג וֽהָיָ֗ה כּעֵץ֘ שָׁת֪וּל עַל־פַּלְגֵ֫י מָ֥יִם, אֲשֶׁ֤ר פִּרְי֨וֹ | יִתֵּ֬ן בּעִתּ֗וֹ, ועָלֵ֥הוּ לֹֽא־יִבּ֑וֹל, וכֹ֖ל אֲשֶׁר־יַעֲשֶׂ֣ה יַצְלִֽיחַ:

ד לֹא־כֵ֥ן הָֽרשָׁעִ֑ים, כִּ֥י אִם־֜כַּמֹּ֗ץ אֲֽשֶׁר־תִּדּפֶ֥נּוּ רֽוּחַ:

ה עַל־כֵּ֤ן | לֹא־יָקֻ֣מוּ ֖רשָׁעִים בַּמִּשְׁפָּ֑ט, ֜וחַטָּאִ֗ים בַּעֲדַ֥ת צַדִּיקִֽים:

ו כִּי־יוֹדֵ֣עַ ֖יְהֹוָה דֶּ֣רֶךְ צַדִּיקִ֑ים, ודֶ֖רֶךְ רשָׁעִ֣ים תֹּאבֵֽד:

אֲפִלּוּ אִם יַעֲבֹר עָלָיו מָה, יִתְחַזֵּק בְּכָל פַּעַם וְיַחֲשֹׁב בְּלִבּוֹ שֶׁעַתָּה נוֹלָד, אָז בְּוַדַּאי סוֹף כָּל סוֹף יִזְכֶּה לְהִתְקָרֵב לַה' יִתְבָּרַךְ וְאָז יִתְתַּקֵּן הַכֹּל: (לקו"ה על פס' ז)

א ֖לָמָּה רָגשׁ֣וּ גוֹיִ֑ם, ֜וּלְאֻמִּ֗ים יֶהְגּוּ־רִֽיק:

ב יִתְיַצּב֨וּ | מַלְכֵי־אֶ֗רֶץ ורוֹזנִ֥ים נוֹסדוּ־יָ֑חַד, עַל־֜יְהֹוָ֗ה ועַל־משִׁיחֽוֹ:

ג ֖נֽנַתּקָה אֶת־מוֹסרוֹתֵ֑ימוֹ, ונַשְׁלִ֖יכָה מִמֶּ֣נּוּ עֲבֹתֵֽימוֹ:

ד יוֹשֵׁ֣ב בַּשָּׁמַ֣יִם יִשְׂחָ֑ק, ֜אֲדֹנָ֗י יִלְעַג־לָֽמוֹ:

ה אָ֤ז ידַבֵּ֣ר אֵלֵ֣ימוֹ באַפּ֑וֹ, וּבַחֲרוֹנ֥וֹ יבַהֲלֵֽמוֹ:

ו ֖וַֽאֲנִֽי נָסַ֣כְתִּי מַלְכִּ֑י, עַל־֜צִיּ֗וֹן הַר־קׇדְשִֽׁי:

ז אֲסַפּרָ֗ה אֶ֫ל חֹ֥ק, יְהֹוָ֗ה אָמַ֘ר אֵלַ֥י בּנִי אַ֑תָּה, ֜אֲנִ֗י הַיּ֥וֹם ילִדְתִּֽיךָ:

ח שׁאַ֤ל מִמֶּ֗נִּי ואֶתּנָ֣ה ֖גוֹיִם נַחֲלָתֶ֑ךָ, ֜וַאֲחֻזָּֽתךָ֗ אַפְסֵי־אָֽרֶץ:

ט ֖תּרֹעֵם בּשֵׁ֣בֶט בַּרְזֶ֑ל, כִּכְלִ֖י יוֹצֵ֣ר תּנַפּצֵֽם:

י ֖ועַתָּה מלָכִ֣ים הַשְׂכִּ֑ילוּ, ֜הִוָּסר֗וּ שֹׁ֣פטֵי אָֽרֶץ:

יא עִבְד֣וּ אֶת־יְהֹוָ֣ה בּיִרְאָ֑ה, ֜וגִ֗ילוּ בִּרְעָדָֽה:

יב נַשּׁקוּ־בַ֡ר, פֶּן־יֶאֱנַ֤ף | ותֹ֬אבדוּ דֶ֗רֶךְ, כִּֽי־יִבְעַ֣ר כִּמְעַ֣ט אַפּ֑וֹ, ֜אַשְׁרֵ֗י כׇּל־ח֥וֹסֵי בֽוֹ:

יִּתְגַּבֵּר בְּרָצוֹן וְהִשְׁתּוֹקְקוּת חָזָק כָּל כָּךְ, עַד שֶׁיִּזְכֶּה בְּתוֹךְ כָּךְ לְהִתְעוֹרֵר מִשְּׁנָתוֹ וּלְחַזֵּק יָדוֹ בַּה' לִבְלִי לְיָאֵשׁ עַצְמוֹ מֵהַתִּקְוָה הַטּוֹבָה: (לקו"ה על פס' ב-ז)

א מִזְמ֥וֹר לדָוִ֑ד, ֜בּבׇרְח֗וֹ מִפּנֵ֤י | אַבְשָׁל֬וֹם בּנֽוֹ:

ב ֖יְהֹוָה מָה־רַבּ֣וּ צָרָ֑י, ֜רַבִּ֗ים קָמִ֥ים עָלָֽי:

ג רַבִּֽים֘ אֹמרִ֪ים לנַ֫פְשִׁ֥י, אֵ֤ין יֽשׁוּעָ֓תָה לּ֬וֹ בֵאלֹהִ֬ים סֶֽלָה:

ד ואַתָּ֣ה ֖יְהֹוָה מָגֵ֣ן בַּעֲדִ֑י, ֜כּבוֹדִ֗י וּמֵרִ֥ים רֹאשִֽׁי:

ה ֖קוֹלִי אֶל־יְהֹוָ֣ה אֶקְרָ֑א, וַיַּעֲנֵ֨נִי מֵהַ֖ר קׇדשׁ֣וֹ סֶֽלָה:

ו אֲנִ֥י שָׁכַ֗בְתִּי וָאִ֫ישָׁ֥נָה, הֱקִיצ֑וֹתִי כִּ֖י יְהֹוָ֣ה יִסְמכֵֽנִי:

ז לֹֽא־֖אִירָא מֵרִבְב֥וֹת עָ֑ם, אֲשֶׁ֥ר ֜סָבִ֗יב שָׁ֣תוּ עָלָֽי:

ח ק֘וּמָ֤ה יְהֹוָ֨ה | הוֹשִׁ֘יעֵ֤נִי אֱלֹהַ֗י, כִּי־הִכִּ֣יתָ אֶת־כׇּל־אֹיבַ֣י לֶ֑חִי, שִׁנֵּ֖י רשָׁעִ֣ים שִׁבַּֽרְתָּ:

ט לַיהֹוָ֥ה הַיְשׁוּעָ֑ה, עַל־עַמּךָ֖ בִרְכָתֶ֣ךָ סֶּֽלָה:

עִקַּר הַשִּיחָה וְהַהִתְבּוֹדְדוּת צָרִיךְ לִהְיוֹת עַד שֶׁיְּבַטֵּל אֶת עַצְמוֹ, שֶׁיְּבַטֵּל כָּל רְצוֹנוֹתָיו לִרְצוֹן ה' יִתְבָּרַךְ: (לקו"ה על פס' ט)

א לַֽמְנַצֵּ֥חַ בִּנְגִינ֗וֹת, מִזְמ֥וֹר לדָוִֽד:

ב בּקׇרְאִ֡י עֲנֵ֤נִי | אֱלֹ֘הֵ֤י צִדְקִ֗י, ֖בַּצָּר הִרְחַ֣בְתָּ לִּ֑י, ֜חׇנֵּ֗נִי וּשְׁמַ֥ע תּפִלָּתִֽי:

ג בּנֵ֥י־אִ֡ישׁ, עַד־מֶ֬ה כבוֹדִ֣י ֖לִכְלִמָּה, תֶּאֱהָב֣וּן רִ֑יק, תּבַקְשׁ֖וּ כָזָ֣ב סֶֽלָה:

ד וּדְע֗וּ כִּי־הִפְלָ֣ה ֖יְהֹוָה חָסִ֣יד ל֑וֹ, יְהֹוָ֥ה ֜יִשְׁמַ֗ע בּקׇרְאִ֥י אֵלָֽיו:

ה רִגְז֗וּ וֽאַל־תֶּ֫חֱטָ֥אוּ, אִמְר֣וּ ֖בִלְבַבְכֶם עַל־מִשְׁכַּבְכֶ֗ם, ודֹ֣מּוּ סֶֽלָה:

ו זִבְח֥וּ זִבְחֵי־צֶ֑דֶק, ֜וּבִטְח֗וּ אֶל־יְהֹוָֽה:

ז רַבִּ֥ים אֹמרִים֘ מִי־יַרְאֵ֪נוּ֫ ט֥וֹב, נֽסָה־֖עָלֵינוּ א֨וֹר פָּנֶ֬יךָ יְהֹוָֽה:

ח נָתַ֣תָּה שִׂמְחָ֣ה בלִבִּ֑י, מֵעֵ֬ת דּגָנָ֖ם ותִירוֹשָׁ֣ם רָֽבּוּ:

ט בּשָׁל֣וֹם יַחְדָּו֘ אֶשְׁכּבָ֪ה ואִ֫ישָׁ֥ן, כִּֽי־אַתָּ֣ה יְהֹוָ֣ה לבָדָ֑ד ֜לָבֶ֗טַח תּוֹשִׁיבֵֽנִי:

הָעִקָּר הוּא הָרָצוֹן וְהַקִּוּוּי וְהַגַּעְגּוּעִים וְכוּ', וְעַל יְדֵי זֶה נִתְחַמֵּם הַלֵּב בִּקְדֻשָּׁה: (לקו"ה על פס' ב)

א לַֽמְנַצֵּ֥חַ אֶל־הַנּחִיל֗וֹת, מִזְמ֥וֹר לדָוִֽד:

ב אֲמָרַ֖י הַאֲזִ֥ינָה | יְהֹוָ֗ה, בִּ֣ינָה הֲגִיגִֽי:

ג הַקְשִׁ֤יבָה | לק֬וֹל שַׁוְעִ֗י מַלְכִּ֥י וֵאלֹהָ֑י, כִּי־֜אֵלֶ֗יךָ אֶתְפַּלָּֽל:

ד יְֽהֹוָ֗ה, ֖בֹּקֶר תִּשְׁמַ֣ע קוֹלִ֑י, בֹּ֥קֶר אֶֽעֱרׇךְ־֜לךָ֗ וַאֲצַפֶּֽה:

ה כִּ֤י | לֹ֤א אֵל־חָפֵ֘ץ רֶ֥שַׁע | אָ֑תָּה, לֹ֖א יגֻרךָ֣ רָֽע:

ו לֹא־יִתְיַצּב֣וּ ֖הוֹללִים לנֶ֣גֶד עֵינֶ֑יךָ, ֜שָׂנֵ֗אתָ כׇּל־פֹּ֥עֲלֵי אָֽוֶן:

ז תּאַבֵּד֘ דֹּברֵ֪י כָ֫זָ֥ב, אִֽישׁ־דָּמִ֥ים וּמִרְמָ֗ה יתָ֘עֵ֣ב | יְהֹוָֽה:

ח וַאֲנִ֗י בּרֹ֣ב ֖חַסְדּךָ אָב֣וֹא בֵיתֶ֑ךָ, אֶשְׁתַּחֲוֶ֥ה אֶל־הֵיכַל־֜קׇדְשׁךָ֗ בּיִרְאָתֶֽךָ:

ט יְהֹוָ֤ה | נחֵ֬נִי בצִדְקָתֶ֗ךָ למַ֥עַן שׁוֹררָ֑י, הַיְשַׁ֖ר הושר לפָנַ֣י דַּרְכֶּֽךָ:

י כִּ֤י אֵ֪ין בּפִ֡יהוּ נכוֹנָה֘, קִרְבָּ֪ם הַ֫וּ֥וֹת, קֶֽבֶר־פָּת֥וּחַ גּרֹנָ֑ם, ֜לשׁוֹנָ֗ם יַחֲלִיקֽוּן:

יא הַאֲשִׁימֵ֨ם | אֱלֹהִ֗ים, יִפּלוּ֘ מִמֹּעֲצ֪וֹתֵ֫יהֶ֥ם, בּרֹ֣ב ֖פִּשְׁעֵיהֶֽם הַדִּיחֵ֑מוֹ, כִּי מָ֥רוּ בָֽךְ:

יב ויִשְׂמח֥וּ כׇל־ח֪וֹסֵי בָ֡ךְ, לעוֹלָ֣ם ֖ירַנֵּנוּ, ותָסֵ֣ךְ עָלֵ֑ימוֹ, וֽיַעְלצ֥וּ ֜בךָ֗ אֹהֲבֵ֥י שׁמֶֽךָ:

יג כִּי־אַתָּה֘ תּבָרֵ֪ךְ צַ֫דִּ֥יק, יְהֹוָ֑ה, ֜כַּצִּנָּ֗ה רָצ֥וֹן תַּעְטרֶֽנּוּ:

ירַחֵם עַל עַצְמוֹ וְיִפְרֹשׂ כַּפָּיו בְּתַחֲנוּנִים וּפִיּוּסִים לְבַקֵּשׁ וּלְהִתְחַנֵּן מִלְּפָנָיו יִתְבָּרַךְ שֶׁיְּזַכֵּהוּ בְּרַחֲמָיו הַמְּרֻבִּים לְהִתְקָרֵב לַעֲבוֹדָתוֹ יִתְבָּרַךְ: (ש.הר"ן על פס' ז)

א לַֽמְנַצֵּ֣חַ ֖בִּנְגִינוֹת, עַל־הַשּׁמִינִ֗ית, מִזְמ֥וֹר לדָוִֽד:

ב יְהֹוָ֗ה אַל־בּאַפּךָ֥ תוֹכִיחֵ֑נִי, וֽאַל־בַּחֲמָתךָ֥ תיַסּרֵֽנִי:

ג חׇנֵּ֥נִי יְהֹוָה֘ כִּ֤י אֻמְלַ֫ל אָ֥נִי, רפָאֵ֥נִי יְהֹוָ֑ה כִּ֖י נִבְהֲל֣וּ עֲצָמָֽי:

ד ֖ונַפְשִׁי נִבְהֲלָ֣ה מאֹ֑ד, ואַתָּ֥ה ואת ֜יְהֹוָ֗ה עַד־מָתָֽי:

ה שׁוּבָ֣ה ֖יְהֹוָה חַלּצָ֣ה נַפְשִׁ֑י, ֜הוֹשִׁיעֵ֗נִי למַ֣עַן חַסְדֶּֽךָ:

ו כִּ֤י אֵ֣ין בַּמָּ֣וֶת זִכְרֶ֑ךָ, ֜בִּשְׁא֗וֹל מִ֣י יֽוֹדֶה־לָּֽךְ:

ז יָגַ֤עְתִּי | בּֽאַנְחָתִ֗י, אַשְׂחֶ֣ה בכׇל־֖לַיְלָה מִטָּתִ֑י, ֜בּדִמְעָתִ֗י עַרְשִׂ֥י אַמְסֶֽה:

ח עָשׁשָׁ֣ה מִכַּ֣עַס עֵינִ֑י, ֜עָתקָ֗ה בּכׇל־צוֹררָֽי:

ט ס֣וּרוּ ֖מִמֶּנִּי כׇּל־פֹּ֣עֲלֵי אָ֑וֶן, כִּי־שָׁמַ֥ע ֜יְהֹוָ֗ה ק֣וֹל בִּכְיִֽי:

י שָׁמַ֣ע ֖יְהֹוָה תּחִנָּתִ֑י, ֜יְהֹוָ֗ה תּֽפִלָּתִ֥י יִקָּֽח:

יא יֵבֹ֤שׁוּ | ויִבָּהֲל֣וּ ֖מאֹד כׇּל־אֹיבָ֑י, ֜יָשֻׁ֗בוּ יֵבֹ֥שׁוּ רָֽגַע:

צְרִיכִין תָּמִיד לִמְסֹר נַפְשׁוֹ עִם כָּל תְּנוּעוֹתָיו וְחִיּוּתוֹ לְה' יִתְבָּרַךְ, שֶׁעַל יְדֵי זֶה ה' יִתְבָּרַךְ מַצִּילוֹ מֵהָאוֹיְבִים וְהַשֹּוֹנְאִים: (לקו"ה על פס' ב-ג)

א שִׁגָּי֗וֹן לדָ֫וִ֥ד, אֲשֶׁר־שָׁ֥ר לַיהֹוָ֑ה, עַל־דִּבְרֵי־֜כוּשׁ בֶּן־ימִינִֽי:

ב יְהֹוָ֣ה ֖אֱלֹהַי, בּךָ֣ חָסִ֑יתִי, הוֹשִׁיעֵ֥נִי מִכׇּל־֜רֹדפַ֗י והַצִּילֵֽנִי:

ג פֶּן־יִטְרֹ֣ף כּאַרְיֵ֣ה נַפְשִׁ֑י, ֜פֹּרֵ֗ק ואֵ֣ין מַצִּֽיל:

ד יְהֹוָ֣ה ֖אֱלֹהַי אִם־עָשִׂ֣יתִי זֹ֑את, אִם־יֶשׁ־עָ֥וֶל בּכַפָּֽי:

ה אִם־֖גָּמַלְתִּי שׁוֹלמִ֥י רָ֑ע, וָאֲחַלּצָ֖ה צוֹררִ֣י רֵיקָֽם:

ו יִֽרַדֹּ֥ף אוֹיֵ֨ב | נַפְשִׁ֡י ויַשֵּׂ֗ג, ויִרְמֹ֣ס לָאָ֣רֶץ חַיָּ֑י, וּכְבוֹדִ֓י | לֶעָפָ֖ר יַשְׁכֵּ֣ן סֶֽלָה:

ז ק֘וּמָ֤ה יְהֹוָ֨ה | בּאַפֶּ֗ךָ, ֖הִנָּשֵׂא בּעַבְר֣וֹת צוֹררָ֑י, וע֥וּרָה ֜אֵלַ֗י מִשְׁפָּ֥ט צִוִּֽיתָ:

ח וַעֲדַ֣ת ֖לאֻמִּים תּסוֹבבֶ֑ךָּ, ו֜עָלֶ֗יהָ לַמָּר֥וֹם שֽׁוּבָה:

ט יְהֹוָה֘ יָדִ֪ין עַ֫מִּ֥ים, שׇׁפְטֵ֥נִי יְהֹוָ֑ה, כּצִדְקִ֖י וּכְתֻמִּ֣י עָלָֽי:

י יִגְמׇר־נָ֬א רַ֨ע | רשָׁעִים֘, וּתְכוֹנֵ֪ן צַ֫דִּ֥יק, וּבֹחֵ֣ן ֖לִבּוֹת וּכְלָי֗וֹת, אֱלֹהִ֥ים צַדִּֽיק:

יא מָגִנִּ֥י עַל־אֱלֹהִ֑ים, ֜מוֹשִׁ֗יעַ יִשְׁרֵי־לֵֽב:

יב ֖אֱלֹהִים שׁוֹפֵ֣ט צַדִּ֑יק, ֜ואֵ֗ל זֹעֵ֥ם בּכׇל־יֽוֹם:

יג אִם־לֹ֣א ֖יָשׁוּב חַרְבּ֣וֹ יִלְט֑וֹשׁ, קַשְׁתּ֥וֹ ֜דָרַ֗ךְ וַיְכוֹננֶֽהָ:

יד ֖ולוֹ הֵכִ֣ין כּלֵי־מָ֑וֶת, ֜חִצָּ֗יו לֽדֹלקִ֥ים יִפְעָֽל:

טו הִנֵּ֥ה יחַבֶּל־אָ֑וֶן, והָרָ֥ה ֜עָמָ֗ל, ויָ֣לַד שָֽׁקֶר:

טז בּ֣וֹר ֖כָּרָה וַיַּחְפּרֵ֑הוּ, ֜וַיִּפֹּ֗ל בּשַׁ֣חַת יִפְעָֽל:

יז יָשׁ֣וּב עֲמָל֣וֹ ברֹאשׁ֑וֹ, ועַל ֜קׇדְקֳד֗וֹ חֲמָס֥וֹ יֵרֵֽד:

יח אוֹדֶ֣ה יְהֹוָ֣ה כּצִדְק֑וֹ, ֜וַאֲזַמּרָ֗ה שֵׁם־יְהֹוָ֥ה עֶלְיֽוֹן:

עִקַּר הָאֱמֶת שֶׁל ה' יִתְבָּרַךְ הוּא שֶׁרַחֲמָיו וַחֲסָדָיו אֵינָם כָּלִים לְעוֹלָם יִהְיֶה אֵיךְ שֶׁיִּהְיֶה תָּמִיד תָּמִיד מוֹעִיל תְּפִלָּה וְתַחֲנוּנִים וּצְעָקָה וְשַׁוְעָה לְה' יִתְבָּרַךְ: (לקו"ה על פס' ה)

א לַֽמְנַצֵּ֥חַ עַל־הַגִּתִּ֗ית, מִזְמ֥וֹר לדָוִֽד:

ב יְהֹוָ֤ה אֲדֹנֵ֗ינוּ, מָֽה־אַדִּ֣יר ֖שִׁמְךָֽ בּכׇל־הָאָ֑רֶץ, אֲשֶׁ֥ר־תּנָ֥ה ֜הוֹדךָ֗ עַל־הַשָּׁמָֽיִם:

ג מִפִּ֤י עוֹללִ֨ים | וֽיֹנקִים֘ יִסַּ֪דְתָּ֫ עֹ֥ז, למַ֥עַן צוֹררֶ֑יךָ, להַשְׁבִּ֥ית ֜אוֹיֵ֗ב וּמִתְנַקֵּֽם:

ד כִּי֖ אֶרְאֶ֣ה ֖שָׁמֶיךָ מַעֲשֵׂ֣ה אֶצְבּעֹתֶ֑יךָ, יָרֵ֥חַ ֜וכוֹכָבִ֗ים אֲשֶׁ֣ר כּוֹנָֽנְתָּה:

ה מָה־אֱנ֥וֹשׁ כִּי־תִזְכּרֶ֑נּוּ, וּבֶן־֜אָדָ֗ם כִּ֣י תִפְקדֶֽנּוּ:

ו וַתּחַסּרֵ֣הוּ ֖מּעַט מֵאֱלֹהִ֑ים, וכָב֖וֹד והָדָ֣ר תּעַטּרֵֽהוּ:

ז ֖תַּמְשִׁילֵהוּ בּמַעֲשֵׂ֣י יָדֶ֑יךָ, ֜כֹּל שַׁ֣תָּה תַֽחַת־רַגְלָֽיו:

ח צֹנֶ֣ה וַאֲלָפִ֣ים כֻּלָּ֑ם, ֜וגַ֗ם בַּהֲמ֥וֹת שָׂדָֽי:

ט צִפּ֣וֹר ֖שָׁמַיִם וּדְגֵ֣י הַיָּ֑ם, ֜עֹבֵ֗ר אׇרְח֥וֹת יַמִּֽים:

י יְהֹוָ֥ה אֲדֹנֵ֑ינוּ, מָֽה־אַדִּ֥יר ֜שִׁמְךָ֗ בּכׇל־הָאָֽרֶץ:

צְרִיכִין לְהַרְגִּיל אֶת עַצְמוֹ מְאֹד בְּכָל יוֹם וּבְכָל עֵת לְהוֹדוֹת וּלְהַלֵּל לַה' יִתְבָּרַךְ עַל כָּל הַטּוֹבוֹת אֲשֶׁר גָּמַל עִמָּנוּ: (לקו"ה על פס' ב)

א ֖לַֽמְנַצֵּחַ עַל־מ֥וּת לַבֵּ֗ן, מִזְמ֥וֹר לדָוִֽד:

ב אוֹדֶ֣ה ֖יְהֹוָה בּכׇל־לִבִּ֑י, ֜אֲסַפּרָ֗ה כׇּל־נִפְלאֹתֶֽיךָ:

ג אֶשְׂמחָ֣ה ואֶעֶלְצָ֣ה בָ֑ךְ, אֲזַמּרָ֖ה שִׁמְךָ֣ עֶלְיֽוֹן:

ד בּשׁוּב־אוֹיבַ֥י אָח֑וֹר, יִכָּשׁל֥וּ ֜ויֹאבד֗וּ מִפָּנֶֽיךָ:

ה כִּי־֖עָשִׂיתָ מִשְׁפָּטִ֣י ודִינִ֑י, יָשַׁ֥בְתָּ ֜לכִסֵּ֗א שׁוֹפֵ֥ט צֶֽדֶק:

ו גָּעַ֣רְתָּ ֖גוֹיִם, אִבַּ֣דְתָּ רָשָׁ֑ע, שׁמָ֥ם ֜מָחִ֗יתָ לעוֹלָ֥ם וָעֶֽד:

ז הָֽאוֹיֵ֨ב | תַּ֥מּוּ חֳרָב֗וֹת לָ֫נֶ֥צַח, ועָרִ֥ים נָתַ֑שְׁתָּ אָבַ֖ד זִכְרָ֣ם הֵֽמָּה:

ח ֖וַיהֹוָה לעוֹלָ֣ם יֵשֵׁ֑ב, כּוֹנֵ֖ן לַמִּשְׁפָּ֣ט כִּסְאֽוֹ:

ט וה֗וּא יִשְׁפֹּט־תֵּבֵ֥ל בּצֶ֑דֶק, יָדִ֥ין ֜לאֻמִּ֗ים בּמֵישָׁרִֽים:

י וִ֘יהִ֤י יְהֹוָ֣ה מִשְׂגָּ֣ב לַדָּ֑ךְ, ֜מִשְׂגָּ֗ב לעִתּ֥וֹת בַּצָּרָֽה:

יא ויִבְטח֣וּ ֖בךָ יוֹדעֵ֣י שׁמֶ֑ךָ, כִּ֤י לֹא־עָזַ֖בְתָּ דֹרשֶׁ֣יךָ יְהֹוָֽה:

יב זַמּר֗וּ ֖לַיהֹוָה יֹשֵׁ֣ב צִיּ֑וֹן, הַגִּ֥ידוּ ֜בָעַמִּ֗ים עֲלִילֹתָֽיו:

יג כִּי־דֹרֵ֣שׁ ֖דָּמִים אוֹתָ֣ם זָכָ֑ר, לֹא־֜שָׁכַ֗ח צַעֲקַ֥ת עֲנָוִֽים עניים:

יד חׇֽננֵ֬נִי יְהֹוָ֗ה, ראֵ֣ה ֖עׇנְיִי מִשֹּֽׂנאָ֑י, ֜מרוֹממִ֗י מִשַּׁ֥עֲרֵי־מָֽוֶת:

טו למַ֥עַן אֲסַפּרָ֗ה כׇּל־תּהִלָּ֫תֶ֥יךָ, בּשַׁעֲרֵ֥י בַת־צִיּ֑וֹן ֜אָגִ֗ילָה בִּישׁוּעָתֶֽךָ:

טז טָבע֣וּ ֖גוֹיִם בּשַׁ֣חַת עָשׂ֑וּ, בּרֶ֖שֶׁת ז֥וּ ֜טָמָ֗נוּ נִלְכּדָ֥ה רַגְלָֽם:

יז נ֤וֹדַ֨ע | יְהֹוָה֘ מִשְׁפָּ֪ט עָ֫שָׂ֥ה, בּפֹ֣עַל ֖כַּפָּיו נוֹקֵ֣שׁ רָשָׁ֑ע, הִגָּי֥וֹן סֶֽלָה:

יח יָשׁ֣וּבוּ רשָׁעִ֣ים לִשְׁא֑וֹלָה, כׇּל־֜גּוֹיִ֗ם שׁכֵחֵ֥י אֱלֹהִֽים:

יט כִּ֤י לֹ֣א ֖לָנֶצַח יִשָּׁכַ֣ח אֶבְי֑וֹן, תִּקְוַ֥ת ֜עֲנִיִּ֗ים ענוים תֹּאבַ֥ד לָעַֽד:

כ קוּמָ֣ה ֖יְהֹוָה אַל־יָעֹ֣ז אֱנ֑וֹשׁ, יִשָּׁפט֥וּ גוֹיִ֗ם עַל־פָּנֶֽיךָ:

כא שִׁ֘יתָ֤ה יְהֹוָ֨ה | מוֹרָ֗ה לָ֫הֶ֥ם, יֵדע֥וּ גוֹיִ֑ם אֱנ֖וֹשׁ הֵ֣מָּה סֶּֽלָה:

כְּפִי בְּחִירָתוֹ וּכְפִי כִּסּוּפָיו וּכְפִי אֲמִתַּת הִתְחַזְּקוּתוֹ וֶאֱמוּנָתוֹ בְּה' יִתְבָּרַךְ, כְּמוֹ כֵן ה' יִתְבָּרַךְ מִתְגַּלְגֵּל עִמּוֹ בְּרַחֲמָיו: (לקו"ה על פס' י)

א לָמָ֣ה ֖יְהֹוָה תַּעֲמֹ֣ד בּרָח֑וֹק, ֜תַּעְלִ֗ים לעִתּ֥וֹת בַּצָּרָֽה:

ב בּגַאֲוַ֣ת ֖רָשָׁע יִדְלַ֣ק עָנִ֑י, יִתָָּֽפשׂ֓וּ | בִּמְזִמּ֖וֹת ז֣וּ חָשָֽׁבוּ:

ג כִּֽי־הִלֵּ֣ל ֖רָשָׁע עַל־תַּאֲוַ֣ת נַפְשׁ֑וֹ, וּבֹצֵ֥עַ ֜בֵּרֵ֗ךְ נִ֘אֵ֥ץ | יְהֹוָֽה:

ד רָשָׁ֗ע כּגֹ֣בַהּ ֖אַפּוֹ בַּל־יִדְרֹ֑שׁ, אֵ֥ין ֜אֱלֹהִ֗ים כׇּל־מזִמּוֹתָֽיו:

ה יָ֘חִ֤ילוּ דרָכָ֨ו | בּכׇל־עֵ֗ת, מָר֣וֹם ֖מִשְׁפָּטֶֽיךָ מִנֶּגְדּ֑וֹ, כׇּל־צ֜וֹררָ֗יו יָפִ֥יחַ בָּהֶֽם:

ו אָמַ֣ר ֖בּלִבּוֹ בַּל־אֶמּ֑וֹט, לדֹ֥ר ֜וָדֹ֗ר אֲשֶׁ֣ר לֹא־ברָֽע:

ז אָלָ֤ה | פִּ֣יהוּ ֖מָלֵא וּמִרְמ֣וֹת וָתֹ֑ךְ, תַּ֥חַת ֜לשׁוֹנ֗וֹ עָמָ֥ל וָאָֽוֶן:

ח יֵשֵׁ֤ב | בּמַאֲרַ֬ב חֲצֵרִ֗ים, ֖בַּֽמִּסְתָּרִים יַהֲרֹ֣ג נָקִ֑י, ֜עֵינָ֗יו לֽחֵלכָ֥ה יִצְפֹּֽנוּ:

ט יֶאֱרֹ֬ב בַּמִּסְתָּ֨ר | כּאַרְיֵ֬ה בסֻכֹּ֗ה, ֖יֶאֱרֹב לַחֲט֣וֹף עָנִ֑י, יַחְטֹ֥ף ֜עָנִ֗י בּמׇשְׁכ֥וֹ ברִשְׁתּֽוֹ:

י יִדְכֶּ֥ה ודכה יָשֹׁ֑חַ, ונָפַ֥ל ֜בַּעֲצוּמָ֗יו חֵ֣ל כָּאִֽים חלכאים:

יא אָמַ֣ר ֖בּלִבּוֹ שָׁ֣כַֽח אֵ֑ל, הִסְתִּ֥יר ֜פָּנָ֗יו, בַּל־רָאָ֥ה לָנֶֽצַח:

יב קוּמָ֤ה יְהֹוָ֗ה, ֖אֵל נשָׂ֣א יָדֶ֑ךָ, אַל־תִּשְׁכַּ֥ח עֲנָוִֽים עניים:

יג עַל־מֶ֤ה | נִאֵ֖ץ רָשָׁ֥ע | אֱלֹהִ֑ים, אָמַ֥ר ֜בּלִבּ֗וֹ לֹ֣א תִדְרֹֽשׁ:

יד רָאִ֡תָה, כִּי־אַתָּ֤ה | עָ֘מָ֤ל וָכַ֨עַס | תַּבִּיט֘, לָתֵ֪ת בּיָ֫דֶ֥ךָ, ֖עָלֶיךָ יַעֲזֹ֣ב חֵלֶ֑כָה, ֜יָת֗וֹם, אַתָּ֤ה | הָיִ֬יתָ עוֹזֵֽר:

טו ֖שׁבֹר זר֣וֹעַ רָשָׁ֑ע, ֜וָרָ֗ע תִּֽדְרוֹשׁ־רִשְׁע֥וֹ בַל־תִּמְצָֽא:

טז יְהֹוָ֣ה ֖מֶלֶךְ עוֹלָ֣ם וָעֶ֑ד, אָבד֥וּ ֜גוֹיִ֗ם מֵאַרְצֽוֹ:

יז תַּאֲוַ֬ת עֲנָוִ֣ים שָׁמַ֣עְתָּ יְהֹוָ֑ה, תָּכִ֥ין ֜לִבָּ֗ם, תַּקְשִׁ֥יב אׇזְנֶֽךָ:

יח לִשְׁפֹּ֥ט יָת֗וֹם וָ֫דָ֥ךְ, בַּל־יוֹסִ֥יף ע֑וֹד לַעֲרֹ֥ץ ֜אֱנ֗וֹשׁ מִן־הָאָֽרֶץ:

צָרִיךְ כָּל אָדָם אֲפִלּוּ בְּמַדְרֵגָתוֹ הַשְּׁפָלָה לֵידַע וּלְהַאֲמִין שֶׁבְּוַדַּאי הוּא מְנַצֵּחַ הַרְבֵּה עַל יְדֵי כָּל דִּבּוּר וְדִבּוּר שֶׁל שִׂיחָה וְהִתְבּוֹדְדוּת: (על"ת על פס' א)

א לַֽמְנַצֵּ֗חַ לדָ֫וִ֥ד, בַּֽיהֹוָ֨ה | חָסִ֗יתִי, ֖אֵיךְ תֹּאמר֣וּ לנַפְשִׁ֑י ֜נ֗וּדִי נודו הַרְכֶ֥ם צִפּֽוֹר:

ב כִּ֤י הִנֵּ֪ה הָרשָׁעִ֡ים יִדְרכ֬וּן קֶ֗שֶׁת, כּוֹננ֣וּ חִצָּ֣ם עַל־יֶ֑תֶר, לִיר֥וֹת בּמוֹ־֜אֹ֗פֶל ליִשְׁרֵי־לֵֽב:

ג כִּ֣י ֖הַשָּׁתוֹת יֵהָרֵס֑וּן, ֜צַדִּ֗יק מַה־פָּעָֽל:

ד יְהֹוָ֤ה | בּֽהֵ֘יכַ֤ל קׇדְשׁ֗וֹ יְהֹוָה֘ בַּשָּׁמַ֪יִם כִּ֫סְא֥וֹ, עֵינָ֥יו יֶחֱז֑וּ, עַפְעַפָּ֥יו ֜יִבְחֲנ֗וּ בּנֵ֣י אָדָֽם:

ה יְהֹוָה֘ צַדִּ֪יק יִ֫בְחָ֥ן, ֖ורָשָׁע ואֹהֵ֣ב חָמָ֑ס שָׂנאָ֥ה נַפְשֽׁוֹ:

ו יַמְטֵ֥ר עַל־רשָׁעִ֗ים פַּ֫חִ֥ים, אֵ֣שׁ ֖וגׇפְרִית ור֥וּחַ זִלְעָפ֗וֹת מנָ֣ת כּוֹסָֽם:

ז כִּי־צַדִּ֣יק ֖יְהֹוָה, צדָק֣וֹת אָהֵ֑ב, ֜יָשָׁ֗ר יֶחֱז֥וּ פָנֵֽימוֹ:

תִּרְאֶה שֶׁיֵּצְאוּ הַדִּבּוּרִים מִפִּיךָ בֶּאֱמֶת, וְאָז יִשְׁתּוֹקֵק הַקָּדוֹשׁ בָּרוּךְ הוּא מִלְמַעְלָה לִשְׁכֹּן אֶצְלְךָ: (לקו"ה על פס' ט)

א לַֽמְנַצֵּ֥חַ עַל־הַשּׁמִינִ֗ית, מִזְמ֥וֹר לדָוִֽד:

ב הוֹשִׁ֣יעָה ֖יְהֹוָה כִּי־גָמַ֣ר חָסִ֑יד, כִּי־פַ֥סּוּ ֜אֱמוּנִ֗ים מִבּנֵ֥י אָדָֽם:

ג שָׁ֤וְא | יֽדַבּרוּ֘ אִ֤ישׁ אֶת־רֵ֫עֵ֥הוּ, שׂפַ֥ת חֲלָק֑וֹת, בּלֵ֖ב וָלֵ֣ב ידַבֵּֽרוּ:

ד יַכְרֵ֣ת ֖יְהֹוָה כׇּל־שִׂפְתֵ֣י חֲלָק֑וֹת, ֜לָשׁ֗וֹן מדַבֶּ֥רֶת גּדֹלֽוֹת:

ה אֲשֶׁ֤ר אָֽמר֨וּ | לִלְשֹׁנֵ֣נוּ ֖נַגְבִּיר, שׂפָתֵ֣ינוּ אִתָּ֑נוּ, מִ֖י אָד֣וֹן לָֽנוּ:

ו מִשֹּׁ֥ד עֲנִיִּים֘ מֵאֶנְקַ֪ת אֶבְי֫וֹנִ֥ים, עַתָּ֣ה ֖אָקוּם יֹאמַ֣ר יְהֹוָ֑ה, אָשִׁ֥ית ֜בּיֵ֗שַׁע יָפִ֥יחַ לֽוֹ:

ז אִֽמֲר֣וֹת יְהֹוָה֘ אֲמָר֪וֹת טהֹ֫ר֥וֹת, כֶּ֣סֶף ֖צָרוּף, בַּעֲלִ֣יל לָאָ֑רֶץ, ֜מזֻקָּ֗ק שִׁבְעָתָֽיִם:

ח אַתָּֽה־יְהֹוָ֥ה תִּשְׁמרֵ֑ם, תִּצּרֶ֓נּוּ | מִן־הַדּ֖וֹר ז֣וּ לעוֹלָֽם:

ט סָבִ֗יב רשָׁעִ֥ים יִתְהַלָּכ֑וּן, כּרֻ֥ם ֜זֻלּ֗וּת לִבְנֵ֥י אָדָֽם:

עִקַּר הַתִּקּוּן שֶׁל כָּל אֶחָד וְאֶחָד שֶׁיְּחַזֵּק לִבּוֹ בְּבִטָּחוֹן גָּדוֹל בְּחַסְדֵי ה' יִתְבָּרַךְ שֶׁבְּוַדַּאי לֹא יַעֲזֹב אוֹתוֹ, עַד שֶׁיִּשְׂמַח וְיָגִיל נַפְשׁוֹ: (לקו"ה על פס' ו)

א לַֽמְנַצֵּ֗חַ, מִזְמ֥וֹר לדָוִֽד:

ב עַד־אָ֣נָה ֖יְהֹוָה תִּשְׁכָּחֵ֣נִי נֶ֑צַח, עַד־אָ֓נָה | תַּסְתִּ֖יר אֶת־פָּנֶ֣יךָ מִמֶּֽנִּי:

ג עַד־אָ֨נָה אָשִׁ֪ית עֵצ֡וֹת בּנַפְשִׁ֗י, יָג֣וֹן בִּלְבָבִ֣י יוֹמָ֑ם, עַד־אָ֓נָה | יָר֖וּם אֹיבִ֣י עָלָֽי:

ד הַבִּ֣יטָה ֖עֲנֵנִי יְהֹוָ֣ה אֱלֹהָ֑י, הָאִ֥ירָה ֜עֵינַ֗י פֶּן־אִישַׁ֥ן הַמָּֽוֶת:

ה פֶּן־יֹאמַ֣ר אֹיבִ֣י יכׇלְתִּ֑יו, צָרַ֥י ֜יָגִ֗ילוּ כִּ֣י אֶמּֽוֹט:

ו וַאֲנִ֤י | בּחַסְדּךָ֣ בָטַחְתִּי֘, יָ֤גֵ֥ל לִבִּ֗י בִּישׁוּעָ֫תֶ֥ךָ, אָשִׁ֥ירָה לַיהֹוָ֑ה, כִּ֖י גָמַ֣ל עָלָֽי:

כָל אָדָם כְּפִי מַה שֶּׁהוּא, אִם יִזְכֹּר אֶת עַצְמוֹ שֶׁאַף עַל פִּי כֵן הוּא מִזֶּרַע יִשְׂרָאֵל וְהִבְדִּילָנוּ מִן הַתּוֹעִים בְּכַמָּה בְּחִינוֹת, יָכוֹל לְשַׂמֵּחַ אֶת עַצְמוֹ בְּכָל מָקוֹם שֶׁהוּא: (לקו"ה על פס' ז)

א לַֽמְנַצֵּ֗חַ, לדָ֫וִ֥ד, אָ֘מַ֤ר נָבָ֣ל ֖בּלִבּֽוֹ אֵ֣ין אֱלֹהִ֑ים, הִֽשׁחִ֗יתוּ הִֽתעִ֥יבוּ עֲלִילָ֗ה, אֵ֣ין עֹֽשֵׂה־טֽוֹב:

ב יְֽהֹוָ֗ה מִשָּׁמַיִם֘ הִשְׁקִ֪יף עַֽל־בּנֵי־אָ֫דָ֥ם, ֖לִרְאוֹת הֲיֵ֣שׁ מַשְׂכִּ֑יל ֜דֹּרֵ֗שׁ אֶת־אֱלֹהִֽים:

ג הַכֹּ֥ל סָר֘, יַחְדָּ֪ו נֶ֫אֱלָ֥חוּ, אֵ֤ין עֹֽשֵׂה־ט֑וֹב, ֜אֵ֗ין גַּם־אֶחָֽד:

ד הֲלֹ֥א יָדעוּ֘ כׇּל־פֹּ֪עֲלֵ֫י אָ֥וֶן, אֹכלֵ֣י ֖עַמִּי אָ֣כלוּ לֶ֑חֶם, יְהֹוָ֗ה לֹ֣א קָרָֽאוּ:

ה שָׁ֤ם | פָּ֣חֲדוּ פָ֑חַד, כִּֽי־אֱ֜לֹהִ֗ים בּד֣וֹר צַדִּֽיק:

ו עֲצַת־עָנִ֥י תָבִ֑ישׁוּ, כִּ֖י יְהֹוָ֣ה מַחְסֵֽהוּ:

ז מִ֥י יִתֵּ֣ן מִצִּיּוֹן֘ ישׁוּעַ֪ת יִשְׂרָ֫אֵ֥ל, בּשׁ֣וּב ֖יְהֹוָה שׁב֣וּת עַמּ֑וֹ, יָגֵ֥ל ֜יַעֲקֹ֗ב יִשְׂמַ֥ח יִשְׂרָאֵֽל:

לֵב יִשְֹרְאֵלִי בּוֹעֵר וְחוֹשֵׁק תָּמִיד לַה' יִתְבָּרַךְ וּבִלְבָבוֹ מֵבִין הָאֱמֶת תָּמִיד, וְצָרִיךְ לְדַבֵּר בְּפִיו כְּפִי הָאֱמֶת שֶׁבְּלִבּוֹ: (לקו"ה על פס' ב)

א מִזְמ֗וֹר לדָ֫וִ֥ד, ֖יְהֹוָה מִי־יָג֣וּר בּאָהֳלֶ֑ךָ, מִי־֜יִשְׁכֹּ֗ן בּהַ֣ר קׇדְשֶֽׁךָ:

ב הוֹלֵ֣ךְ ֖תָּמִים וּפֹעֵ֥ל צֶ֑דֶק, ודֹבֵ֥ר ֜אֱמֶ֗ת בִּלְבָבֽוֹ:

ג לֹֽא־רָגַ֨ל | עַל־לשֹׁנ֗וֹ, לֹא־עָשָׂ֣ה לרֵעֵ֣הוּ רָעָ֑ה, ֜וחֶרְפָּ֗ה לֹא־נָשָׂ֥א עַל־קרֹבֽוֹ:

ד נִבְזֶ֤ה | בּֽעֵ֘ינָ֤יו נִמְאָ֗ס, ואֶת־יִרְאֵ֣י יְהֹוָ֣ה יכַבֵּ֑ד, נִשְׁבַּ֥ע ֜להָרַ֗ע ולֹ֣א יָמִֽר:

ה כַּסְפּ֤וֹ | לֹא־נָתַ֣ן בּנֶשֶׁךְ֘, ושֹׁ֥חַד עַל־נָקִ֗י לֹֽא־לָ֫קָ֥ח, עֹֽשֵׂה־אֵ֑לֶּה לֹ֖א יִמּ֣וֹט לעוֹלָֽם:

צְּרִיכִין לֵידַע וּלְהַאֲמִין שֶׁמְּלֹא כָל הָאָרֶץ כְּבוֹדוֹ וְהוּא יוֹשֵׁב וְעוֹמֵד וְכוּ' תָּמִיד לִפְנֵי מֶלֶךְ מַלְכֵי הַמְלָכִים הַקָּדוֹשׁ בָּרוּךְ הוּא: (לקו"ה על פס' ח)

א מִכְתָּ֥ם לדָוִ֑ד, שָֽׁמרֵ֥נִי ֜אֵל כִּי־חָסִ֥יתִי בָֽךְ:

ב אָמַ֣רְתְּ ֖לַיהֹוָה אֲדֹנָ֣י אָ֑תָּה, ֜טוֹבָתִ֗י בַּל־עָלֶֽיךָ:

ג ֖לִקְדוֹשִׁים אֲשֶׁר־בָּאָ֣רֶץ הֵ֑מָּה, ֜ואַדִּירֵ֗י כׇּל־חֶפְצִי־בָֽם:

ד יִרְבּ֥וּ עַצּבוֹתָם֘ אַחֵ֪ר מָ֫הָ֥רוּ, בַּל־אַסִּ֣יךְ נִסְכֵּיהֶ֣ם מִדָּ֑ם, וּֽבַל־אֶשָּׂ֥א אֶת־֜שׁמוֹתָ֗ם עַל־שׂפָתָֽי:

ה יְֽהֹוָ֗ה מנָת־חֶלְקִ֥י וכוֹסִ֑י, ֜אַתָּ֗ה תּוֹמִ֥יךְ גּוֹרָלִֽי:

ו חֲבָלִ֣ים נָֽפלוּ־֖לִי בַּנּעִמִ֑ים, אַף־֜נַחֲלָ֗ת שָֽׁפרָ֥ה עָלָֽי:

ז אֲבָרֵ֗ךְ אֶת־֖יְהֹוָה אֲשֶׁ֣ר יעָצָ֑נִי, אַף־֜לֵיל֗וֹת יִסּר֥וּנִי כִלְיוֹתָֽי:

ח שִׁוִּ֬יתִי יְהֹוָ֣ה לנֶגְדִּ֣י תָמִ֑יד, כִּ֥י ֜מִימִינִ֗י, בַּל־אֶמּֽוֹט:

ט לָכֵ֤ן | שָׂמַ֣ח ֖לִבִּי וַיָּ֣גֶל כּבוֹדִ֑י, אַף־֜בּשָׂרִ֗י יִשְׁכֹּ֥ן לָבֶֽטַח:

י כִּ֤י | לֹא־תַעֲזֹ֣ב נַפְשִׁ֣י לִשְׁא֑וֹל, לֹֽא־תִתֵּ֥ן ֜חֲסִידךָ֗ לִרְא֥וֹת שָֽׁחַת:

יא תּוֹדִיעֵנִי֘ אֹ֪רַח חַ֫יִּ֥ים, שֹׂ֣בַע ֖שׂמָחוֹת אֶת־פָּנֶ֑יךָ, נעִמ֖וֹת בִּימִינךָ֣ נֶֽצַח:

יַרְגִּיל מַחֲשַׁבְתּוֹ תָּמִיד לִכְסֹף וְלַחֲשֹׁק רַק כִּסּוּפִין טוֹבִים, שֶׁיִּתְגַּעְגֵּעַ וְיַחֲשֹׁק וְיִכְסֹף תָּמִיד לְהִתְקָרֵב לַה' יִתְבָּרַךְ וּלְתוֹרָתוֹ וַעֲבוֹדָתוֹ: (לקו"ה על פס' ג)

א תּפִלָּ֗ה לדָ֫וִ֥ד, שִׁמְעָ֤ה יְהֹוָ֨ה | צֶ֗דֶק, הַקְשִׁ֥יבָה רִנָּתִ֗י, הַאֲזִ֥ינָה תפִלָּתִ֑י, ֜בּלֹ֗א שִׂפְתֵ֥י מִרְמָֽה:

ב ֖מִלּפָנֶיךָ מִשְׁפָּטִ֣י יֵצֵ֑א, ֜עֵינֶ֗יךָ תֶּחֱזֶ֥ינָה מֵישָׁרִֽים:

ג בָּ֘חַ֤נְתָּ לִבִּ֨י |, פָּ֘קַ֤דְתָּ לַּ֗יְלָה, צרַפְתַּ֥נִי בַל־תִּמְצָ֑א, ֜זַמֹּתִ֗י בַּל־יַעֲבׇר־פִּֽי:

ד לִפְעֻלּ֣וֹת ֖אָדָם בִּדְבַ֣ר שׂפָתֶ֑יךָ, אֲנִ֥י ֜שָׁמַ֗רְתִּי אׇרְח֥וֹת פָּרִֽיץ:

ה תָּמֹ֣ךְ ֖אֲשֻׁרַי בּמַעְגּלוֹתֶ֑יךָ, בַּל־נָמ֥וֹטּוּ פעָמָֽי:

ו אֲנִי־קרָאתִ֣יךָ כִי־תַעֲנֵ֣נִי אֵ֑ל, הַֽט־אׇזְנךָ֥ ֜לִי, שׁמַ֣ע אִמְרָתִֽי:

ז הַפְלֵ֣ה ֖חֲסָדֶיךָ, מוֹשִׁ֣יעַ חוֹסִ֑ים, ֜מִמִּתְקוֹממִ֗ים בִּימִינֶֽךָ:

ח ֖שׇׁמְרֵנִי כּאִישׁ֣וֹן בַּת־עָ֑יִן, בּצֵ֥ל ֜כּנָפֶ֗יךָ תַּסְתִּירֵֽנִי:

ט מִפּנֵ֣י ֖רשָׁעִים ז֣וּ שַׁדּ֑וּנִי, אֹיבַ֥י ֜בּנֶ֗פֶשׁ יַקִּ֥יפוּ עָלָֽי:

י חֶלְבָּ֥מוֹ סָּגר֑וּ, ֜פִּ֗ימוֹ דִּבּר֥וּ בגֵאֽוּת:

יא ֖אַשֻּׁרֵינוּ עַתָּ֣ה סבָב֑וּנוּ סבבוני, עֵינֵיהֶ֥ם ֜יָשִׁ֗יתוּ לִנְט֥וֹת בָּאָֽרֶץ:

יב דִּמְיֹנ֗וֹ ֖כּאַרְיֵה יִכְס֣וֹף לִטְרֹ֑ף, ֜וכִכְפִ֗יר יֹשֵׁ֥ב בּמִסְתָּרִֽים:

יג קוּמָ֤ה יְהֹוָ֗ה, קַדּמָ֣ה ֖פָנָיו, הַכְרִיעֵ֑הוּ, פַּלּטָ֥ה ֜נַפְשִׁ֗י מֵרָשָׁ֥ע חַרְבֶּֽךָ:

יד מִֽמֲתִ֥ים יָדךָ֨ | יְהֹוָ֡ה, מִֽמֲתִ֬ים מֵחֶ֗לֶד חֶלְקָ֥ם בַּחַיִּים֘, וּֽצְפוּנךָ֘ וצפינך תּמַלֵּ֪א בִ֫טְנָ֥ם, יִשְׂבּע֥וּ בָנִ֑ים, והִנִּ֥יחוּ ֜יִתְרָ֗ם לעֽוֹללֵיהֶֽם:

טו אֲנִ֗י ֖בּצֶדֶק אֶחֱזֶ֣ה פָנֶ֑יךָ, אֶשְׂבּעָ֥ה ֜בהָקִ֗יץ תּמוּנָתֶֽךָ:

עִקַּר הַהַלֵּל כְּשֶׁזּוֹכִין לִמְצֹא אֶת ה' יִתְבָּרַךְ בְּכָל מָקוֹם, בֵּין בְּטִיבוֹ בֵּין בְּעָקוֹ: (לקו"ה על פס' ד)

א לַֽמְנַצֵּ֤חַ |, לעֶ֥בֶד יְהֹוָ֗ה לדָ֫וִ֥ד, אֲשֶׁ֤ר דִּבֶּ֨ר | לַֽיהֹוָ֗ה אֶת־֖דִּבְרֵי הַשִּׁירָ֣ה הַזֹּ֑את, בּי֤וֹם | הִֽצִּיל־יְהֹוָ֘ה אוֹת֥וֹ מִכַּ֥ף כׇּל־אֹ֜יבָ֗יו וּמִיַּ֥ד שָׁאֽוּל:

ב וַיֹּאמַ֡ר, אֶרְחׇמְךָ֖ יְהֹוָ֣ה חִזְקִֽי:

ג יְהֹוָ֤ה | סַֽלְעִ֥י וּמְצוּדָתִ֗י וּמְפַ֫לְטִ֥י, אֵלִ֣י ֖צוּרִי אֶחֱסֶה־בּ֑וֹ, מָגִנִּ֥י וקֶֽרֶן־יִ֜שְׁעִ֗י מִשְׂגַּבִּֽי:

ד ֖מהֻלָּל אֶקְרָ֣א יְהֹוָ֑ה, וּמִן־אֹ֜יבַ֗י אִוָּשֵֽׁעַ:

ה אֲפָפ֥וּנִי חֶבְלֵי־מָ֑וֶת, וֽנַחֲלֵ֖י בלִיַּ֣עַל יבַעֲתֽוּנִי:

ו חֶבְלֵ֣י שׁא֣וֹל סבָב֑וּנִי, ֜קִדּמ֗וּנִי מ֣וֹקשֵׁי מָֽוֶת:

ז בַּצַּר־לִ֤י | אֶֽקְרָ֣א יְהֹוָה֘, ואֶל־אֱלֹהַ֪י אֲשַׁ֫וֵּ֥עַ, יִשְׁמַ֣ע מֵהֵיכָל֣וֹ קוֹלִ֑י, ֜ושַׁוְעָתִ֗י לפָנָ֤יו | תָּבֹ֬א באׇזְנָֽיו:

ח וַתִּגְעַ֬שׁ וַתִּרְעַ֨שׁ | הָאָ֗רֶץ, וּמוֹסדֵ֣י הָרִ֣ים יִרְגָּ֑זוּ, ֜וַיִּתְגָּעֲשׁ֗וּ כִּי־חָ֥רָה לֽוֹ:

ט עָ֘לָ֤ה עָשָׁ֨ן | בּאַפּ֗וֹ, ואֵשׁ־מִפִּ֥יו תֹּאכֵ֑ל, ֜גֶּחָלִ֗ים בָּעֲר֥וּ מִמֶּֽנּוּ:

י וַיֵּ֣ט ֖שָׁמַיִם וַיֵּרַ֑ד, ֜וַעֲרָפֶ֗ל תַּ֣חַת רַגְלָֽיו:

יא וַיִּרְכַּ֣ב עַל־֖כּרוּב וַיָּעֹ֑ף, ֜וַיֵּ֗דֶא עַל־כַּנְפֵי־רֽוּחַ:

יב יָ֤שֶׁת חֹ֨שֶׁךְ | סִתְר֗וֹ סבִֽיבוֹתָ֥יו סֻכָּת֑וֹ, חֶשְׁכַת־֜מַ֗יִם עָבֵ֥י שׁחָקִֽים:

יג מִנֹּ֗גַהּ נֶ֫גְדּ֥וֹ, עָבָ֥יו עָבר֑וּ ֜בָּרָ֗ד וגַחֲלֵי־אֵֽשׁ:

יד וַיַּרְעֵ֬ם בַּשָּׁמַ֨יִם | יְֽהֹוָ֗ה, ֖ועֶלְיוֹן יִתֵּ֣ן קֹל֑וֹ, ֜בָּרָ֗ד וגַחֲלֵי־אֵֽשׁ:

טו וַיִּשְׁלַ֣ח ֖חִצָּיו וַיְפִיצֵ֑ם, וּבְרָקִ֥ים ֜רָב וַיְהֻמֵּֽם:

טז וַיֵּ֤רָא֨וּ | אֲפִ֥יקֵי מַ֗יִם, וַֽיִּגָּלוּ֘ מוֹסד֪וֹת תֵּ֫בֵ֥ל, מִגַּעֲרָ֣תךָ֣ יְהֹוָ֑ה, ֜מִנִּשְׁמַ֗ת ר֣וּחַ אַפֶּֽךָ:

יז יִשְׁלַ֣ח ֖מִמָּרוֹם יִקָּחֵ֑נִי, ֜יַמְשֵׁ֗נִי מִמַּ֥יִם רַבִּֽים:

יח יַצִּילֵ֗נִי מֵאֹיבִ֥י עָ֑ז, ֜וּמִשֹּֽׂנאַ֗י כִּֽי־אָמצ֥וּ מִמֶּֽנִּי:

יט יקַדּמ֥וּנִי ביוֹם־אֵידִ֑י, וַֽיְהִי־יְהֹוָ֖ה למִשְׁעָ֣ן לִֽי:

כ וַיּוֹצִיאֵ֥נִי לַמֶּרְחָ֑ב, ֜יחַלּצֵ֗נִי כִּ֘י חָ֥פֵֽץ בִּֽי:

כא יִגְמלֵ֣נִי יְהֹוָ֣ה כּצִדְקִ֑י, כּבֹ֥ר ֜יָדַ֗י יָשִׁ֥יב לִֽי:

כב כִּֽי־שָׁ֖מַרְתִּי דַּרְכֵ֣י יְהֹוָ֑ה, ולֹֽא־֜רָשַׁ֗עְתִּי מֵאֱלֹהָֽי:

כג כִּ֣י כׇל־מִשְׁפָּטָ֣יו לנֶגְדִּ֑י, ֜וחֻקֹּתָ֗יו לֹֽא־אָסִ֥יר מֶֽנִּי:

כד וָאֱהִ֣י תָמִ֣ים עִמּ֑וֹ, ֜וָאֶשְׁתַּמֵּ֗ר מֵעֲוֹנִֽי:

כה וַיָּֽשֶׁב־יְהֹוָ֣ה לִ֣י כצִדְקִ֑י, כּבֹ֥ר ֜יָדַ֗י לנֶ֣גֶד עֵינָֽיו:

כו עִם־חָסִ֥יד תִּתְחַסָּ֑ד, עִם־גּבַ֥ר ֜תָּמִ֗ים תִּתַּמָּֽם:

כז עִם־נָבָ֥ר תִּתְבָּרָ֑ר, ועִם־֜עִקֵּ֗שׁ תִּתְפַּתָּֽל:

כח כִּֽי־֖אַתָּה עַם־עָנִ֣י תוֹשִׁ֑יעַ, ועֵינַ֖יִם רָמ֣וֹת תַּשְׁפִּֽיל:

כט כִּֽי־֖אַתָּה תָּאִ֣יר נֵרִ֑י, יְהֹוָ֥ה ֜אֱלֹהַ֗י יַגִּ֥יהַּ חׇשְׁכִּֽי:

ל כִּֽי־ב֖ךָ אָרֻ֣ץ גּד֑וּד, ֜וּבֵאלֹהַ֗י אֲדַלֶּג־שֽׁוּר:

לא הָאֵל֘ תָּמִ֪ים דַּ֫רְכּ֥וֹ, אִמְרַֽת־יְהֹוָ֥ה צרוּפָ֑ה, מָגֵ֥ן ֜הוּא לכֹ֤ל | הַחֹסִ֬ים בּֽוֹ:

לב כִּ֤י מִ֣י ֖אֱלוֹהַּ מִבַּלְעֲדֵ֣י יְהֹוָ֑ה, וּמִ֥י ֜צוּר זוּלָתִ֥י אֱלֹהֵֽינוּ:

לג ֖הָאֵל הַמְאַזּרֵ֣נִי חָ֑יִל, וַיִּתֵּ֖ן תָּמִ֣ים דַּרְכִּֽי דרכו:

לד משַׁוֶּ֣ה ֖רַגְלַי כָּאַיָּל֑וֹת, ועַ֥ל ֜בָּמֹתַ֗י יַעֲמִידֵֽנִי:

לה מלַמֵּ֣ד ֖יָדַי לַמִּלְחָמָ֑ה, וֽנִחֲתָ֥ה קֶ֥שֶׁת־֜נחוּשָׁ֗ה זרוֹעֹתָֽי:

לו וַתִּתֶּן־לִי֘ מָגֵ֪ן יִ֫שְׁעֶ֥ךָ, וִימִינךָ֥ תִסְעָדֵ֑נִי, וֽעַנְוַתְךָ֥ תַרְבֵּֽנִי:

לז תַּרְחִ֣יב צַעֲדִ֣י תַחְתָּ֑י, ולֹ֥א ֜מָעֲד֗וּ קַרְסֻלָּֽי:

לח אֶרְדּ֣וֹף ֖אוֹיבַי ואַשִּׂיגֵ֑ם, ולֹא־֜אָשׁ֗וּב עַד־כַּלּוֹתָֽם:

לט ֖אֶמְחָצֵם ולֹא־יֻ֣כלוּ ק֑וּם, ֜יִפּל֗וּ תַּ֣חַת רַגְלָֽי:

מ וַתּאַזּרֵ֣נִי ֖חַיִל לַמִּלְחָמָ֑ה, תַּכְרִ֖יעַ קָמַ֣י תַּחְתָּֽי:

מא וֽאֹיבַ֗י נָתַ֣תָּה לִּ֣י עֹ֑רֶף, ֜וּמְשַׂנְאַ֗י אַצְמִיתֵֽם:

מב ישַׁוּע֥וּ ואֵין־מוֹשִׁ֑יעַ, עַל־֜יְהֹוָ֗ה, ולֹ֣א עָנָֽם:

מג וֽאֶשְׁחָקֵ֗ם כּעָפָ֥ר עַל־פּנֵי־ר֑וּחַ, כּטִ֖יט חוּצ֣וֹת אֲרִיקֵֽם:

מד תּפַלּטֵנִי֘ מֵרִ֪יבֵ֫י עָ֥ם, ֖תּשִׂימֵנִי לרֹ֣אשׁ גּוֹיִ֑ם, עַ֖ם לֹא־יָדַ֣עְתִּי יַעַבְדֽוּנִי:

מה לשֵׁ֣מַֽע ֖אֹזֶן יִשָּׁ֣מעוּ לִ֑י, בּנֵֽי־֜נֵכָ֗ר יכַחֲשׁוּ־לִֽי:

מו בּנֵי־נֵכָ֥ר יִבֹּ֑לוּ, ֜ויַחְרג֗וּ מִֽמִּסְגּרוֹתֵיהֶֽם:

מז חַי־֖יְהֹוָה וּבָר֣וּךְ צוּרִ֑י, ֜ויָר֗וּם אֱלוֹהֵ֥י יִשְׁעִֽי:

מח הָאֵ֗ל הַנּוֹתֵ֣ן נקָמ֣וֹת לִ֑י, וַיַּדְבֵּ֖ר עַמִּ֣ים תַּחְתָּֽי:

מט מפַלּטִ֗י מֵאֹ֫יבָ֥י, אַ֣ף מִן־֖קָמַי תּרוֹממֵ֑נִי, מֵאִ֥ישׁ ֜חָמָ֗ס תַּצִּילֵֽנִי:

נ עַל־כֵּ֤ן | אוֹדךָ֖ בַגּוֹיִ֥ם | יְהֹוָ֑ה, וּלְשִׁמְךָ֥ אֲזַמֵּֽרָה:

נא מַגְדִּל֘ ישׁוּע֪וֹת מַ֫לְכּ֥וֹ, ועֹ֤שֶׂה חֶ֨סֶד | לִמְשִׁיח֗וֹ, לדָוִ֥ד וּלְזַרְע֗וֹ עַד־עוֹלָֽם:

עִקַּר הַחִיּוּת בֶּאֱמֶת, כְּשֶׁזּוֹכִין לְהַתְחִיל בְּכָל פַּעַם מֵחָדָשׁ בַּעֲבוֹדַת ה' שֶׁהוּא עִקַּר הַחַיִּים בֶּאֱמֶת: (לקו"ה על פס' ג)

א לַֽמְנַצֵּ֗חַ, מִזְמ֥וֹר לדָוִֽד:

ב הַשָּׁמַ֗יִם מֽסַפּרִ֥ים כּב֥וֹד אֵ֑ל, וּמַעֲשֵׂ֥ה ֜יָדָ֗יו מַגִּ֥יד הָרָקִֽיעַ:

ג י֣וֹם ֖ליוֹם יַבִּ֣יעַֽ אֹ֑מֶר, ולַ֥יְלָה ֜ללַ֗יְלָה יחַוֶּה־דָּֽעַת:

ד אֵין־֖אֹמֶר ואֵ֣ין דּבָרִ֑ים, ֜בּלִ֗י נִשְׁמָ֥ע קוֹלָֽם:

ה בּכׇל־הָאָ֨רֶץ | יָ֘צָ֤א קַוָּ֗ם, וּבִקְצֵ֣ה ֖תֵבֵל מִלֵּיהֶ֑ם, ֜לַשֶּׁ֗מֶשׁ שָֽׂם־אֹ֥הֶל בָּהֶֽם:

ו וה֗וּא ֖כּחָתָן יֹצֵ֣א מֵחֻפָּת֑וֹ, יָשִׂ֥ישׂ ֜כּגִבּ֗וֹר לָר֥וּץ אֹֽרַח:

ז מִקְצֵ֤ה הַשָּׁמַ֨יִם | מֽוֹצָא֗וֹ, וּתְקוּפָת֥וֹ עַל־קצוֹתָ֑ם, ואֵ֥ין ֜נִסְתָּ֗ר מֵחַמָּתֽוֹ:

ח תּ֘וֹרַ֤ת יְהֹוָ֣ה ֖תּמִימָה, משִׁ֣יבַת נָ֑פֶשׁ, עֵד֖וּת יְהֹוָ֣ה ֜נֶאֱמָנָ֗ה, מַחְכִּ֥ימַת פֶּֽתִי:

ט פִּקּ֘וּדֵ֤י יְהֹוָ֣ה ֖ישָׁרִים, משַׂמּחֵי־לֵ֑ב, מִצְוַ֥ת יְהֹוָ֥ה ֜בָּרָ֗ה, מאִירַ֥ת עֵינָֽיִם:

י יִרְאַ֤ת יְהֹוָ֨ה | טהוֹרָה֘, עוֹמֶ֪דֶת לָ֫עַ֥ד, מִֽשְׁפּטֵי־יְהֹוָ֥ה אֱמֶ֑ת, צָדק֥וּ יַחְדָּֽו:

יא הַנֶּֽחֱמָדִ֗ים ֖מִזָּהָב וּמִפָּ֣ז [י"ג וּמִפַּ֣ז] רָ֑ב, וּמְתוּקִ֥ים ֜מִדּבַ֗שׁ ונֹ֣פֶת צוּפִֽים:

יב גַּ֥ם־עַ֖בְדּךָ נִזְהָ֣ר בָּהֶ֑ם, ֜בּשׇׁמְרָ֗ם עֵ֣קֶב רָֽב:

יג שׁגִיא֥וֹת מִֽי־יָבִ֑ין, מִֽנִּסְתָּר֥וֹת נַקֵּֽנִי:

יד גַּ֤ם מִזֵּדִ֨ים | חֲשֹׂ֬ךְ עַבְדֶּ֗ךָ, אַֽל־יִמְשׁלוּ־֣בִי אָ֣ז אֵיתָ֑ם, ֜ונִקֵּ֗יתִי מִפֶּ֥שַׁע רָֽב:

טו יִֽהְי֥וּ לרָצ֨וֹן | אִמְרֵי־פִ֡י והֶגְי֣וֹן לִבִּ֣י לפָנֶ֑יךָ, ֜יְהֹוָ֗ה צוּרִ֥י וגֹאֲלִֽי:

כָּל רְצוֹנוֹ יִתְבָּרַךְ בִּבְרִיאַת עוֹלָמוֹ וּבְהַנְהָגַת וְקִיּוּם הָעוֹלָם שֶׁמַּנְהִיג וּמְקַיֵּם הָעוֹלָם בִּרְצוֹנוֹ, הַכֹּל הוּא בִּשְׁבִיל זֶה, בִּשְׁבִיל נוֹרְאוֹת קְדֻשַּׁת תְּפִלּוֹת יִשְׂרָאֵל: (לקו"ה על פס' ב)

א לַֽמְנַצֵּ֗חַ, מִזְמ֥וֹר לדָוִֽד:

ב יַעַנְךָ֣ ֖יְהֹוָה בּי֣וֹם צָרָ֑ה, ֜ישַׂגֶּבְךָ֗ שֵׁ֤ם | אֱלֹהֵ֬י יַעֲקֹֽב:

ג יִשְׁלַֽח־עֶזְרךָ֥ מִקֹּ֑דֶשׁ, ֜וּמִצִּיּ֗וֹן יִסְעָדֶֽךָּ:

ד יִזְכֹּ֥ר כׇּל־מִנְחֹתֶ֑יךָ, ועוֹלָתךָ֖ ידַשּׁנֶ֣ה סֶֽלָה:

ה יִֽתֶּן־לךָ֥ כִלְבָבֶ֑ךָ, וֽכׇל־עֲצָתךָ֥ ימַלֵּֽא:

ו נרַנּנָ֤ה | בִּ֘ישׁ֤וּעָתֶ֗ךָ וּבְשֵֽׁם־אֱלֹהֵ֥ינוּ נִדְגֹּ֑ל, ימַלֵּ֥א ֜יְהֹוָ֗ה כׇּל־מִשְׁאֲלוֹתֶֽיךָ:

ז עַתָּ֤ה יָדַ֗עְתִּי כִּ֤י הוֹשִׁ֥יעַ | יְהֹוָ֗ה משִׁ֫יח֥וֹ, ֖יַעֲנֵהוּ מִשּׁמֵ֣י קׇדְשׁ֑וֹ, ֜בִּגְבֻר֗וֹת יֵ֣שַׁע ימִינֽוֹ:

ח אֵ֣לֶּה ֖בָרֶכֶב ואֵ֣לֶּה בַסּוּסִ֑ים, וַאֲנַ֓חְנוּ | בּשֵׁם־יְהֹוָ֖ה אֱלֹהֵ֣ינוּ נַזְכִּֽיר:

ט ֖הֵמָּה כָּרע֣וּ ונָפָ֑לוּ, וַאֲנַ֥חְנוּ ֜קַּ֗מְנוּ וַנִּתְעוֹדָֽד:

י יְהֹוָ֥ה הוֹשִׁ֑יעָה, ֜הַמֶּ֗לֶךְ יַעֲנֵ֥נוּ ביוֹם־קׇרְאֵֽנוּ:

עִקַּר עַזּוּתוֹ וְהִתְחַזְּקוּתוֹ שֶׁל הָאָדָם לְהִתְקָרֵב לַעֲבוֹדַת ה' יִתְבָּרַךְ הִיא עַל יְדֵי שִׂמְחָה וְחֶדְוָה: (לקו"ה על פס' ב)

א לַֽמְנַצֵּ֗חַ, מִזְמ֥וֹר לדָוִֽד:

ב יְהֹוָ֗ה בּעׇזּךָ֥ יִשְׂמַח־מֶ֑לֶךְ, ֜וּבִישׁ֥וּעָֽתךָ֗ מַה־יָּ֥גֶל יגיל מאֹֽד:

ג תַּאֲוַ֣ת ֖לִבּוֹ נָתַ֣תָּה לּ֑וֹ, וַֽאֲרֶ֥שֶׁת ֜שׂפָתָ֗יו בַּל־מָנַ֥עְתָּ סֶּֽלָה:

ד כִּֽי־ת֖קַדּמֶנּוּ בִּרְכ֣וֹת ט֑וֹב, תָּשִׁ֥ית ֜לרֹאשׁ֗וֹ עֲטֶ֣רֶת פָּֽז:

ה חַיִּ֤ים | שָׁאַ֣ל ֖מִמּךָ, נָתַ֣תָּה לּ֑וֹ, אֹ֥רֶךְ ֜יָמִ֗ים עוֹלָ֥ם וָעֶֽד:

ו גָּד֣וֹל ֖כּבוֹדוֹ בִּישׁוּעָתֶ֑ךָ, ה֥וֹד ֜והָדָ֗ר תּשַׁוֶּ֥ה עָלָֽיו:

ז כִּֽי־תשִׁיתֵ֣הוּ ברָכ֣וֹת לָעַ֑ד, תּחַדֵּ֥הוּ ֜בשִׂמְחָ֗ה אֶת־פָּנֶֽיךָ:

ח כִּֽי־֖הַמֶּלֶךְ בֹּטֵ֣חַ בַּיהֹוָ֑ה, וּבְחֶ֥סֶד ֜עֶלְי֗וֹן בַּל־יִמּֽוֹט:

ט תִּמְצָ֣א ֖יָדךָ לכׇל־אֹיבֶ֑יךָ, ֜ימִינךָ֗ תִּמְצָ֥א שֹׂנאֶֽיךָ:

י תּשִׁיתֵ֤מוֹ | כּתַנּ֥וּר אֵשׁ֘ לעֵ֪ת פָּ֫נֶ֥יךָ, ֖יְהֹוָה בּאַפּ֣וֹ יבַלּעֵ֑ם, וֽתֹאכלֵ֥ם אֵֽשׁ:

יא ֖פִּרְיָמוֹ מֵאֶ֣רֶץ תּאַבֵּ֑ד, ֜וזַרְעָ֗ם מִבּנֵ֥י אָדָֽם:

יב כִּי־נָט֣וּ עָלֶ֣יךָ רָעָ֑ה, חָשׁב֥וּ ֜מזִמָּ֗ה בַּל־יוּכָֽלוּ:

יג ֖כִּי תּשִׁיתֵ֣מוֹ שֶׁ֑כֶם, ֜בּמֵיתָרֶ֗יךָ תּכוֹנֵ֥ן עַל־פּנֵיהֶֽם:

יד ר֣וּמָה יְהֹוָ֣ה בּעֻזֶּ֑ךָ, נָשִׁ֥ירָה ֜וּֽנְזַמּרָ֗ה גּבוּרָתֶֽךָ:

לְבַקֵּשׁ תָּמִיד אֶת ה' יִתְבָּרַךְ בְּכָל מָקוֹם שֶׁהוּא וְלִזְעֹק בְּכָל עֵת לְה' יִתְבָּרַךְ, וְאַל יִתְיָאֵשׁ מִן הַצְּעָקָה וְהַבַּקָּשָׁה לְעוֹלָם: (לקו"ה על פס' ב)

א ֖לַֽמְנַצֵּחַ עַל־אַיֶּ֥לֶת הַשַּׁ֗חַר, מִזְמ֥וֹר לדָוִֽד:

ב אֵלִ֣י, ֖אֵלִי, לָמָ֣ה עֲזַבְתָּ֑נִי, רָח֥וֹק ֜מִישׁוּעָתִ֗י דִּבְרֵ֥י שַׁאֲגָתִֽי:

ג אֱלֹהַ֗י אֶקְרָ֣א ֖יוֹמָם ולֹ֣א תַעֲנֶ֑ה, ֜ולַ֗יְלָה וֽלֹא־דוּמִיָּ֥ה לִֽי:

ד ואַתָּ֥ה קָד֑וֹשׁ, ֜יוֹשֵׁ֗ב, תּהִלּ֥וֹת יִשְׂרָאֵֽל:

ה ֖בּךָ בָּטח֣וּ אֲבֹתֵ֑ינוּ, ֜בָּטח֗וּ וַֽתּפַלּטֵֽמוֹ:

ו אֵלֶ֣יךָ זָֽעֲק֣וּ ונִמְלָ֑טוּ, בּךָ֖ בָטח֣וּ ולֹא־בֽוֹשׁוּ:

ז ואָנֹכִ֣י תוֹלַ֣עַת ולֹא־אִ֑ישׁ, חֶרְפַּ֥ת ֜אָדָ֗ם וּבְז֥וּי עָֽם:

ח כׇּל־֖רֹאַי יַלְעִ֣גוּ לִ֑י, יַפְטִ֥ירוּ ֜בשָׂפָ֗ה יָנִ֥יעוּ רֹֽאשׁ:

ט גֹּ֣ל אֶל־יְהֹוָ֣ה יפַלּטֵ֑הוּ, ֜יַצִּילֵ֗הוּ כִּ֘י חָ֥פֵֽץ בּֽוֹ:

י כִּי־אַתָּ֣ה גֹחִ֣י מִבָּ֑טֶן, ֜מַבְטִיחִ֗י עַל־שׁדֵ֥י אִמִּֽי:

יא ֖עָלֶיךָ הׇשְׁלַ֣כְתִּי מֵרָ֑חֶם, מִבֶּ֥טֶן ֜אִמִּ֗י אֵ֣לִי אָֽתָּה:

יב אַל־תִּרְחַ֣ק ֖מִמֶּנִּי כִּי־צָרָ֣ה קרוֹבָ֑ה, כִּי־אֵ֥ין עוֹזֵֽר:

יג ֖סבָבוּנִי פָּרִ֣ים רַבִּ֑ים, אַבִּירֵ֖י בָשָׁ֣ן כִּתּרֽוּנִי:

יד פָּצ֣וּ עָלַ֣י פִּיהֶ֑ם, ֜אַרְיֵ֗ה טֹרֵ֥ף ושֹׁאֵֽג:

טו כַּמַּ֥יִם נִשְׁפַּכְתִּי֘, וֽהִתְפָּֽרד֗וּ כׇּל־עַצְמ֫וֹתָ֥י, הָיָ֣ה ֖לִבִּי כַּדּוֹנָ֑ג, ֜נָמֵ֗ס בּת֣וֹךְ מֵעָֽי:

טז יָ֘בֵ֥שׁ כַּחֶ֨רֶשׂ | כֹּחִ֗י, ֖וּלְשׁוֹנִי מֻדְבָּ֣ק מַלְקוֹחָ֑י, וֽלַעֲפַר־מָ֥וֶת תִּשְׁפּתֵֽנִי:

יז כִּ֥י סבָב֗וּנִי כּלָ֫בִ֥ים, עֲדַ֣ת ֖מרֵעִים הִקִּיפ֑וּנִי, ֜כָּֽאֲרִ֗י יָדַ֥י ורַגְלָֽי:

יח אֲסַפֵּ֥ר כׇּל־עַצְמוֹתָ֑י, הֵ֥מָּה ֜יַבִּ֗יטוּ יִרְאוּ־בִֽי:

יט יחַלּק֣וּ בגָדַ֣י לָהֶ֑ם, ועַל־֜לבוּשִׁ֗י יַפִּ֥ילוּ גוֹרָֽל:

כ ואַתָּ֣ה ֖יְהֹוָה אַל־תִּרְחָ֑ק, ֜אֱיָלוּתִ֗י לעֶזְרָ֥תִי חֽוּשָׁה:

כא הַצִּ֣ילָה מֵחֶ֣רֶב נַפְשִׁ֑י, מִיַּד־֜כֶּ֗לֶב יחִֽידָתִֽי:

כב ֖הוֹשִׁיעֵנִי מִפִּ֣י אַרְיֵ֑ה, וּמִקַּרְנֵ֖י רֵמִ֣ים עֲנִיתָֽנִי:

כג אֲסַפּרָ֣ה שִׁמְךָ֣ לאֶחָ֑י, בּת֖וֹךְ קָהָ֣ל אֲהַללֶֽךָּ:

כד יִרְאֵ֤י יְהֹוָ֨ה | הַֽלל֗וּהוּ, כׇּל־זֶ֣רַע יַֽעֲקֹ֣ב כַּבּד֑וּהוּ, וג֥וּרוּ ֜מִמֶּ֗נוּ כׇּל־זֶ֥רַע יִשְׂרָאֵֽל:

כה כִּ֤י לֹֽא־בָזָ֨ה ולֹ֪א שִׁקַּ֡ץ עֱנ֬וּת עָנִ֗י, ולֹא־הִסְתִּ֣יר פָּנָ֣יו מִמֶּ֑נּוּ, וּֽבְשַׁוּע֖וֹ אֵלָ֣יו שָׁמֵֽעַ:

כו מֵֽאִתּךָ֗ תּֽהִלָּ֫תִ֥י, בּקָהָ֥ל רָ֑ב נדָרַ֥י ֜אֲשַׁלֵּ֗ם, נֶ֣גֶד ירֵאָֽיו:

כז יֹאכל֬וּ עֲנָוִ֨ים | ויִשְׂבָּ֗עוּ, יהַלל֣וּ ֖יְהֹוָה דֹּ֣רשָׁ֑יו, יחִ֖י לבַבְכֶ֣ם לָעַֽד:

כח יִזְכּר֤וּ | ויָשֻׁ֣בוּ אֶל־֖יְהֹוָה כׇּל־אַפְסֵי־אָ֑רֶץ, ויִֽשְׁתַּחֲו֥וּ ֜לפָנֶ֗יךָ כׇּֽל־מִשְׁפּח֥וֹת גּוֹיִֽם:

כט כִּ֣י ֖לַיהֹוָה הַמּלוּכָ֑ה, ֜וּמֹשֵׁ֗ל בַּגּוֹיִֽם:

ל אָכל֬וּ וַיִּשְׁתַּחֲו֨וּ | כׇּֽל־דִּשְׁנֵי־אֶ֗רֶץ, לפָנָ֣יו ֖יִכְרעוּ כׇּל־יוֹרדֵ֣י עָפָ֑ר, ֜ונַפְשׁ֗וֹ לֹ֣א חִיָּֽה:

לא זֶ֥רַע יַעַבְדֶ֑נּוּ, יסֻפַּ֖ר לַאדֹנָ֣י לַדּֽוֹר:

לב ֖יָבֹאוּ ויַגִּ֣ידוּ צִדְקָת֑וֹ, לעַ֥ם ֜נוֹלָ֗ד, כִּ֣י עָשָֽׂה:

בְּכָל מְקוֹמוֹת מֶמְשַׁלְתּוֹ וְה' יִתְבָּרַךְ עִמּוֹ תָּמִיד, אֲפִלּוּ בִּמְקוֹמוֹת הַחִיצוֹנִים חַס וְשָׁלוֹם: (לקו"ה על פס' ד)

א מִזְמ֥וֹר לדָוִ֑ד, יְהֹוָ֥ה ֜רֹעִ֗י לֹ֣א אֶחְסָֽר:

ב בִּנְא֣וֹת ֖דֶּשֶׁא יַרְבִּיצֵ֑נִי, עַל־מֵ֖י מנֻח֣וֹת ינַהֲלֵֽנִי:

ג נַפְשִׁ֥י ישׁוֹבֵ֑ב, יַֽנְחֵ֥נִי במַעְגּלֵי־֜צֶ֗דֶק למַ֣עַן שׁמֽוֹ:

ד גַּ֤ם כִּֽי־אֵלֵ֨ךְ בּגֵ֪יא צַלְמָ֡וֶת לֹֽא־אִ֘ירָ֤א רָ֗ע כִּֽי־אַתָּ֥ה עִמָּדִ֑י, שִׁבְטךָ֥ ֜וּמִשְׁעַנְתֶּ֗ךָ הֵ֣מָּה ינַחֲמֻֽנִי:

ה תַּעֲרֹ֬ךְ לפָנַ֨י | שֻׁלְחָ֗ן נֶ֥גֶד צֹררָ֑י, דִּשַׁ֥נְתָּ בַשֶּׁ֥מֶן ֜רֹאשִׁ֗י כּוֹסִ֥י רוָיָֽה:

ו אַ֤ךְ | ט֤וֹב וָחֶ֣סֶד ֖יִרְדּפוּנִי כׇּל־ימֵ֣י חַיָּ֑י, ושַׁבְתִּ֥י בּבֵית־֜יְהֹוָ֗ה לאֹ֣רֶךְ יָמִֽים:

צָרִיךְ לְהִתְפַּלֵּל בְּרַחֲמִים וְתַחֲנוּנִים כְּעָנִי וָרָשׁ הַשּׁוֹאֵל עַל הַפְּתָחִים וְיוֹתֵר מִזֶּה, וְלֹא יִדְחֹק אֶת הַשָּׁעָה: (לקו"ה על פס' ד)

א לדָוִ֗ד מִ֫זְמ֥וֹר, ֖לַיהֹוָה הָאָ֣רֶץ וּמְלוֹאָ֑הּ, ֜תֵּבֵ֗ל ויֹ֣שׁבֵי בָֽהּ:

ב כִּי־֖הוּא עַל־יַמִּ֣ים יסָדָ֑הּ, ועַל־֜נהָר֗וֹת יכוֹננֶֽהָ:

ג מִֽי־יַעֲלֶ֥ה בהַר־יְהֹוָ֑ה, וּמִֽי־֜יָק֗וּם בִּמְק֥וֹם קׇדְשֽׁוֹ:

ד נקִ֥י כַפַּ֗יִם וּבַר־לֵ֫בָ֥ב, אֲשֶׁ֤ר | לֹא־נָשָׂ֣א לַשָּׁ֣וְא נַפְשִׁ֑י נפשו, ולֹ֖א נִשְׁבַּ֣ע למִרְמָֽה:

ה יִשָּׂ֣א ֖ברָכָה מֵאֵ֣ת יְהֹוָ֑ה, ֜וּצְדָקָ֗ה מֵאֱלֹהֵ֥י יִשְׁעֽוֹ:

ו ֖זֶה דּ֣וֹר דֹּרשָׁ֑יו, מבַקְשֵׁ֨י פָנֶ֖יךָ יַעֲקֹ֣ב סֶֽלָה:

ז שׂא֤וּ שׁעָרִ֨ים | רָאשֵׁיכֶ֗ם ֖וֽהִנָּ֣שׂאוּ פִּתְחֵ֣י עוֹלָ֑ם, ֜ויָב֗וֹא מֶ֣לֶךְ הַכָּבֽוֹד:

ח מִ֥י זֶה֘ מֶ֪לֶךְ הַכָּ֫ב֥וֹד, ֖יְהֹוָה עִזּ֣וּז וגִבּ֑וֹר, ֜יְהֹוָ֗ה גִּבּ֥וֹר מִלְחָמָֽה:

ט שׂא֤וּ שׁעָרִ֨ים | רָאשֵׁיכֶ֗ם, ֖וּשְׂאוּ פִּתְחֵ֣י עוֹלָ֑ם, ֜ויָבֹ֗א מֶ֣לֶךְ הַכָּבֽוֹד:

י מִ֤י ה֣וּא זֶה֘ מֶ֤לֶךְ הַכָּ֫ב֥וֹד, יְהֹוָ֥ה צבָא֑וֹת, ה֤וּא מֶ֖לֶךְ הַכָּב֣וֹד סֶֽלָה:

אֵין שָׁעָה בָּעוֹלָם שֶׁלֹּא יוּכַל לְהָאִיר לְעַצְמוֹ עַל יְדֵי הָאֱמֶת אַף אִם הַחֹשֶׁךְ מְסַבֵּב אוֹתוֹ כְּמוֹ שֶׁמְּסַבֵּב, כִּי אֱמֶת ה' לְעוֹלָם: (לקו"ה על פס' ה)

א לדָוִ֡ד, אֵלֶ֥יךָ ֜יְהֹוָ֗ה נַפְשִׁ֥י אֶשָּֽׂא:

ב אֱֽלֹהַ֗י בּךָ֣ ֖בָטַחְתִּי, אַל־אֵב֑וֹשָׁה, אַל־יַעַלְצ֖וּ אוֹיבַ֣י לִֽי:

ג גַּ֣ם כׇּל־֖קוֶֹיךָ לֹ֣א יֵבֹ֑שׁוּ, ֜יֵבֹ֗שׁוּ הַבּוֹגדִ֥ים רֵיקָֽם:

ד דּרָכֶ֣יךָ ֖יְהֹוָֽה הוֹדִיעֵ֑נִי, ֖אֹֽרחוֹתֶ֣יךָ לַמּדֵֽנִי:

ה הַדְרִ֘יכֵ֤נִי בַאֲמִתֶּ֨ךָ | וֽלַמּדֵ֗נִי, כִּֽי־֖אַתָּֽה אֱלֹהֵ֣י יִשְׁעִ֑י, אוֹתךָ֥ ֜קִוִּ֗יתִי כׇּל־הַיּֽוֹם:

ו זכֹר־רַחֲמֶ֣יךָ ֖יְהֹוָה וַחֲסָדֶ֑יךָ, כִּ֖י מֵעוֹלָ֣ם הֵֽמָּה:

ז חַטֹּ֤אות נעוּרַ֨י | וּפְשָׁעַ֗י אַל־תִּ֫זְכֹּ֥ר, כּחַסְדּךָ֥ זכׇר־לִי־אַ֑תָּה, למַ֖עַן טוּבךָ֣ יְהֹוָֽה:

ח טוֹב־ויָשָׁ֥ר יְהֹוָ֑ה, עַל־כֵּ֤ן יוֹרֶ֖ה חַטָּאִ֣ים בַּדָּֽרֶךְ:

ט יַדְרֵ֣ךְ ֖עֲנָוִים בַּמִּשְׁפָּ֑ט, וִילַמֵּ֖ד עֲנָוִ֣ים דַּרְכּֽוֹ:

י כׇּל־אׇרְח֣וֹת ֖יְהֹוָה חֶ֣סֶד וֶֽאֱמֶ֑ת, לנֹצרֵ֥י ֜ברִית֗וֹ ועֵדֹתָֽיו:

יא למַֽעַן־שִׁמְךָ֥ יְהֹוָ֑ה, וֽסָלַחְתָּ֥ ֜לַעֲוֹנִ֗י כִּ֣י רַב־הֽוּא:

יב מִי־זֶ֣ה ֖הָאִֽישׁ ירֵ֣א יְהֹוָ֑ה, ֜יוֹרֶ֗נּוּ בּדֶ֣רֶךְ יִבְחָֽר:

יג ֖נַפְשׁוֹ בּט֣וֹב תָּלִ֑ין, ֜וזַרְע֗וֹ יִ֣ירַשׁ אָֽרֶץ:

יד ס֣וֹד ֖יְהֹוָה לִירֵאָ֑יו, ֜וּבְרִית֗וֹ להוֹדִיעָֽם:

טו עֵינַ֣י ֖תָּמִיד אֶל־יְהֹוָ֑ה, כִּ֤י הֽוּא־יוֹצִ֖יא מֵרֶ֣שֶׁת רַגְלָֽי:

טז פּנֵה־אֵלַ֥י וחׇנֵּ֑נִי, כִּֽי־יָחִ֖יד ועָנִ֣י אָֽנִי:

יז צָר֣וֹת לבָבִ֣י הִרְחִ֑יבוּ, ֜מִמּצוּקוֹתַ֗י הוֹצִיאֵֽנִי:

יח ראֵ֣ה ֖עׇנְיִי וַעֲמָלִ֑י, ֜ושָׂ֗א לכׇל־חַטֹּאותָֽי:

יט ראֵֽה־אֹיבַ֥י כִּי־רָ֑בּוּ, ושִׂנְאַ֖ת חָמָ֣ס שׂנֵאֽוּנִי:

כ שׇׁמְרָ֣ה ֖נַפְשִׁי והַצִּילֵ֑נִי, אַל־֜אֵב֗וֹשׁ כִּֽי־חָסִ֥יתִי בָֽךְ:

כא תֹּם־וָיֹ֥שֶׁר יִצּר֑וּנִי, ֜כִּ֗י קִוִּיתִֽיךָ:

כב פּדֵ֣ה ֖אֱלֹהִים אֶת־יִשְׂרָאֵ֑ל, ֜מִכֹּ֗ל צָרוֹתָֽיו:

כְּשֶׁאָדָם זוֹכֵר אֶת ה' יִתְבָּרַךְ וְאֵינוֹ שׁוֹכֵחַ אוֹתוֹ אֲפִלּוּ שָׁעָה קַלָּה, נִמְצָא הוּא קָרוֹב לַה' יִתְבָּרַךְ תָּמִיד: (לקו"ה על פס' א)

א לדָוִ֨ד |, שׇׁפְטֵ֤נִי יְהֹוָ֗ה, כִּֽי־֖אֲנִי בּתֻמִּ֣י הָלַ֑כְתִּי, וּבַיהֹוָ֥ה ֜בָּטַ֗חְתִּי לֹ֣א אֶמְעָֽד:

ב בּחָנֵ֣נִי יְהֹוָ֣ה ונַסֵּ֑נִי, צׇרְפָ֖ה צרופה כִלְיוֹתַ֣י ולִבִּֽי:

ג כִּֽי־֖חַסְדּךָ לנֶ֣גֶד עֵינָ֑י, ֜והִתְהַלַּ֗כְתִּי בַּאֲמִתֶּֽךָ:

ד לֹֽא־֖יָשַׁבְתִּי עִם־מתֵי־שָׁ֑וְא, ועִ֥ם ֜נַעֲלָמִ֗ים לֹ֣א אָבֽוֹא:

ה ֖שָׂנֵאתִי קהַ֣ל מרֵעִ֑ים, ועִם־֜רשָׁעִ֗ים לֹ֣א אֵשֵֽׁב:

ו אֶרְחַ֣ץ בּנִקָּי֣וֹן כַּפָּ֑י, וַאֲסֹֽבבָ֖ה אֶת־מִזְבַּחֲךָ֣ יְהֹוָֽה:

ז ֖לַשְׁמִעַ בּק֣וֹל תּוֹדָ֑ה, ֜וּלְסַפֵּ֗ר כׇּל־נִפְלאוֹתֶֽיךָ:

ח יְֽהֹוָ֗ה, ֖אָהַבְתִּי מע֣וֹן בֵּיתֶ֑ךָ, ֜וּמְק֗וֹם מִשְׁכַּ֥ן כּבוֹדֶֽךָ:

ט אַל־תֶּֽאֱסֹ֣ף עִם־חַטָּאִ֣ים נַפְשִׁ֑י, ועִם־אַנְשֵׁ֖י דָמִ֣ים חַיָּֽי:

י אֲשֶׁר־בִּֽידֵיהֶ֥ם זִמָּ֑ה, ֜וִימִינָ֗ם מָ֣לאָה שֹּֽׁחַד:

יא ֖וַאֲנִי בּתֻמִּ֥י אֵלֵ֗ךְ, פּדֵ֣נִי וחׇנֵּֽנִי:

יב ֖רַגְלִי עָמדָ֣ה במִישׁ֑וֹר, ֜בּמַקְהֵלִ֗ים אֲבָרֵ֥ךְ יְהֹוָֽה:

אִם יִהְיֶה חָזָק וְאַמִּיץ בִּתְפִלּוֹת וּבַקָּשׁוֹת, בְּוַדַּאי סוֹף כָּל סוֹף יַעֲנֵהוּ ה' יִתְבָּרַךְ וִיקָרְבוֹ לַעֲבוֹדָתוֹ בֶּאֱמֶת בְּוַדַּאי בְּלִי סָפֵק, רַק חֲזַק וֶאֱמָץ: (לקו"מ על פס' יד)

א לדָוִ֨ד |, יְהֹוָ֤ה | אוֹרִ֣י ֖ויִשְׁעִֽי מִמִּ֣י אִירָ֑א, יְהֹוָ֥ה מָע֣וֹז ֜חַיַּ֗י מִמִּ֥י אֶפְחָֽד:

ב בִּקְרֹ֤ב עָלַ֨י | מרֵעִים֘ לֶֽאֱכֹ֪ל אֶת־בּשָׂ֫רִ֥י, צָרַ֣י ואֹיבַ֣י לִ֑י, הֵ֖מָּה כָשׁל֣וּ ונָפָֽלוּ:

ג אִם־תַּחֲנֶ֬ה עָלַ֨י | מַחֲנֶה֘ לֹֽא־יִירָ֪א לִ֫בִּ֥י, אִם־תָּק֣וּם ֖עָלַי מִלְחָמָ֑ה, ֜בּזֹ֗את אֲנִ֣י בוֹטֵֽחַ:

ד אַחַ֤ת שָׁאַ֣לְתִּי מֵֽאֵת־יְהֹוָה֘, אוֹתָ֪הּ אֲבַ֫קֵּ֥שׁ, שִׁבְתִּ֣י בּבֵית־֖יְהֹוָה כׇּל־ימֵ֣י חַיַּ֑י, לַחֲז֥וֹת בּנֽוֹעַם־֜יְהֹוָ֗ה וּלְבַקֵּ֥ר בּהֵיכָלֽוֹ:

ה כִּ֤י יִצְפּנֵ֨נִי | בּסֻכֹּה֘ בּי֪וֹם רָ֫עָ֥ה, ֖יַסְתִּרֵנִי בּסֵ֣תֶר אָֽהֳל֑וֹ, ֜בּצ֗וּר ירוֹממֵֽנִי:

ו ועַתָּ֨ה יָר֪וּם רֹאשִׁ֡י עַ֤ל אֹיבַ֬י סֽבִיבוֹתַ֗י, ואֶזְבּחָ֣ה ֖באָהֳלוֹ זִבְחֵ֣י תרוּעָ֑ה, אָשִׁ֥ירָה ֜וַאֲזַמּרָ֗ה לַיהֹוָֽה:

ז שׁמַע־֖יְהֹוָה קוֹלִ֥י אֶקְרָ֗א, וחׇנֵּ֥נִי וַעֲנֵֽנִי:

ח לךָ֤ | אָמַ֣ר ֖לִבִּי בַּקּשׁ֣וּ פָנָ֑י, אֶת־פָּנֶ֖יךָ יְהֹוָ֣ה אֲבַקֵּֽשׁ:

ט אַל־תַּסְתֵּ֬ר פָּנֶ֨יךָ | מִמֶּנִּי֘, אַֽל־תַּט־בּאַ֗ף עַ֫בְדֶּ֥ךָ, עֶזְרָתִ֥י הָיִ֑יתָ, אַל־תִּטּשֵׁ֥נִי ואַל־֜תַּעַזְבֵ֗נִי אֱלֹהֵ֥י יִשְׁעִֽי:

י כִּֽי־אָבִ֣י ואִמִּ֣י עֲזָב֑וּנִי, וַֽיהֹוָ֣ה יַאַסְפֵֽנִי:

יא ה֤וֹרֵ֥נִי יְהֹוָ֗ה דַּ֫רְכֶּ֥ךָ, ֖וּנְחֵנִי בּאֹ֣רַח מִישׁ֑וֹר, ֜למַ֗עַן שֽׁוֹררָֽי:

יב אַֽל־֖תִּתּנֵנִי בּנֶ֣פֶשׁ צָרָ֑י, כִּ֥י קָֽמוּ־בִ֥י עֵֽדֵי־֜שֶׁ֗קֶר, וִיפֵ֥חַ חָמָֽס:

יג ל֗֗וּ֗֗לֵ֗֗א֗֗ ֖הֶֽאֱמַנְתִּי לִרְא֥וֹת בּֽטוּב־֜יְהֹוָ֗ה בּאֶ֣רֶץ חַיִּֽים:

יד קַוֵּ֗ה אֶל־יְהֹ֫וָ֥ה, ֖חֲזַק ויַאֲמֵ֣ץ לִבֶּ֑ךָ, ֜וקַוֵּ֗ה אֶל־יְהֹוָֽה:

אֵין מָנוֹס מִכָּל מַה שֶּׁיָּכוֹל לַעֲבֹר עַל הָאָדָם, כִּי אִם לִתְלוֹת עֵינָיו לַמָּרוֹם וּלְהַקְדִּים תְּפִלָּה לְצָרָה: (לקו"ה על פס' א)

א לדָוִ֡ד, אֵ֘לֶ֤יךָ יְהֹוָ֨ה | אֶקְרָ֗א, צוּרִי֘ אַֽל־תֶּֽחֱרַ֪שׁ מִ֫מֶּ֥נִּי, פֶּן־תֶּחֱשֶׁ֥ה מִמֶּ֑נִּי, ֜ונִמְשַׁ֗לְתִּי עִם־י֥וֹרדֵי בֽוֹר:

ב שׁמַ֤ע ק֣וֹל ֖תַּחֲנוּנַי בּשַׁוּעִ֣י אֵלֶ֑יךָ, בּנׇשְׂאִ֥י ֜יָדַ֗י אֶל־דּבִ֥יר קׇדְשֶֽׁךָ:

ג אַל־תִּמְשׁכֵ֣נִי עִם־רשָׁעִים֘ ועִם־פֹּ֪עֲלֵ֫י אָ֥וֶן, דֹּברֵ֣י ֖שָׁלוֹם עִם־רֵֽעֵיהֶ֑ם, ֜ורָעָ֗ה בִּלְבָבָֽם:

ד תֶּן־לָהֶ֣ם כּפָעֳלָם֘ וּכְרֹ֪עַ מַעַלְלֵ֫יהֶ֥ם, כּמַעֲשֵׂ֣ה ֖ידֵיהֶם תֵּ֣ן לָהֶ֑ם, הָשֵׁ֖ב גּמוּלָ֣ם לָהֶֽם:

ה כִּ֤י לֹ֪א יָבִ֡ינוּ אֶל־פּעֻלֹּ֣ת ֖יְהֹוָה, ואֶל־מַעֲשֵׂ֣ה יָדָ֑יו, ֜יֶהֶרְסֵ֗ם ולֹ֣א יִבְנֵֽם:

ו בָּר֥וּךְ יְהֹוָ֑ה, כִּי־֜שָׁמַ֗ע ק֣וֹל תַּחֲנוּנָֽי:

ז יְהֹוָ֤ה | עֻזִּ֥י וּמָגִנִּי֘, בּ֤וֹ בָטַ֥ח לִבִּ֗י וֽנֶ֫עֱזָ֥רְתִּי, וַיַּעֲלֹ֥ז לִבִּ֑י, וּֽמִשִּׁירִ֥י אֲהוֹדֶֽנּוּ:

ח יְהֹוָ֥ה עֹז־לָ֑מוֹ, וּמָ֘ע֤וֹז ישׁוּע֖וֹת משִׁיח֣וֹ הֽוּא:

ט הוֹשִׁ֤יעָה | אֶת־עַמֶּ֗ךָ, וּבָרֵ֥ךְ אֶת־נַחֲלָתֶ֑ךָ, וּֽרְעֵ֥ם ֜ונַשּׂאֵ֗ם עַד־הָעוֹלָֽם:

עִקַּר שְׁלֵמוּת הַתְּפִלָּה הוּא לְהִתְפַּלֵּל בִּמְסִירוּת נֶפֶשׁ: (לקו"מ על פס' יא)

א מִזְמ֗וֹר לדָ֫וִ֥ד, הָב֣וּ ֖לַיהֹוָה בּנֵ֣י אֵלִ֑ים, הָב֥וּ ֜לַיהֹוָ֗ה כָּב֥וֹד וָעֹֽז:

ב הָב֣וּ ֖לַיהֹוָה כּב֣וֹד שׁמ֑וֹ, הִשְׁתַּחֲו֥וּ ֜לַיהֹוָ֗ה בּהַדְרַת־קֹֽדֶשׁ:

ג ק֥וֹל יְהֹוָ֗ה עַל־הַ֫מָּ֥יִם, אֵֽל־הַכָּב֥וֹד הִרְעִ֑ים, ֜יְהֹוָ֗ה עַל־מַ֥יִם רַבִּֽים:

ד קוֹל־יְהֹוָ֥ה בַּכֹּ֑חַ, ק֥וֹל ֜יְהֹוָ֗ה בֶּהָדָֽר:

ה ק֣וֹל ֖יְהֹוָה שֹׁבֵ֣ר אֲרָזִ֑ים, וַיְשַׁבֵּ֥ר ֜יְהֹוָ֗ה אֶת־אַרְזֵ֥י הַלּבָנֽוֹן:

ו וַיַּרְקִידֵ֥ם כּמוֹ־עֵ֑גֶל, לבָנ֥וֹן ֜ושִׂרְיֹ֗ן כּמ֣וֹ בֶן־ראֵמִֽים:

ז קוֹל־יְהֹוָ֥ה חֹצֵ֗ב לַהֲב֥וֹת אֵֽשׁ:

ח ק֣וֹל ֖יְהֹוָה יָחִ֣יל מִדְבָּ֑ר, יָחִ֥יל ֜יְהֹוָ֗ה מִדְבַּ֥ר קָדֵֽשׁ:

ט ק֤וֹל יְהֹוָ֨ה | יחוֹלֵ֣ל אַיָּלוֹת֘, וַֽיֶּחֱשֹׂ֪ף יעָ֫ר֥וֹת, וּבְהֵיכָל֑וֹ ֜כֻּלּ֗וֹ אֹמֵ֥ר כָּבֽוֹד:

י ֖יְהֹוָה לַמַּבּ֣וּל יָשָׁ֑ב, וַיֵּ֥שֶׁב ֜יְהֹוָ֗ה מֶ֣לֶךְ לעוֹלָֽם:

יא יְֽהֹוָ֗ה עֹ֖ז לעַמּ֣וֹ יִתֵּ֑ן, יְהֹוָ֓ה | יבָרֵ֖ךְ אֶת־עַמּ֣וֹ בַשָּׁלֽוֹם:

כָּל הַהִתְרַחֲקוּת הִיא כְּדֵי שֶׁיִּתָּלוּ עֵינָיו לַמָּרוֹם, כִּי ה' יִתְבָּרַךְ חָפֵץ וּמִתְאַוֶּה לִתְפִלַּת יִשְׂרָאֵל וְרוֹצֶה שֶׁיְּבַקְּשׁוּ וְיִתְפַּלְּלוּ לְפָנָיו יִתְבָּרַךְ בְּכָל פַּעַם עַל כָּל דָּבָר: (לקו"ה על המזמור)

א מִזְמ֡וֹר, שִׁיר־חֲנֻכַּ֖ת הַבַּ֣יִת לדָוִֽד:

ב אֲרוֹמִמְךָ֣ ֖יְהֹוָה כִּ֣י דִלִּיתָ֑נִי, ולֹֽא־שִׂמַּ֖חְתָּ אֹיבַ֣י לִֽי:

ג יְהֹוָ֥ה אֱלֹהָ֑י, שִׁוַּ֥עְתִּי ֜אֵלֶ֗יךָ וַתִּרְפָּאֵֽנִי:

ד יְֽהֹוָ֗ה הֶעֱלִ֣יתָ מִן־שׁא֣וֹל נַפְשִׁ֑י, ֜חִיִּיתַ֗נִי מיורדי מִֽיָּרְדִי־בֽוֹר:

ה זַמּר֣וּ לַיהֹוָ֣ה חֲסִידָ֑יו, ֜והוֹד֗וּ לזֵ֣כֶר קׇדְשֽׁוֹ:

ו כִּ֤י רֶ֨גַע | בּאַפּוֹ֘, חַיִּ֪ים בִּרְצ֫וֹנ֥וֹ, ֖בָּעֶֽרֶב יָלִ֥ין בֶּ֗כִי, ולַבֹּ֥קֶר רִנָּֽה:

ז ֖וַאֲנִי אָמַ֣רְתִּי בשַׁלְוִ֑י, בַּל־אֶמּ֥וֹט לעוֹלָֽם:

ח יְֽהֹוָ֗ה בִּֽרְצוֹנךָ֘ הֶעֱמַ֪דְתָּה לֽהַרְרִ֫י עֹ֥ז, הִסְתַּ֥רְתָּ פָ֜נֶ֗יךָ הָיִ֥יתִי נִבְהָֽל:

ט אֵלֶ֣יךָ יְהֹוָ֣ה אֶקְרָ֑א, ואֶל־֜אֲדֹנָ֗י אֶתְחַנָּֽן:

י מַה־בֶּ֥צַע בּדָמִי֘ בּרִדְתִּ֪י אֶ֫ל שָׁ֥חַת, הֲיוֹדךָ֥ עָפָ֑ר, הֲיַגִּ֥יד אֲמִתֶּֽךָ:

יא שׁמַע־יְהֹוָ֥ה וחׇנֵּ֑נִי, ֜יְהֹוָ֗ה הֱֽיֵה־עֹזֵ֥ר לִֽי:

יב הָפַ֣כְתָּ מִסְפּדִי֘ למָח֪וֹל לִ֥י, פִּתַּ֥חְתָּ שַׂקִּ֑י וַתּאַזּרֵ֥נִי שִׂמְחָֽה:

יג למַ֤עַן | יזַמֶּרְךָ֣ ֖כָבוֹד ולֹ֣א יִדֹּ֑ם, יְהֹוָ֥ה ֜אֱלֹהַ֗י לעוֹלָ֥ם אוֹדֶֽךָּ:

צָרִיךְ לְהִתְחַזֵּק וּלְהִתְאַמֵּץ לְיַחֵל וּלְקַוּוֹת לַה' יִתְבָּרַךְ בְּלִי לְרַפּוֹת וּלְרַשֵּׁל אֶת הָרָצוֹן הַטּוֹב לְעוֹלָם, וּבְוַדַּאי נִפְעֹל עַל יְדֵי זֶה הַרְבֵּה טוֹבוֹת אֲמִתִּיּוֹת וְנִצְחִיּוֹת: (לקו"ה על פס' כה)

א לַֽמְנַצֵּ֗חַ, מִזְמ֥וֹר לדָוִֽד:

ב בּךָ־יְהֹוָ֣ה ֖חָסִיתִי, אַל־אֵב֣וֹשָׁה לעוֹלָ֑ם, בּצִדְקָתךָ֥ פַלּטֵֽנִי:

ג הַטֵּ֤ה אֵלַ֨י | אׇזְנךָ֘ מהֵרָ֪ה הַצִּ֫ילֵ֥נִי, הֱיֵ֤ה לִ֨י | לֽצוּר־֖מָעוֹז, לבֵ֥ית מצוּד֗וֹת להוֹשִׁיעֵֽנִי:

ד כִּֽי־סַלְעִ֣י וּמְצוּדָתִ֣י אָ֑תָּה, וּלְמַ֥עַן ֜שִׁמְךָ֗ תַּנְחֵ֥נִי וּֽתְנַהֲלֵֽנִי:

ה תּוֹצִיאֵ֗נִי מֵרֶ֣שֶׁת ֖זוּ טָ֣מנוּ לִ֑י, כִּי־֜אַתָּ֗ה מָעֻזִּֽי:

ו בּיָדךָ֘ אַפְקִ֪יד ר֫וּחִ֥י, פָּדִ֖יתָה אוֹתִ֥י יְהֹוָ֗ה, אֵ֣ל אֱמֶֽת:

ז שָׂנֵ֗אתִי הַשֹּׁמרִ֥ים הַבְלֵי־שָׁ֑וְא, ֜וַאֲנִ֗י אֶל־יְהֹוָ֥ה בָּטָֽחְתִּי:

ח אָגִ֥ילָה ואֶשְׂמחָ֗ה בּחַ֫סְדֶּ֥ךָ, אֲשֶׁ֣ר ֖רָאִיתָ אֶת־עׇנְיִ֑י, ֜יָדַ֗עְתָּ בּצָר֥וֹת נַפְשִֽׁי:

ט ולֹ֣א ֖הִסְגַּרְתַּנִי בּיַד־אוֹיֵ֑ב, הֶֽעֱמַ֖דְתָּ בַמֶּרְחָ֣ב רַגְלָֽי:

י חׇנֵּ֥נִי יְהֹוָה֘ כִּ֪י צַ֫ר־לִ֥י, עָשׁשָׁ֖ה בכַ֥עַס עֵינִ֗י, נַפְשִׁ֥י וּבִטְנִֽי:

יא כִּ֤י כָל֪וּ ביָג֡וֹן חַיַּי֘, וּשְׁנוֹתַ֪י בַּאֲנָ֫חָ֥ה, כָּשַׁ֣ל בַּעֲוֹנִ֣י כֹחִ֑י, וַעֲצָמַ֥י עָשֵֽׁשׁוּ:

יב מִכׇּל־צֹררַ֨י הָיִ֪יתִי חֶרְפָּ֡ה, ולִֽשֲׁכֵנַ֨י | מאֹד֘, וּפַ֪חַד לִֽמְיֻדָּ֫עָ֥י, רֹאַ֥י בַּח֑וּץ נָדד֥וּ מִמֶּֽנִּי:

יג ֖נִשְׁכַּחְתִּי כּמֵ֣ת מִלֵּ֑ב, ֜הָיִ֗יתִי כִּכְלִ֥י אֹבֵֽד:

יד כִּ֤י שָׁמַ֨עְתִּי | דִּבַּ֥ת רַבִּים֘, מָג֪וֹר מִסָּ֫בִ֥יב, בּהִוָּסדָ֣ם יַ֣חַד עָלַ֑י, לָקַ֖חַת נַפְשִׁ֣י זָמָֽמוּ:

טו וַאֲנִ֤י | עָלֶ֣יךָ בָטַ֣חְתִּי יְהֹוָ֑ה, ֜אָמַ֗רְתִּי אֱלֹהַ֥י אָֽתָּה:

טז בּיָדךָ֥ עִתֹּתָ֑י, הַצִּ֘ילֵ֤נִי מִיַּד־֜אוֹיבַ֗י וּמֵרֹֽדפָי:

יז הָאִ֣ירָה ֖פָנֶיךָ עַל־עַבְדֶּ֑ךָ, ה֖וֹשִׁיעֵ֣נִי בחַסְדֶּֽךָ:

יח יְֽהֹוָ֗ה אַל־֖אֵבוֹשָׁה כִּ֣י קרָאתִ֑יךָ, יֵבֹ֥שׁוּ ֜רשָׁעִ֗ים, יִדּמ֥וּ לִשְׁאֽוֹל:

יט תֵּֽאָלַ֗מְנָה שִׂפְתֵ֫י שָׁ֥קֶר, הַדֹּֽבר֖וֹת עַל־צַדִּ֥יק עָתָ֗ק בּגַֽאֲוָ֥ה וָבֽוּז:

כ מָ֤ה רַֽב טוּבךָ֘ אֲשֶׁר־צָפַ֪נְתָּ לִּירֵ֫אֶ֥יךָ, ֖פָּעַלְתָּ לַחֹסִ֣ים בָּ֑ךְ, ֜נֶ֗גֶד בּנֵ֣י אָדָֽם:

כא תַּסְתִּירֵ֤ם | בּסֵ֥תֶר פָּנֶיךָ֘ מֵֽרֻכְסֵ֫י אִ֥ישׁ, תִּצְפּנֵ֥ם בּסֻכָּ֗ה מֵרִ֥יב לשֹׁנֽוֹת:

כב בָּר֥וּךְ יְהֹוָ֑ה, כִּֽי־הִפְלִ֘יא חַסְדּ֥וֹ ֜לִ֗י בּעִ֣יר מָצֽוֹר:

כג וַאֲנִ֤י | אָ֘מַ֤רְתִּי בחׇפְזִ֗י נִגְרַזְתִּי֘ מִנֶּ֪גֶד עֵ֫ינֶ֥יךָ, אָכֵ֗ן ֖שָׁמַעְתָּ ק֥וֹל תַּחֲנוּנַ֗י בּשַׁוּעִ֥י אֵלֶֽיךָ:

כד אֶֽהֱב֥וּ אֶת־יְהֹוָ֗ה כׇּל־חֲסִ֫ידָ֥יו, ֖אֱמוּנִים נֹצֵ֣ר יְהֹוָ֑ה, וּמְשַׁלֵּ֥ם עַל־֜יֶ֗תֶר עֹשֵׂ֥ה גַאֲוָֽה:

כה ֖חִזְקוּ ויַאֲמֵ֣ץ לבַבְכֶ֑ם, כׇּל־֜הַמְיַחֲלִ֗ים לַיהֹוָֽה:

צְרִיכִין לְהִתְחַזֵּק בִּתְפִלָּה וּבִשְׁאָגָה לַה' יִתְבָּרַךְ תָּמִיד, כְּדֵי לְהִנָּצֵל מִשֶּׁטֶף מַיִם רַבִּים הַשּׁוֹטְפִים בָּעוֹלָם הַזֶּה: (לקו"ה על פס' ג, ז)

א לדָוִ֗ד מַ֫שְׂכִּ֥יל, אַשְׁרֵ֥י נֽשׂוּי־פֶּ֗שַׁע, כּס֣וּי חֲטָאָֽה:

ב אַֽשֽׁרֵי־אָדָ֗ם לֹ֤א יַחְשֹׁ֬ב יְהֹוָ֣ה ל֣וֹ עָוֹ֑ן, ואֵ֖ין בּרוּח֣וֹ רמִיָּֽה:

ג כִּי־֖הֶחֱרַשְׁתִּי, בָּל֣וּ עֲצָמָ֑י, ֜בּשַׁאֲגָתִ֗י כׇּל־הַיּֽוֹם:

ד כִּ֤י | יוֹמָ֣ם וָלַֽיְלָה֘ תִּכְבַּ֥ד עָלַ֗י יָ֫דֶ֥ךָ, נֶהְפַּ֥ךְ לשַׁדִּ֑י בּחַרְבֹ֖נֵי קַ֣יִץ סֶֽלָה:

ה חַטָּאתִ֨י אוֹדִ֪יעֲךָ֡, וַֽעֲוֹ֘נִ֤י לֹֽא־כִסִּ֗יתִי, אָמַ֗רְתִּי אוֹדֶ֤ה עֲלֵ֣י ֖פשָׁעַי לַיהֹוָ֑ה, ואַתָּ֨ה נָ֘שָׂ֤אתָ עֲוֹ֖ן חַטָּאתִ֣י סֶֽלָה:

ו עַל־זֹ֡את יִתְפַּלֵּ֬ל כׇּל־חָסִ֨יד | אֵלֶיךָ֘ לעֵ֪ת מ֫צ֥וֹא, רַ֗ק ֖לשֵֽׁטֶף מַ֣יִם רַבִּ֑ים ֜אֵלָ֗יו לֹ֣א יַגִּֽיעוּ:

ז אַתָּ֤ה | סֵ֥תֶר לִי֘ [יַפְסִיק מְעַט], מִצַּ֪ר תִּ֫צּרֵ֥נִי, רׇנֵּ֥י פַלֵּ֑ט תּס֖וֹבבֵ֣נִי סֶֽלָה:

ח אַשְׂכִּֽילךָ֨ | וֽאוֹרךָ֗ בּדֶֽרֶךְ־ז֥וּ תֵלֵ֑ךְ, אִיעֲצָ֖ה עָלֶ֣יךָ עֵינִֽי:

ט אַל־תִּהְי֤וּ | כּס֥וּס כּפֶרֶד֘ אֵ֤ין הָ֫בִ֥ין, בּמֶֽתֶג־וָרֶ֣סֶן עֶדְי֣וֹ לִבְל֑וֹם, ֜בַּל קר֣וֹב אֵלֶֽיךָ:

י רַבִּ֥ים מַכְאוֹבִ֗ים לָֽרָ֫שָׁ֥ע, והַבּוֹטֵ֥חַ בַּיהֹוָ֑ה ֜חֶסֶד יסוֹבבֶֽנּוּ:

יא שִׂמְח֬וּ בַיהֹוָ֣ה ֖וגִילוּ צַדִּיקִ֑ים, ֜והַרְנִ֗ינוּ כׇּל־יִשְׁרֵי־לֵֽב:

עִקַּר יְסוֹד כָּל הַתּוֹרָה כֻּלָּהּ הוּא הָאֱמוּנָה, וְהוּא עִקַּר חַיּוּת וְקִיּוּם כָּל הָעוֹלָמוֹת כֻּלָּם: (לקו"ה על פס' ד)

א רַנּנ֣וּ ֖צַדִּיקִים בַּיהֹוָ֑ה, ֜לַיְשָׁרִ֗ים נָאוָ֥ה תהִלָּֽה:

ב הוֹד֣וּ לַיהֹוָ֣ה בּכִנּ֑וֹר, בּנֵ֥בֶל ֜עָשׂ֗וֹר זַמּרוּ־לֽוֹ:

ג שִֽׁירוּ־֖לוֹ שִׁ֣יר חָדָ֑שׁ, הֵיטִ֥יבוּ ֜נַגֵּ֗ן בִּתְרוּעָֽה:

ד כִּֽי־יָשָׁ֥ר דּבַר־יְהֹוָ֑ה, וכׇל־֜מַעֲשֵׂ֗הוּ בֶּאֱמוּנָֽה:

ה ֖אֹהֵֽב צדָקָ֣ה וּמִשְׁפָּ֑ט, חֶ֥סֶד ֜יְהֹוָ֗ה מָלאָ֥ה הָאָֽרֶץ:

ו בִּדְבַ֣ר ֖יְהֹוָה שָׁמַ֣יִם נַעֲשׂ֑וּ, וּבְר֥וּחַ ֜פִּ֗יו כׇּל־צבָאָֽם:

ז כֹּנֵ֣ס ֖כַּנֵּד מֵ֣י הַיָּ֑ם, נֹתֵ֖ן בּאוֹצָר֣וֹת תּהוֹמֽוֹת:

ח יִֽירא֣וּ ֖מֵיהֹוָה כׇּל־הָאָ֑רֶץ, מִמֶּ֥נּוּ ֜יָג֗וּרוּ כׇּל־יֹשׁבֵ֥י תֵבֵֽל:

ט כִּ֤י ה֣וּא אָמַ֣ר וַיֶּ֑הִי, הֽוּא־֜צִוָּ֗ה וַֽיַּעֲמֹֽד:

י יְֽהֹוָ֗ה הֵפִ֥יר עֲצַת־גּוֹיִ֑ם, ֜הֵנִ֗יא מַחְשׁב֥וֹת עַמִּֽים:

יא עֲצַ֣ת ֖יְהֹוָֽה לעוֹלָ֣ם תַּעֲמֹ֑ד, מַחְשׁבֹ֥ת ֜לִבּ֗וֹ לדֹ֣ר וָדֹֽר:

יב אַשְׁרֵ֣י ֖הַגּֽוֹי אֲשֶׁר־יְהֹוָ֣ה אֱלֹהָ֑יו, הָעָ֓ם | בָּחַ֖ר לנַחֲלָ֣ה לֽוֹ:

יג ֖מִשָּׁמַיִם הִבִּ֣יט יְהֹוָ֑ה, ֜רָאָ֗ה אֶֽת־כׇּל־בּנֵ֥י הָאָדָֽם:

יד מִֽמּכוֹן־שִׁבְתּ֥וֹ הִשְׁגִּ֑יחַ, אֶ֖ל כׇּל־יֹשׁבֵ֣י הָאָֽרֶץ:

טו הַיֹּצֵ֣ר יַ֣חַד לִבָּ֑ם, ֜הַמֵּבִ֗ין אֶל־כׇּל־מַעֲשֵׂיהֶֽם:

טז אֵֽין־֖הַמֶּלֶךְ נוֹשָׁ֣ע בּרׇב־חָ֑יִל, ֜גִּבּ֗וֹר לֹֽא־יִנָּצֵ֥ל בּרׇב־כֹּֽחַ:

יז שֶׁ֣קֶר ֖הַסּוּס לִתְשׁוּעָ֑ה, וּבְרֹ֥ב ֜חֵיל֗וֹ לֹ֣א ימַלֵּֽט:

יח הִנֵּ֤ה עֵ֣ין ֖יְהֹוָה אֶל־ירֵאָ֑יו, לַֽמיַחֲלִ֥ים לחַסְדּֽוֹ:

יט להַצִּ֣יל מִמָּ֣וֶת נַפְשָׁ֑ם, ֜וּלְחַיּוֹתָ֗ם בָּֽרָעָֽב:

כ ֖נַפְשֵׁנוּ חִכּתָ֣ה לַֽיהֹוָ֑ה, עֶזְרֵ֖נוּ וּמָגִנֵּ֣נוּ הֽוּא:

כא כִּי־֖בוֹ יִשְׂמַ֣ח לִבֵּ֑נוּ, כִּ֤י בשֵׁ֖ם קׇדְשׁ֣וֹ בָטָֽחְנוּ:

כב יהִֽי־חַסְדּךָ֣ יְהֹוָ֣ה עָלֵ֑ינוּ, ֜כַּאֲשֶׁ֗ר יִחַ֥לְנוּ לָֽךְ:

אִם יִתְחַזֵּק וְיִתְאַמֵּץ לִפְתֹּחַ פִּיו בְּעַל כָּרְחוֹ לְדַבֵּר תָּמִיד, בְּוַדַּאי יַעַזְרֵהוּ ה' יִתְבָּרַךְ וְיִפְתַּח פִּיו וְלִבּוֹ: (לקו"ה על פס' ב)

א לדָוִ֗ד, בּשַׁנּוֹת֣וֹ אֶת־֖טַעְמוֹ לִפְנֵ֣י אֲבִימֶ֑לֶךְ, ֜וַיְגָרשֵׁ֗הוּ וַיֵּלַֽךְ:

ב אֲבָרכָ֣ה אֶת־יְהֹוָ֣ה בּכׇל־עֵ֑ת, ֜תָּמִ֗יד תּֽהִלָּת֥וֹ בּפִֽי:

ג ֖בַּיהֹוָה תִּתְהַלֵּ֣ל נַפְשִׁ֑י, יִשְׁמע֖וּ עֲנָוִ֣ים ויִשְׂמָֽחוּ:

ד גַּדּל֣וּ לַֽיהֹוָ֣ה אִתִּ֑י, וּנְרוֹממָ֖ה שׁמ֣וֹ יַחְדָּֽו:

ה דָּרַ֣שְׁתִּי אֶת־יְהֹוָ֣ה ועָנָ֑נִי, וּמִכׇּל־֜מגוּרוֹתַ֗י הִצִּילָֽנִי:

ו הִבִּ֣יטוּ אֵלָ֣יו ונָהָ֑רוּ, ֜וּפְנֵיהֶ֗ם אַל־יֶחְפָּֽרוּ:

ז זֶ֤ה עָנִ֣י ֖קָרָא וַֽיהֹוָ֣ה שָׁמֵ֑עַ, וּמִכׇּל־֜צָרוֹתָ֗יו הוֹשִׁיעֽוֹ:

ח חֹנֶ֤ה מַלְאַךְ־יְהֹוָ֓ה סָ֘בִ֤יב לִֽירֵאָ֗יו, וַֽיְחַלּצֵֽם:

ט טַעֲמ֣וּ ֖וּרְאוּ כִּי־ט֣וֹב יְהֹוָ֑ה, אַֽשׁרֵ֥י ֜הַגֶּ֗בֶר יֶֽחֱסֶה־בּֽוֹ:

י יר֣אוּ אֶת־יְהֹוָ֣ה קדֹשָׁ֑יו, כִּי־אֵ֥ין ֜מַחְס֗וֹר לִירֵאָֽיו:

יא ֖כּפִירִים רָשׁ֣וּ ורָעֵ֑בוּ, ודֹרשֵׁ֥י ֜יְהֹוָ֗ה לֹא־יַחְסר֥וּ כׇל־טֽוֹב:

יב לֽכוּ־֖בָנִים שִׁמְעוּ־לִ֑י, יִרְאַ֥ת ֜יְהֹוָ֗ה אֲלַמֶּדְכֶֽם:

יג מִֽי־֖הָאִישׁ הֶחָפֵ֣ץ חַיִּ֑ים, אֹהֵ֥ב ֜יָמִ֗ים לִרְא֥וֹת טֽוֹב:

יד נצֹ֣ר לשׁוֹנךָ֣ מֵרָ֑ע, ֜וּשְׂפָתֶ֗יךָ מִדַּבֵּ֥ר מִרְמָֽה:

טו ס֣וּר ֖מֵרָע וַֽעֲשֵׂה־ט֑וֹב, בַּקֵּ֖שׁ שָׁל֣וֹם ורׇדְפֵֽהוּ:

טז עֵינֵ֣י ֖יְהֹוָה אֶל־צַדִּיקִ֑ים, ֜ואׇזְנָ֗יו אֶל־שַׁוְעָתָֽם:

יז פּנֵ֣י ֖יְהֹוָה בּעֹ֣שֵׂי רָ֑ע, להַכְרִ֖ית מֵאֶ֣רֶץ זִכְרָֽם:

יח ֖צָעֲקוּ וַיהֹוָ֣ה שָׁמֵ֑עַ, וּמִכׇּל־֜צָֽרוֹתָ֗ם הִצִּילָֽם:

יט קָר֣וֹב ֖יְהֹוָה לנִשְׁבּרֵי־לֵ֑ב, וֽאֶת־דַּכּאֵי־ר֥וּחַ יוֹשִֽׁיעַ:

כ ֖רַבּוֹת רָע֣וֹת צַדִּ֑יק, ֜וּמִכֻּלָ֗ם יַצִּילֶ֥נּוּ יְהֹוָֽה:

כא שֹׁמֵ֥ר כׇּל־עַצְמוֹתָ֑יו, אַחַ֥ת ֜מֵהֵ֗נָּה לֹ֣א נִשְׁבָּֽרָה:

כב תּמוֹתֵ֣ת רָשָׁ֣ע רָעָ֑ה, ושֹׂנאֵ֖י צַדִּ֣יק יֶאְשָֽׁמוּ:

כג פֹּדֶ֣ה ֖יְהֹוָה נֶ֣פֶשׁ עֲבָדָ֑יו, ולֹ֥א ֜יֶאְשׁמ֗וּ כׇּל־הַחֹסִ֥ים בּֽוֹ:

צָרִיךְ לְהִתְפַּלֵּל בְּכָל לִבּוֹ, עַד שֶׁיַּרְגִּישׁ דִּבּוּרֵי הַתְּפִלָּה בְּכָל עַצְמוֹתָיו: (לקו"ע על פס' י)

א לדָוִ֨ד |, רִיבָ֣ה ֖יְהֹוָה אֶת־ירִיבַ֑י, ֜לחַ֗ם אֶת־לֹחֲמָֽי:

ב הַחֲזֵ֣ק מָגֵ֣ן וצִנָּ֑ה, ֜וק֗וּמָה בּעֶזְרָתִֽי:

ג והָ֘רֵ֤ק חֲנִ֣ית ֖וּסְגֹר לִקְרַ֣את רֹדפָ֑י, אֱמֹ֥ר ֜לנַפְשִׁ֗י יֽשֻׁעָתֵ֥ךְ אָֽנִי:

ד יֵבֹ֣שׁוּ ויִכָּלמוּ֘ מבַקְשֵׁ֪י נַ֫פְשִׁ֥י, יִסֹּ֣גוּ אָח֣וֹר ויַחְפּר֑וּ ֜חֹֽשׁבֵ֗י רָעָתִֽי:

ה יִֽהְי֗וּ כּמֹ֥ץ לִפְנֵי־ר֑וּחַ, וּמַלְאַ֖ךְ יְהֹוָ֣ה דּוֹחֶֽה:

ו יֽהִי־דַרְכָּ֗ם חֹ֥שֶׁךְ וַחֲלַקְלַקֹּ֑ת, וּמַלְאַ֥ךְ ֜יְהֹוָ֗ה רֹדפָֽם:

ז כִּֽי־חִנָּ֣ם טָֽמנוּ־֖לִי שַׁ֣חַת רִשְׁתָּ֑ם, ֜חִנָּ֗ם חָפר֥וּ לנַפְשִֽׁי:

ח תּבוֹאֵ֣הוּ שׁוֹאָה֘ לֹֽא־יֵ֫דָ֥ע, ורִשְׁתּ֣וֹ אֲשֶׁר־טָמַ֣ן תִּלְכּד֑וֹ, ֜בּשׁוֹאָ֗ה יִפׇּל־בָּֽהּ:

ט ֖ונַפְשִֽׁי תָּגִ֣יל בַּיהֹוָ֑ה, ֜תָּשִׂ֗ישׂ בִּישׁוּעָתֽוֹ:

י כָּ֥ל עַצְמוֹתַ֨י | תֹּאמַרְנָה֘, יְהֹוָ֗ה מִ֥י כָ֫מ֥וֹךָ, מַצִּ֣יל ֖עָנִי מֵחָזָ֣ק מִמֶּ֑נּוּ, ועָנִ֥י ֜ואֶבְי֗וֹן מִגֹּזלֽוֹ:

יא ֖יקוּמוּן עֵדֵ֣י חָמָ֑ס, אֲשֶׁ֥ר לֹֽא־֜יָדַ֗עְתִּי יִשְׁאָלֽוּנִי:

יב ישַׁלּמ֣וּנִי ֖רָעָה תַּ֥חַת טוֹבָ֑ה, שׁכ֣וֹל לנַפְשִֽׁי:

יג וַאֲנִ֤י | בַּחֲלוֹתָ֡ם לב֬וּשִׁי שָׂ֗ק, עִנֵּ֣יתִי בַצּ֣וֹם נַפְשִׁ֑י, ֜וּתְפִלָּתִ֗י עַל־חֵיקִ֥י תָשֽׁוּב:

יד כּרֵֽעַ־כּאָ֣ח ֖לִי הִתְהַלָּ֑כְתִּי, כַּאֲבֶל־֜אֵ֗ם קֹדֵ֥ר שַׁחֽוֹתִי:

טו וּבְצַלְעִי֘ שָׂמח֪וּ וֽנֶ֫אֱסָ֥פוּ, נֶאֶסְפ֬וּ עָלַ֣י ֖נֵכִים ולֹ֣א יָדַ֑עְתִּי, קָרע֥וּ ולֹא־דָֽמּוּ:

טז ֖בּחַנְפֵי לַעֲגֵ֣י מָע֑וֹג, חָרֹ֖ק עָלַ֣י שִׁנֵּֽימוֹ:

יז אֲדֹנָי֘ כַּמָּ֪ה תִ֫רְאֶ֥ה, הָשִׁ֣יבָה ֖נַפְשִׁי מִשֹּׁאֵיהֶ֑ם, ֜מִכּפִירִ֗ים יחִידָתִֽי:

יח ֖אוֹדךָ בּקָהָ֣ל רָ֑ב, בּעַ֖ם עָצ֣וּם אֲהַללֶֽךָּ:

יט אַֽל־יִשְׂמחוּ־לִ֣י אֹיבַ֣י שֶׁ֑קֶר, שֹׂנאַ֥י ֜חִנָּ֗ם יִקְרצוּ־עָֽיִן:

כ כִּ֤י לֹ֥א שָׁל֗וֹם ידַ֫בֵּ֥רוּ, ועַ֥ל רִגְעֵי־אֶ֑רֶץ דִּבְרֵ֥י ֜מִרְמ֗וֹת יַחֲשֹׁבֽוּן:

כא וַיַּרְחִ֥יבוּ עָלַ֗י פִּ֫יהֶ֥ם, ֖אָמרוּ הֶאָ֣ח | הֶאָ֑ח רָאֲתָ֥ה עֵינֵֽנוּ:

כב רָאִ֣יתָה ֖יְהֹוָה אַֽל־תֶּחֱרַ֑שׁ, ֜אֲדֹנָ֗י אַל־תִּרְחַ֥ק מִמֶּֽנִּי:

כג הָעִ֣ירָה ֖והָקִיצָה למִשְׁפָּטִ֑י, אֱלֹהַ֖י וַאדֹנָ֣י לרִיבִֽי:

כד שׇׁפְטֵ֣נִי ֖כצִדְקךָ יְהֹוָ֥ה אֱלֹהָ֗י, ואַל־יִשְׂמחוּ־לִֽי:

כה אַל־יֹאמר֣וּ ֖בלִבָּֽם הֶאָ֣ח נַפְשֵׁ֑נוּ, אַל־֜יֹאמר֗וּ בִּֽלַּעֲנֽוּהוּ:

כו יֵ֘בֹ֤שׁוּ ויַחְפּר֨וּ | יַחְדָּו֘ שׂמֵחֵ֪י רָעָ֫תִ֥י, יִלְבּשׁוּ־בֹ֥שֶׁת וּכְלִמָּ֑ה הַמַּגְדִּילִ֥ים עָלָֽי:

כז יָרֹ֣נּוּ ויִשְׂמחוּ֘ חֲפֵצֵ֪י צִ֫דְקִ֥י, ויֹאמר֣וּ ֖תָמִיד יִגְדַּ֣ל יְהֹוָ֑ה ֜הֶחָפֵ֗ץ שׁל֣וֹם עַבְדּֽוֹ:

כח ֖וּלְשׁוֹנִי תֶּהְגֶּ֣ה צִדְקֶ֑ךָ, כׇּל־֜הַיּ֗וֹם תּהִלָּתֶֽךָ:

עִקַּר הַתְּפִלָּה הִיא עַל יְדֵי אֱמוּנָה, שֶׁמַּאֲמִין שֶׁהַכּל בִּרְשׁוּת הַקָּדוֹשׁ בָּרוּך הוּא אֲפִלּוּ לְשַׁנּוֹת הַטֶּבַע וְאֵין הַקָּדוֹשׁ בָּרוּך הוּא מְקַפֵּחַ שְׂכַר כָּל בְּרִיָּה, כִּי צַדִּיק ה': (לקו"ה על פס' יא)

א לַֽמְנַצֵּ֬חַ לעֶֽבֶד־יְהֹוָ֬ה לדָוִֽד:

ב נאֻ֥ם־פֶּ֣שַׁע ֖לָרָשָׁע בּקֶ֣רֶב לִבִּ֑י, אֵֽין־פַּ֥חַד ֜אֱלֹהִ֗ים לנֶ֣גֶד עֵינָֽיו:

ג כִּֽי־הֶחֱלִ֣יק אֵלָ֣יו בּעֵינָ֑יו, לִמְצֹ֖א עֲוֹנ֣וֹ לִשְׂנֹֽא:

ד דִּבְרֵי־֖פִיו אָ֣וֶן וּמִרְמָ֑ה, חָדַ֖ל להַשְׂכִּ֣יל להֵיטִֽיב:

ה אָ֤וֶן | יַחְשֹׁ֗ב עַל־מִשְׁכָּ֫ב֥וֹ, ֖יִתְיַצֵּב עַל־דֶּ֣רֶךְ לֹא־ט֑וֹב, ֜רָע לֹ֣א יִמְאָֽס:

ו ֖יְהֹוָה בּהַשָּׁמַ֣יִם חַסְדֶּ֑ךָ, ֜אֱמֽוּנָתךָ֗ עַד־שׁחָקִֽים:

ז צִדְקָתךָ֙ | כּֽהַרְרֵי־אֵ֗ל, ֖מִשְׁפָּטֶיךָ תּה֣וֹם רַבָּ֑ה, אָ֤דָ֥ם וּבְהֵמָ֖ה תוֹשִׁ֣יעַ יְהֹוָֽה:

ח מַה־יָּקָ֥ר חַסְדּךָ֗ אֱלֹ֫הִ֥ים, וּבְנֵ֥י אָדָ֑ם בּצֵ֥ל ֜כּנָפֶ֗יךָ יֶחֱסָיֽוּן:

ט ֖יִרְויֻן מִדֶּ֣שֶׁן בֵּיתֶ֑ךָ, ונַ֖חַל עֲדָנֶ֣יךָ תַשְׁקֵֽם:

י כִּֽי־֖עִמּךָ מק֣וֹר חַיִּ֑ים, ֜בּאוֹרךָ֗ נִרְאֶה־אֽוֹר:

יא משֹׁ֣ךְ ֖חַסְדּךָ ליֹדעֶ֑יךָ, ֜וצִדְקָתךָ֗ ליִשְׁרֵי־לֵֽב:

יב אַל־֖תּבוֹאֵנִי רֶ֣גֶל גַּאֲוָ֑ה, ויַד־֜רשָׁעִ֗ים אַל־תּנִדֵֽנִי:

יג שָׁ֣ם ֖נָפלוּ פֹּ֣עֲלֵי אָ֑וֶן, ֜דֹּח֗וּ ולֹא־יָ֥כלוּ קֽוּם:

צְּרִיכִין בִּטָּחוֹן גָּדוֹל וְעָצוּם מְאֹד בְּחַסְדּוֹ וְרַחֲמָיו הַמְרֻבִּים, שֶׁאֵינָם כָּלִים לְעוֹלָם: (על"ת על פס' ג)

א לדָוִ֨ד |, אַל־תִּתְחַ֥ר בַּמּרֵעִ֑ים, אַל־תּ֜קַנֵּ֗א בּעֹשֵׂ֥י עַוְלָֽה:

ב כִּ֣י ֖כֶחָצִיר מהֵרָ֣ה יִמָּ֑לוּ, וּכְיֶ֥רֶק ֜דֶּ֗שֶׁא יִבּוֹלֽוּן:

ג בּטַ֣ח ֖בַּֽיהֹוָה וַעֲשֵׂה־ט֑וֹב, שׁכׇן־֜אֶרֶץ וּרְעֵ֥ה אֱמוּנָֽה:

ד והִתְעַנַּ֥ג עַל־יְהֹוָ֑ה, ויִֽתֶּן־֜לךָ֗ מִשְׁאֲלֹ֥ת לִבֶּֽךָ:

ה גּ֣וֹל עַל־יְהֹוָ֣ה דַּרְכֶּ֑ךָ, וּבְטַ֥ח ֜עָלָ֗יו וה֣וּא יַעֲשֶֽׂה:

ו והוֹצִ֣יא כָא֣וֹר צִדְקֶ֑ךָ, ֜וּמִשְׁפָּטֶ֗ךָ כַּֽצָּהֳרָֽיִם:

ז דּ֤וֹם | לַיהֹוָה֘ והִתְח֪וֹלֵ֫ל ל֥וֹ, אַל־֖תִּתְחַר בּמַצְלִ֣יחַ דַּרְכּ֑וֹ, ֜בּאִ֗ישׁ עֹשֶׂ֥ה מזִמּֽוֹת:

ח הֶ֣רֶף ֖מֵאַף וַעֲזֹ֣ב חֵמָ֑ה, אַל־֜תִּתְחַ֗ר אַךְ־להָרֵֽעַ:

ט כִּֽי־֖מרֵעִים יִכָּֽרֵת֑וּן, וקֹוֵ֥י ֜יְהֹוָ֗ה הֵ֣מָּה יִֽירשׁוּ־אָֽרֶץ:

י וע֣וֹד ֖מעַט ואֵ֣ין רָשָׁ֑ע, והִתְבּוֹנַ֖נְתָּ עַל־מקוֹמ֣וֹ ואֵינֶֽנּוּ:

יא וַעֲנָוִ֥ים יִֽירשׁוּ־אָ֑רֶץ, ֜והִתְעַנּג֗וּ עַל־רֹ֥ב שָׁלֽוֹם:

יב זֹמֵ֣ם ֖רָשָֽׁע לַצַּדִּ֑יק, וחֹרֵ֖ק עָלָ֣יו שִׁנָּֽיו:

יג אֲדֹנָ֥י יִשְׂחַק־ל֑וֹ, כִּֽי־֜רָאָ֗ה כִּֽי־יָבֹ֥א יוֹמֽוֹ:

יד חֶ֤רֶב | פָּתח֣וּ רשָׁעִים֘ ודָרכ֪וּ קַ֫שְׁתָּ֥ם, ֖להַפִּיל עָנִ֣י ואֶבְי֑וֹן, ֜לִטְב֗וֹחַ יִשְׁרֵי־דָֽרֶךְ:

טו ֖חַרְבָּם תָּב֣וֹא בלִבָּ֑ם, ֜וקַשְׁתּוֹתָ֗ם תִּשָּׁבַֽרְנָה:

טז טוֹב־֖מעַט לַצַּדִּ֑יק, ֜מֵהֲמ֗וֹן רשָׁעִ֥ים רַבִּֽים:

יז כִּ֤י זרוֹע֣וֹת ֖רשָׁעִים תִּשָּׁבַ֑רְנָה, וסוֹמֵ֖ךְ צַדִּיקִ֣ים יְהֹוָֽה:

יח יוֹדֵ֣עַ ֖יְהֹוָה ימֵ֣י תמִימִ֑ם, ֜ונַחֲלָתָ֗ם לעוֹלָ֥ם תִּהְיֶֽה:

יט לֹֽא־֖יֵבֹשׁוּ בּעֵ֣ת רָעָ֑ה, וּבִימֵ֖י רעָב֣וֹן יִשְׂבָּֽעוּ:

כ כִּ֤י רשָׁעִ֨ים | יֹאבֵ֗דוּ, ואֹיבֵ֣י ֖יְהֹוָה כִּיקַ֣ר כָּרִ֑ים, כָּל֖וּ בֶעָשָׁ֣ן כָּֽלוּ:

כא לֹוֶ֣ה ֖רָשָׁע ולֹ֣א ישַׁלֵּ֑ם, ֜וצַדִּ֗יק חוֹנֵ֥ן ונוֹתֵֽן:

כב כִּ֣י ֖מבֹרָכָיו יִ֣ירשׁוּ אָ֑רֶץ, ֜וּמְקֻלָּלָ֗יו יִכָּרֵֽתוּ:

כג ֖מֵיְהֹוָה מִֽצְעֲדֵי־גֶ֥בֶר כּוֹנָ֗נוּ, ודַרְכּ֥וֹ יֶחְפָּֽץ:

כד כִּֽי־יִפֹּ֥ל לֹֽא־יוּטָּ֑ל, כִּֽי־֜יְהֹוָ֗ה סוֹמֵ֥ךְ יָדֽוֹ:

כה נַ֤עַר | הָיִ֗יתִי גַּם־זָ֫קַ֥נְתִּי, וֽלֹא־֖רָאִיתִי צַדִּ֣יק נֶֽעֱזָ֑ב, ֜וזַרְע֗וֹ מבַקֶּשׁ־לָֽחֶם:

כו כׇּל־֖הַיּוֹם חוֹנֵ֣ן וּמַלְוֶ֑ה, ֜וזַרְע֗וֹ לִבְרָכָֽה:

כז ס֣וּר ֖מֵרָע וַֽעֲשֵׂה־ט֗וֹב, וּשְׁכֹ֥ן לעוֹלָֽם:

כח כִּ֤י יְהֹוָ֨ה | אֹ֘הֵ֤ב מִשְׁפָּ֗ט, ולֹא־יַעֲזֹ֣ב אֶת־֖חֲסִידָיו, לעוֹלָ֣ם נִשְׁמָ֑רוּ, וזֶ֖רַע רשָׁעִ֣ים נִכְרָֽת:

כט צַדִּיקִ֥ים יִֽירשׁוּ־אָ֑רֶץ, ויִשְׁכּנ֖וּ לָעַ֣ד עָלֶֽיהָ:

ל פִּֽי־֖צַדִּיק יֶהְגֶּ֣ה חׇכְמָ֑ה, ֜וּלְשׁוֹנ֗וֹ תּדַבֵּ֥ר מִשְׁפָּֽט:

לא תּוֹרַ֣ת אֱלֹהָ֣יו בּלִבּ֑וֹ, לֹ֖א תִמְעַ֣ד אֲשֻׁרָֽיו:

לב צוֹפֶ֣ה ֖רָשָׁע לַצַּדִּ֑יק, ֜וּמְבַקֵּ֗שׁ לַֽהֲמִיתֽוֹ:

לג ֖יְהֹוָה לֹא־יַעַזְבֶ֣נּוּ ביָד֑וֹ, ולֹ֥א ֜יַרְשִׁיעֶ֗נּוּ בּהִשָּׁפטֽוֹ:

לד קַוֵּ֤ה אֶל־יְהֹוָ֨ה | וּשְׁמֹ֬ר דַּרְכּ֗וֹ, ֖וִֽירוֹמִמְךָ לָרֶ֣שֶׁת אָ֑רֶץ, בּהִכָּרֵ֖ת רשָׁעִ֣ים תִּרְאֶֽה:

לה ֖רָאִיתִי רָשָׁ֣ע עָרִ֑יץ, ֜וּמִתְעָרֶ֗ה כּאֶזְרָ֥ח רַעֲנָֽן:

לו ֖וַֽיַּעֲבֹר והִנֵּ֣ה אֵינֶ֑נּוּ, ֜וָאֲבַקְשֵׁ֗הוּ ולֹ֣א נִמְצָֽא:

לז שׁמׇר־֖תָּם וּרְאֵ֣ה יָשָׁ֑ר, כִּֽי־אַחֲרִ֖ית לאִ֣ישׁ שָׁלֽוֹם:

לח ֖וּפֹשׁעִים נִשְׁמד֣וּ יַחְדָּ֑ו, אַחֲרִ֖ית רשָׁעִ֣ים נִכְרָֽתָה:

לט וּתְשׁוּעַ֣ת ֖צַדִּיקִים מֵֽיְהֹוָ֑ה, ֜מָעוּזָּ֗ם בּעֵ֣ת צָרָֽה:

מ וַֽיַּעְזרֵ֥ם יְהֹוָ֗ה וַֽיְפַ֫לּטֵ֥ם, יפַלּטֵ֣ם ֖מֵרשָׁעִים ויוֹשִׁיעֵ֑ם, כִּי־חָ֥סוּ בֽוֹ:

צָרִיך לִצְעֹק לְאָבִיו שֶׁבַּשָּׁמַיִם בְּקוֹל חָזָק מֵעִמְקֵי הַלֵּב וַאֲזַי ה' יִתְבָּרַךְ שׁוֹמֵעַ קוֹלוֹ וּפוֹנֶה לְצַעֲקָתוֹ: (לקו"מ על פס' יא)

א מִזְמ֖וֹר, לדָוִ֣ד להַזְכִּֽיר:

ב יְֽהֹוָ֗ה אַל־בּקֶצְפּךָ֥ תוֹכִיחֵ֑נִי, וּֽבַחֲמָתךָ֥ תיַסּרֵֽנִי:

ג כִּֽי־֖חִצֶּיךָ נִ֣חֲתוּ בִ֑י, וַתִּנְחַ֖ת עָלַ֣י יָדֶֽךָ:

ד אֵֽין־מתֹ֣ם ֖בִּבְשָׂרִי מִפּנֵ֣י זַעְמֶ֑ךָ, אֵין־שָׁל֥וֹם ֜בַּעֲצָמַ֗י מִפּנֵ֥י חַטָּאתִֽי:

ה כִּ֣י ֖עֲוֹנֹתַי עָבר֣וּ רֹאשִׁ֑י, כּמַשָּׂ֥א ֜כָבֵ֗ד יִכְבּד֥וּ מִמֶּֽנִּי:

ו הִבְאִ֣ישׁוּ ֖נָמַקּוּ חַבּוּרֹתָ֑י, ֜מִפּנֵ֗י אִוַּלְתִּֽי:

ז נַעֲוֵ֣יתִי שַׁחֹ֣תִי עַד־מאֹ֑ד, כׇּל־֜הַיּ֗וֹם קֹדֵ֥ר הִלָּֽכְתִּי:

ח כִּֽי־֖כסָלַי מָלא֣וּ נִקְלֶ֑ה, ואֵ֥ין ֜מתֹ֗ם בִּבְשָׂרִֽי:

ט נפוּג֣וֹתִי ונִדְכֵּ֣יתִי עַד־מאֹ֑ד, ֜שָׁאַ֗גְתִּי מִֽנַּהֲמַ֥ת לִבִּֽי:

י אֲֽדֹ֗נָי, נֶגְדּךָ֥ כׇל־תַּֽאֲוָתִ֑י, ֜ואַנְחָתִ֗י מִמּךָ֥ לֹֽא־נִסְתָּֽרָה:

יא לִבִּ֣י ֖סחַרְחַר, עֲזָבַ֣נִי כֹחִ֑י, וֽאוֹר־עֵינַ֥י גַּם־֜הֵ֗ם אֵ֣ין אִתִּֽי:

יב אֹהֲבַ֨י | ורֵעַ֗י מִנֶּ֣גֶד נִגְעִ֣י יַעֲמֹ֑דוּ, ֜וּקְרוֹבַ֗י מֵרָחֹ֥ק עָמָֽדוּ:

יג וַיְנַקְשׁ֤וּ | מבַקְשֵׁ֬י נַפְשִׁ֗י, ודֹרשֵׁ֣י ֖רָעָתִי דִּבּר֣וּ הַוּ֑וֹת, ֜וּמִרְמ֗וֹת כׇּל־הַיּ֥וֹם יֶהְגּֽוּ:

יד וַאֲנִ֣י ֖כחֵרֵשׁ לֹ֣א אֶשְׁמָ֑ע, ֜וּכְאִלֵּ֗ם לֹ֣א יִפְתַּח־פִּֽיו:

טו וָאֱהִ֗י ֖כּאִישׁ אֲשֶׁ֣ר לֹֽא־שֹׁמֵ֑עַ, ואֵ֥ין ֜בּפִ֗יו תּוֹכָחֽוֹת:

טז כִּֽי־לךָ֣ יְהֹוָ֣ה הוֹחָ֑לְתִּי, אַתָּ֥ה ֜תַעֲנֶ֗ה אֲדֹנָ֥י אֱלֹהָֽי:

יז כִּֽי־֖אָמַרְתִּי פֶּן־יִשְׂמחוּ־לִ֑י, בּמ֥וֹט ֜רַגְלִ֗י עָלַ֥י הִגְדִּֽילוּ:

יח כִּֽי־֖אֲנִי לצֶ֣לַע נָכ֑וֹן, ֜וּמַכְאוֹבִ֖י נֶגְדִּ֥י תָמִֽיד:

יט כִּֽי־עֲוֹנִ֥י אַגִּ֑יד, ֜אֶדְאַ֗ג מֵֽחַטָּאתִֽי:

כ ֖וֽאֹיבַי חַיִּ֣ים עָצֵ֑מוּ, ורַבּ֖וּ שֹׂנאַ֣י שָֽׁקֶר:

כא וּמְשַׁלּמֵ֣י ֖רָעָה תַּ֣חַת טוֹבָ֑ה, ֜יִשְׂטנ֗וּנִי תַּ֣חַת רדופי רָֽדְפִי־טֽוֹב:

כב אַל־תַּעַזְבֵ֥נִי יְהֹוָ֑ה, ֜אֱלֹהַ֗י אַל־תִּרְחַ֥ק מִמֶּֽנִּי:

כג ח֥וּשָׁה לעֶזְרָתִ֑י, ֜אֲדֹנָ֗י תּשֽׁוּעָתִֽי:

כָּךְ הִיא הַדֶּרֶךְ הָאֱמֶת שֶׁל כָּל הָרוֹצֶה לָגֶשֶׁת אֶת הַקֹּדֶשׁ לְהִתְקָרֵב עַצְמוֹ לַה' יִתְבָּרַךְ, שֶׁהָעִקָּר לְהַרְבּוֹת בִּתְפִלָּה וְשִֹיחָה בֵּינוֹ לְבֵין קוֹנוֹ: (לקו"ה על פס' ג-ד)

א לַֽמְנַצֵּ֥חַ לִֽידוּת֗וּן לידיתון מִזְמ֥וֹר לדָוִֽד:

ב אָמַ֗רְתִּי אֶשְׁמרָ֣ה דרָכַי֘ מֵחֲט֪וֹא בִלְשׁ֫וֹנִ֥י, אֶשְׁמרָ֥ה לפִֽי מַחְס֑וֹם בּעֹ֖ד רָשָׁ֣ע לנֶגְדִּֽי:

ג נֶֽאֱלַ֣מְתִּי ֖דוּמִיָּה, הֶחֱשֵׁ֣יתִי מִטּ֑וֹב, וּכְאֵבִ֥י נֶעְכָּֽר:

ד חַם־לִבִּ֨י | בּקִרְבִּ֗י, בַּהֲגִיגִ֥י תִבְעַר־אֵ֑שׁ, ֜דִּבַּ֗רְתִּי בִּלְשׁוֹנִֽי:

ה הוֹדִ֘יעֵ֤נִי יְהֹוָ֨ה | קִצִּ֗י, וּמִדַּ֣ת יָמַ֣י מַה־הִ֑יא, ֜אֵדעָ֗ה מֶֽה־חָדֵ֥ל אָֽנִי:

ו הִנֵּ֤ה טפָח֨וֹת | נָ֘תַ֤תָּה יָמַ֗י, וחֶלְדִּ֣י כאַ֣יִן נֶגְדֶּ֑ךָ, אַ֥ךְ־כׇּל־הֶ֥בֶל כׇּל־אָ֜דָ֗ם, נִצָּ֥ב סֶֽלָה:

ז אַךְ־בּצֶ֤לֶם | יִֽתְהַלֶּךְ־אִ֗ישׁ, אַךְ־הֶ֥בֶל יֶהֱמָי֑וּן, ֜יִצְבֹּ֗ר וֽלֹא־יֵדַ֥ע מִי־אֹספָֽם:

ח ועַתָּ֣ה מַה־קִוִּ֣יתִי אֲדֹנָ֑י, ֜תּוֹחַלְתִּ֗י לךָ֣ הִֽיא:

ט מִכׇּל־פּשָׁעַ֥י הַצִּילֵ֑נִי, חֶרְפַּ֥ת ֜נָבָ֗ל אַל־תּשִׂימֵֽנִי:

י ֖נֶאֱלַמְתִּי לֹ֣א אֶפְתַּח־פִּ֑י, כִּ֖י אַתָּ֣ה עָשִֽׂיתָ:

יא הָסֵ֣ר מֵעָלַ֣י נִגְעֶ֑ךָ, מִתִּגְרַ֥ת ֜יָדךָ֗ אֲנִ֣י כָלִֽיתִי:

יב בּֽתוֹכָ֘ח֤וֹת עַל־עָוֹ֨ן | יִסַּ֬רְתָּ אִ֗ישׁ, וַתֶּ֣מֶס כָּעָ֣שׁ חֲמוּד֑וֹ, אַ֤ךְ הֶ֖בֶל כׇּל־אָדָ֣ם סֶֽלָה:

יג שִֽׁמעָ֖ה תפִלָּתִ֨י | יְהֹוָ֡ה ושַׁוְעָתִ֨י | הַאֲזִינָה֘, אֶֽל־דִּמְעָתִ֗י אַֽל־תֶּ֫חֱרַ֥שׁ, כִּ֤י גֵ֣ר אָֽנֹכִ֣י עִמָּ֑ךְ, ֜תּוֹשָׁ֗ב כּכׇל־אֲבוֹתָֽי:

יד הָשַׁ֣ע מִמֶּ֣נִּי ואַבְלִ֑יגָה, בּטֶ֖רֶם אֵלֵ֣ךְ ואֵינֶֽנִּי:

בְּכָל מַה שֶּׁעוֹבֵר עָלָיו אֵיךְ שֶׁהוּא אִם מִתְחַזֵּק עַצְמוֹ בָּרָצוֹן, בְּוַדַּאי יְרַחֵם עָלָיו ה' יִתְבָּרַךְ וְיוֹרֵהוּ הַדֶּרֶךְ הָאֱמֶת: (לקו"ה על פס' ח-ט)

א ֜לַֽמְנַצֵּ֗חַ, לדָוִ֥ד מִזְמֽוֹר:

ב קַוֹּ֣ה קִוִּ֣יתִי יְהֹוָ֑ה, וַיֵּ֥ט ֜אֵלַ֗י וַיִּשְׁמַ֥ע שַׁוְעָתִֽי:

ג וַיַּעֲלֵ֤נִי | מִבּ֥וֹר שָׁאוֹן֘, מִטִּ֪יט הַיָּ֫וֵ֥ן, וַיָּ֖קֶם עַל־סֶ֥לַע רַגְלַ֗י, כּוֹנֵ֥ן אֲשֻׁרָֽי:

ד וַיִּתֵּ֬ן בּפִ֨י | שִׁ֥יר חָדָשׁ֘, תּהִלָּ֪ה לֵֽאלֹ֫הֵ֥ינוּ, יִרְא֣וּ רַבִּ֣ים ויִירָ֑אוּ, ֜ויִבְטח֗וּ בַּיהֹוָֽה:

ה אַֽשֽׁרֵי־הַגֶּ֗בֶר אֲשֶׁר־שָׂ֣ם ֖יְהֹוָה מִבְטַח֑וֹ, ולֹא־פָנָ֥ה אֶל־ר֜הָבִ֗ים ושָׂטֵ֥י כָזָֽב:

ו רַבּ֤וֹת עָשִׂ֨יתָ | אַתָּ֤ה | יְהֹוָ֣ה אֱלֹהַי֘, נִֽפְלאֹתֶ֥יךָ וּמַחְשׁבֹתֶ֗יךָ אֵ֫לֵ֥ינוּ, אֵ֤ין | עֲרֹ֬ךְ אֵלֶ֗יךָ, אַגִּ֥ידָה וַאֲדַבֵּ֑רָה ֜עָצמ֗וּ מִסַּפֵּֽר:

ז זֶ֤בַח וּמִנְחָ֨ה | לֹֽא־חָפַ֗צְתָּ, ֖אׇזְנַיִם כָּרִ֣יתָ לִּ֑י, עוֹלָ֥ה ֜וַחֲטָאָ֗ה לֹ֣א שָׁאָֽלְתָּ:

ח אָ֣ז ֖אָמַרְתִּי הִנֵּה־בָ֑אתִי, בִּמְגִלַּת־֜סֵ֗פֶר כָּת֥וּב עָלָֽי:

ט לַֽעֲשׂ֥וֹת־רצוֹנךָ֣ אֱלֹהַ֣י חָפָ֑צְתִּי, ֜ותֽוֹרָתךָ֗ בּת֣וֹךְ מֵעָֽי:

י בִּשַּׂ֤רְתִּי צֶ֨דֶק | בּקָ֘הָ֤ל רָ֗ב, הִנֵּ֣ה ֖שׂפָתַי לֹ֣א אֶכְלָ֑א, ֜יְהֹוָ֗ה אַתָּ֥ה יָדָֽעְתָּ:

יא צִדְקָתךָ֬ לֹֽא־כִסִּ֨יתִי | בּת֬וֹךְ לִבִּ֗י, אֱמוּנָתךָ֣ וּתְשׁוּעָתךָ֣ אָמָ֑רְתִּי, לֹא־כִחַ֥דְתִּי חַסְדּךָ֥ ֜וַאֲמִתּךָ֗ לקָהָ֥ל רָֽב:

יב אַתָּ֤ה יְהֹוָ֗ה, לֹֽא־תִכְלָ֣א רַחֲמֶ֣יךָ מִמֶּ֑נִּי, חַסְדּךָ֥ ֜וַאֲמִתּךָ֗ תָּמִ֥יד יִצּרֽוּנִי:

יג כִּ֤י אָפפֽוּ־עָלַ֨י | רָע֡וֹת עַד־אֵ֬ין מִסְפָּ֗ר, הִשִּׂיג֣וּנִי ֖עֲוֹנֹתַי ולֹא־יָכֹ֣לְתִּי לִרְא֑וֹת, עָצמ֥וּ מִשַּׂעֲר֥וֹת ֜רֹאשִׁ֗י ולִבִּ֥י עֲזָבָֽנִי:

יד רצֵ֣ה ֖יְהֹוָה להַצִּילֵ֑נִי, ֜יְהֹוָ֗ה לעֶזְרָ֥תִי חֽוּשָׁה:

טו יֵ֘בֹ֤שׁוּ ויַחְפּר֨וּ | יַֽחַד֘ מבַקְשֵׁ֥י נַפְשִׁ֗י לִסְפּ֫וֹתָ֥הּ, יִסֹּ֣גוּ ֖אָחוֹר ויִכָּלמ֑וּ ֜חֲפֵצֵ֗י רָעָתִֽי:

טז ֖יָשֹׁמּוּ עַל־עֵ֣קֶב בׇּשְׁתָּ֑ם, הָאֹמרִ֥ים ֜לִ֗י הֶ֘אָ֥ח | הֶאָֽח:

יז יָ֘שִׂ֤ישׂוּ ויִשְׂמח֨וּ | בּךָ֗ כׇּֽל־מבַ֫קְשֶׁ֥יךָ, יֹאמר֣וּ ֖תָמִיד יִגְדַּ֣ל יְהֹוָ֑ה, ֜אֹהֲבֵ֗י תּשׁוּעָתֶֽךָ:

יח וַאֲנִ֤י | עָנִ֣י ואֶבְיוֹן֘, אֲדֹנָ֪י יַחֲשׇׁ֫ב־לִ֥י, עֶזְרָתִ֣י וּמְפַלְטִ֣י אַ֑תָּה, ֜אֱלֹהַ֗י אַל־תּאַחַֽר:

עִקַּר הָרַחֲמָנוּת לְהָאִיר הַדַּעַת הָאֲמִתִּי עַל נַפְשׁוֹ, לָדַעַת בִּלְבָבוֹ הֵיטֵב בְּכָל יוֹם כִּי ה' הוּא הָאֱלֹֹקִים: (על"ת על פס' ב)

א לַֽמְנַצֵּ֗חַ, מִזְמ֥וֹר לדָוִֽד:

ב ֖אַשְׁרֵי מַשְׂכִּ֣יל אֶל־דָּ֑ל, בּי֥וֹם ֜רָעָ֗ה יֽמַלּטֵ֥הוּ יְהֹוָֽה:

ג יְהֹוָ֤ה | יִשְׁמרֵ֣הוּ ֖וִֽיחַיֵּֽהוּ וְאֻשַּׁ֣ר יאשר בָּאָ֑רֶץ, ואַֽל־֜תִּתּנֵ֗הוּ בּנֶ֣פֶשׁ אֹיבָֽיו:

ד יְֽהֹוָ֗ה ֖יִסְעָדֶנּוּ עַל־עֶ֣רֶשׂ דּוָ֑י, כׇּל־֜מִשְׁכָּב֗וֹ הָפַ֥כְתָּ בחׇלְיֽוֹ:

ה אֲֽנִי־֖אָמַרְתִּי יְהֹוָ֣ה חׇנֵּ֑נִי, רפָאָ֥ה ֜נַפְשִׁ֗י כִּֽי־חָטָ֥אתִי לָֽךְ:

ו אוֹיבַ֗י יֹאמר֣וּ רַ֣ע לִ֑י, מָתַ֥י ֜יָמ֗וּת ואָבַ֥ד שׁמֽוֹ:

ז ואִם־בָּ֤א לִרְא֨וֹת |, שָׁ֤וְא ידַבֵּ֗ר, לִבּ֗וֹ יִקְבׇּץ־אָ֥וֶן ל֑וֹ, יֵצֵ֖א לַח֣וּץ ידַבֵּֽר:

ח יַ֗חַד עָלַ֣י ֖יִֽתְלַחֲשׁוּ כׇּל־שֹׂנאָ֑י, עָלַ֓י | יַחְשׁב֖וּ רָעָ֣ה לִֽי:

ט דּֽבַר־֖בּלִיַּעַל יָצ֣וּק בּ֑וֹ, וַאֲשֶׁ֥ר ֜שָׁכַ֗ב לֹֽא־יוֹסִ֥יף לָקֽוּם:

י גַּם־אִ֤ישׁ שׁלוֹמִ֨י | אֲשֶׁר־בָּטַ֣חְתִּי ֖בוֹ אוֹכֵ֣ל לַחְמִ֑י, הִגְדִּ֖יל עָלַ֣י עָקֵֽב:

יא ואַתָּ֤ה יְהֹוָ֗ה, חׇנֵּ֥נִי וַהֲקִימֵ֑נִי, וַאֲשַׁלּמָ֥ה לָהֶֽם:

יב בּזֹ֣את ֖יָדַעְתִּי כִּֽי־חָפַ֣צְתָּ בִּ֑י, כִּ֤י לֹֽא־יָרִ֖יעַ אֹיבִ֣י עָלָֽי:

יג וַאֲנִ֗י ֖בּתֻמִּי תָּמַ֣כְתָּ בִּ֑י, וַתַּצִּיבֵ֖נִי לפָנֶ֣יךָ לעוֹלָֽם:

יד בָּ֘ר֤וּךְ יְהֹוָ֨ה | אֱלֹ֘הֵ֤י יִשְׂרָאֵ֗ל, ֖מֵהָעוֹלָם ועַד־֜הָעוֹלָ֗ם, אָ֘מֵ֥ן | ואָמֵֽן: