סֵפֶר חֲמִישִׁי

לִצְעֹק בְּכָל פַּעַם לַה' וּלְהוֹדוֹת לוֹ יִתְבָּרַךְ עַל חֲסָדָיו וְנִפְלְאוֹתָיו שֶׁעוֹשֶׂה עִמָּנוּ בְּכָל עֵת בְּתוֹךְ עֹמֶק מְרִירוּת הַצָּרוֹת, וְכֵן לִצְעֹק וְלַחֲזֹר וְלִצְעֹק: (לקו"ה על המזמור)

א הֹד֣וּ לַיהֹוָ֣ה כִּי־ט֑וֹב, כִּ֖י לְעוֹלָ֣ם חַסְדּֽוֹ:

ב ֖יֹֽאמְרוּ גְּאוּלֵ֣י יְהֹוָ֑ה, אֲשֶׁ֥ר ֜גְּאָלָ֗ם מִיַּד־צָֽר:

ג וּֽמֵאֲרָצ֗וֹת קִ֫בְּצָ֥ם, מִמִּזְרָ֥ח וּמִֽמַּעֲרָ֑ב מִצָּפ֥וֹן וּמִיָּֽם:

ד תָּע֣וּ ֖בַמִּדְבָּר בִּישִׁימ֣וֹן דָּ֑רֶךְ, עִ֥יר ֜מוֹשָׁ֗ב לֹ֣א מָצָֽאוּ:

ה רְעֵבִ֥ים גַּם־צְמֵאִ֑ים, ֜נַפְשָׁ֗ם בָּהֶ֥ם תִּתְעַטָּֽף:

ו וַיִּצְעֲק֣וּ אֶל־֖יְהֹוָה בַּצַּ֣ר לָהֶ֑ם, ֜מִמְּצֽוּקוֹתֵיהֶ֗ם יַצִּילֵֽם:

ז ֖וַֽיַּדְרִיכֵם בְּדֶ֣רֶךְ יְשָׁרָ֑ה, ֜לָלֶ֗כֶת אֶל־עִ֥יר מוֹשָֽׁב:

ח יוֹד֣וּ לַֽיהֹוָ֣ה חַסְדּ֑וֹ, ֜וְנִפְלְאוֹתָ֗יו לִבְנֵ֥י אָדָֽם:

ט כִּֽי־֖הִשְׂבִּיעַ נֶ֣פֶשׁ שֹׁקֵקָ֑ה, וְנֶ֥פֶשׁ ֜רְעֵבָ֗ה מִלֵּא־טֽוֹב:

י ֖יֹשְׁבֵי חֹ֣שֶׁךְ וְצַלְמָ֑וֶת, אֲסִירֵ֖י עֳנִ֣י וּבַרְזֶֽל:

יא כִּֽי־הִמְר֥וּ אִמְרֵי־אֵ֑ל, וַעֲצַ֖ת עֶלְי֣וֹן נָאָֽצוּ:

יב וַיַּכְנַ֣ע בֶּעָמָ֣ל לִבָּ֑ם, ֜כָּשְׁל֗וּ וְאֵ֣ין עֹזֵֽר:

יג וַיִּזְעֲק֣וּ אֶל־֖יְהֹוָה בַּצַּ֣ר לָהֶ֑ם, ֜מִמְּצֽוּקֽוֹתֵיהֶ֗ם יוֹשִׁיעֵֽם:

יד ֖יוֹצִיאֵם מֵחֹ֣שֶׁךְ וְצַלְמָ֑וֶת, וּמוֹסְר֖וֹתֵיהֶ֣ם יְנַתֵּֽק:

טו יוֹד֣וּ לַיהֹוָ֣ה חַסְדּ֑וֹ, ֜וְנִפְלְאוֹתָ֗יו לִבְנֵ֥י אָדָֽם:

טז כִּֽי־֖שִׁבַּר דַּלְת֣וֹת נְחֹ֑שֶׁת, וּבְרִיחֵ֖י בַרְזֶ֣ל גִּדֵּֽעַ:

יז ֖אֱוִלִים מִדֶּ֣רֶךְ פִּשְׁעָ֑ם, ֜וּמֵעֲוֹֽנֹתֵיהֶ֗ם יִתְעַנּֽוּ:

יח כׇּל־֖אֹכֶל תְּתַעֵ֣ב נַפְשָׁ֑ם, ֜וַיַּגִּ֗יעוּ עַד־שַׁ֥עֲרֵי מָֽוֶת:

יט וַיִּזְעֲק֣וּ אֶל־֖יְהֹוָה בַּצַּ֣ר לָהֶ֑ם, ֜מִמְּצֻֽקוֹתֵיהֶ֗ם יוֹשִׁיעֵֽם:

כ יִשְׁלַ֣ח ֖דְּבָרֽוֹ וְיִרְפָּאֵ֑ם, ֜וִימַלֵּ֗ט מִשְּׁחִיתוֹתָֽם:

כא יוֹד֣וּ לַיהֹוָ֣ה חַסְדּ֑וֹ, ֜וְנִפְלְאוֹתָ֗יו לִבְנֵ֥י אָדָֽם:

כב ֖וְיִזְבְּחוּ זִבְחֵ֣י תוֹדָ֑ה, וִיסַפְּר֖וּ מַעֲשָׂ֣יו בְּרִנָּֽה: ׆

כג יוֹרְדֵ֣י ֖הַיָּֽם בָּֽאֳנִיּ֑וֹת, עֹשֵׂ֥י ֜מְלָאכָ֗ה בְּמַ֣יִם רַבִּֽים: ׆

כד הֵ֣מָּה ֖רָאוּ מַעֲשֵׂ֣י יְהֹוָ֑ה, ֜וְנִפְלְאוֹתָ֗יו בִּמְצוּלָֽה: ׆

כה וַיֹּ֗אמֶר ֖וַֽיַּעֲמֵד ר֣וּחַ סְעָרָ֑ה, וַתְּרוֹמֵ֥ם גַּלָּֽיו: ׆

כו יַעֲל֣וּ ֖שָׁמַיִם יֵֽרְד֣וּ תְהוֹמ֑וֹת, ֜נַפְשָׁ֗ם בְּרָעָ֥ה תִתְמוֹגָֽג: ׆

כז יָח֣וֹגּוּ ֖וְיָנוּעוּ כַּשִּׁכּ֑וֹר, וְכׇל־֜חׇכְמָתָ֗ם תִּתְבַּלָּֽע: ׆

כח וַיִּצְעֲק֣וּ אֶל־֖יְהֹוָה בַּצַּ֣ר לָהֶ֑ם, ֜וּמִמְּצֽוּקֹתֵיהֶ֗ם יוֹצִיאֵֽם:

כט יָקֵ֣ם ֖סְעָרָה לִדְמָמָ֑ה, ֜וַיֶּחֱשׁ֗וּ גַּלֵּיהֶֽם:

ל וַיִּשְׂמְח֥וּ כִי־יִשְׁתֹּ֑קוּ, ֜וַיַּנְחֵ֗ם אֶל־מְח֥וֹז חֶפְצָֽם:

לא יוֹד֣וּ לַֽיהֹוָ֣ה חַסְדּ֑וֹ, ֜וְנִפְלְאוֹתָ֗יו לִבְנֵ֥י אָדָֽם:

לב ֖וִירוֹמְמוּהוּ בִּקְהַל־עָ֑ם, וּבְמוֹשַׁ֖ב זְקֵנִ֣ים יְהַלְלֽוּהוּ:

לג יָשֵׂ֣ם נְהָר֣וֹת לְמִדְבָּ֑ר, וּמֹצָ֥אֵי ֜מַיִם לְצִמָּאֽוֹן:

לד אֶ֣רֶץ ֖פְּרִי לִמְלֵחָ֑ה, ֜מֵרָעַ֗ת יֹ֣שְׁבֵי בָֽהּ:

לה יָשֵׂ֣ם ֖מִדְבָּֽר לַֽאֲגַם־מַ֑יִם, וְאֶ֥רֶץ ֜צִיָּ֗ה לְמֹצָ֥אֵי מָֽיִם:

לו וַיּ֣וֹשֶׁב שָׁ֣ם רְעֵבִ֑ים, ֜וַיְכוֹנְנ֗וּ עִ֣יר מוֹשָֽׁב:

לז וַיִּזְרְע֣וּ ֖שָׂדוֹת וַיִּטְּע֣וּ כְרָמִ֑ים, ֜וַיַּעֲשׂ֗וּ פְּרִ֣י תְבֽוּאָה:

לח וַיְבָרכֵ֣ם וַיִּרְבּ֣וּ מְאֹ֑ד, ֜וּבְהֶמְתָּ֗ם לֹ֣א יַמְעִֽיט:

לט וַיִּמְעֲט֥וּ וַיָּשֹׁ֑חוּ, מֵעֹ֖צֶר רָעָ֣ה וְיָגֽוֹן: ׆

מ שֹׁפֵ֣ךְ ֖בּוּז עַל־נְדִיבִ֑ים, ֜וַיַּתְעֵ֗ם בְּתֹ֣הוּ לֹא־דָֽרֶךְ:

מא וַיְשַׂגֵּ֣ב אֶבְי֣וֹן מֵע֑וֹנִי, וַיָּ֥שֶׂם ֜כַּצֹּ֗אן מִשְׁפָּחֽוֹת:

מב יִרְא֣וּ יְשָׁרִ֣ים וְיִשְׂמָ֑חוּ, וְכׇל־֜עַוְלָ֗ה קָ֣פְצָה פִּֽיהָ:

מג מִֽי־חָכָ֥ם וְיִשְׁמׇר־אֵ֑לֶּה, ֜וְיִתְבּֽוֹנְנ֗וּ חַֽסְדֵ֥י יְהֹוָֽה:

יַזְכִּיר אֶת עַצְמוֹ רִבּוּי הַטּוֹבוֹת וְהַחֲסָדִים שֶׁעָשָׂה ה' יִתְבָּרַךְ עִמּוֹ מֵעוֹדוֹ עַד הַיּוֹם הַזֶּה, וְעַל יְדֵי זֶה יִתְחַזֵּק לְבָבוֹ לִבְטֹחַ בַּה' שֶׁיִּשְׁמַע תְּפִלָּתוֹ גַּם עַתָּה: (לקו"ה על פס' יא)

א שִׁ֖יר מִזְמ֣וֹר לְדָוִֽד:

ב נָכ֣וֹן לִבִּ֣י אֱלֹהִ֑ים, אָשִׁ֥ירָה ֜וַאֲזַמְּרָ֗ה, אַף־כְּבוֹדִֽי:

ג ֖עוּרָֽה הַנֵּ֥בֶל וְכִנּ֗וֹר, אָעִ֥ירָה שָּֽׁחַר:

ד אֽוֹדְךָ֖ בָעַמִּ֥ים | יְהֹוָ֑ה, ֜וַאֲזַמֶּרְךָ֗ בַּלְאֻמִּֽים:

ה כִּי־גָד֣וֹל מֵעַל־שָׁמַ֣יִם חַסְדֶּ֑ךָ, וְֽעַד־שְׁחָקִ֥ים אֲמִתֶּֽךָ:

ו ר֣וּמָה עַל־שָׁמַ֣יִם אֱלֹהִ֑ים, וְעַ֖ל כׇּל־הָאָ֣רֶץ כְּבוֹדֶֽךָ:

ז ֖לְמַעַן יֵחָלְצ֣וּן יְדִידֶ֑יךָ, הוֹשִׁ֖יעָה יְמִינְךָ֣ וַעֲנֵֽנִי:

ח אֱלֹהִ֤ים | דִּבֶּ֥ר בְּקׇדְשׁ֗וֹ, אֶֽ֫עְלֹ֥זָה, אֲחַלְּקָ֥ה שְׁכֶ֑ם, וְעֵ֖מֶק סֻכּ֣וֹת אֲמַדֵּֽד:

ט לִ֤י גִלְעָ֨ד | לִִ֤י מְנַשֶּׁ֗ה, ֖וְאֶפְרַיִם מָע֣וֹז רֹאשִׁ֑י, ֜יְהוּדָ֗ה מְחֹקְקִֽי:

י מוֹאָ֤ב | סִ֬יר רַחְצִ֗י, עַל־֖אֱדוֹם אַשְׁלִ֣יךְ נַֽעֲלִ֑י, עֲלֵי־֜פְלֶ֗שֶׁת אֶתְרוֹעָֽע:

יא מִ֣י ֖יוֹבִילֵנִי עִ֣יר מִבְצָ֑ר, מִ֖י נָחַ֣נִי עַד־אֱדֽוֹם:

יב הֲלֹֽא־אֱלֹהִ֥ים זְנַחְתָּ֑נוּ, וְֽלֹא־תֵצֵ֥א ֜אֱלֹהִ֗ים בְּצִבְאֹתֵֽינוּ:

יג הָבָה־לָּ֣נוּ עֶזְרָ֣ת מִצָּ֑ר, ֜וְשָׁ֗וְא תְּשׁוּעַ֥ת אָדָֽם:

יד בֵּאלֹהִ֥ים נַעֲשֶׂה־חָ֑יִל, ֜וְה֗וּא יָב֥וּס צָרֵֽינוּ:

אֵין עֵצָה לַעֲמֹד נֶגֶד הַבַּעַל דָּבָר כִּי אִם עַל יְדֵי תְּפִלָּה, שֶׁעַל יְדֵי זֶה זוֹכִין לְכָל הָעֵצוֹת וּלְכָל אֳפָנֵי הַיְשׁוּעוֹת, לִזְכּוֹת לָצֵאת מִגָּלוּת נַפְשׁוֹ וּלְהִתְקָרֵב אֵלָיו יִתְבָּרַךְ: (לקו"מ על פס' ד)

א ֖לַֽמְנַצֵּחַ, לְדָוִ֣ד מִזְמ֑וֹר, אֱלֹהֵ֥י ֜תְהִלָּתִ֗י אַֽל־תֶּֽחֱרַֽשׁ:

ב כִּ֤י פִ֪י רָשָׁ֡ע וּֽפִי־֖מִרְמָה עָלַ֣י פָּתָ֑חוּ, דִּבְּר֥וּ ֜אִתִּ֗י לְשׁ֣וֹן שָֽׁקֶר:

ג וְדִבְרֵ֣י שִׂנְאָ֣ה סְבָב֑וּנִי, וַיִּֽלָּחֲמ֥וּנִי חִנָּֽם:

ד תַּֽחַת־אַהֲבָתִ֥י יִשְׂטְנ֗וּנִי, וַאֲנִ֥י תְפִלָּֽה:

ה וַיָּ֘שִׂ֤ימוּ עָלַ֣י ֖רָעָה תַּ֣חַת טוֹבָ֑ה, ֜וְשִׂנְאָ֗ה תַּ֣חַת אַהֲבָתִֽי:

ו הַפְקֵ֣ד עָלָ֣יו רָשָׁ֑ע, ֜וְשָׂטָ֗ן יַעֲמֹ֥ד עַל־יְמִינֽוֹ:

ז ֖בְּהִשָּׁ֣פְטוֹ יֵצֵ֣א רָשָׁ֑ע, ֜וּתְפִלָּת֗וֹ תִּהְיֶ֥ה לַחֲטָאָֽה:

ח יִֽהְיוּ־יָמָ֥יו מְעַטִּ֑ים, ֜פְּקֻדָּת֗וֹ יִקַּ֥ח אַחֵֽר:

ט יִֽהְיוּ־בָנָ֥יו יְתוֹמִ֑ים, ֜וְאִשְׁתּ֗וֹ אַלְמָנָֽה:

י וְנ֤וֹעַ יָנ֣וּעוּ בָנָ֣יו וְשִׁאֵ֑לוּ, ֜וְדָרְשׁ֗וּ מֵחׇרְבוֹתֵיהֶֽם:

יא יְנַקֵּ֣שׁ ֖נוֹשֶׁה לְכׇל־אֲשֶׁר־ל֑וֹ, וְיָבֹ֖זּוּ זָרִ֣ים יְגִיעֽוֹ:

יב אַל־יְהִי־֖לוֹ מֹשֵׁ֣ךְ חָ֑סֶד, וְֽאַל־יְהִ֥י ֜חוֹנֵ֗ן לִיתוֹמָֽיו:

יג יְהִֽי־אַחֲרִית֥וֹ לְהַכְרִ֑ית, בְּד֥וֹר ֜אַחֵ֗ר יִמַּ֥ח שְׁמָֽם:

יד יִזָּכֵ֤ר | עֲוֹ֣ן ֖אֲבֹתָֽיו אֶל־יְהֹוָ֑ה, וְחַטַּ֥את ֜אִמּ֗וֹ אַל־תִּמָּֽח:

טו יִהְי֣וּ נֶֽגֶד־יְהֹוָ֣ה תָּמִ֑יד, וְיַכְרֵ֖ת מֵאֶ֣רֶץ זִכְרָֽם:

טז יַ֗עַן אֲשֶׁ֤ר | לֹ֥א זָכַר֘ עֲשׂ֪וֹת חָ֥סֶד, וַיִּרְדֹּ֡ף אִישׁ־עָנִ֣י ֖וְאֶבְיוֹן וְנִכְאֵ֨ה לֵבָ֬ב לְמוֹתֵֽת:

יז וַיֶּאֱהַ֣ב ֖קְלָלָה וַתְּבוֹאֵ֑הוּ, וְֽלֹא־חָפֵ֥ץ ֜בִּבְרָכָ֗ה וַתִּרְחַ֥ק מִמֶּֽנּוּ:

יח וַיִּלְבַּ֥שׁ קְלָלָ֗ה כְּמַ֫דּ֥וֹ, וַתָּבֹ֣א כַמַּ֣יִם בְּקִרְבּ֑וֹ ֜וְכַשֶּׁ֗מֶן בְּעַצְמוֹתָֽיו:

יט תְּהִי־֖לוֹ כְּבֶ֣גֶד יַעְטֶ֑ה, ֜וּלְמֵ֗זַח תָּמִ֥יד יַחְגְּרֶֽהָ:

כ זֹ֤את פְּעֻלַּ֣ת ֖שֹׂטְנַי מֵאֵ֣ת יְהֹוָ֑ה, וְהַדֹּבְרִ֥ים ֜רָ֗ע עַל־נַפְשִֽׁי:

כא וְאַתָּ֤ה | יְֱהֹ֘וִ֤ה אֱלֹהִים קרי אֲדֹנָ֗י, עֲֽשֵׂה־֖אִתִּי לְמַ֣עַן שְׁמֶ֑ךָ, כִּי־ט֥וֹב ֜חַסְדְּךָ֗, הַצִּילֵֽנִי:

כב כִּֽי־עָנִ֣י וְאֶבְי֣וֹן אָנֹ֑כִי, ֜וְלִבִּ֗י חָלַ֥ל בְּקִרְבִּֽי:

כג כְּצֵֽל־כִּנְטוֹת֥וֹ נֶֽהֱלָ֑כְתִּי, ֜נִנְעַ֗רְתִּי כָּאַרְבֶּֽה:

כד ֖בִּרְכַּי כָּשְׁל֣וּ מִצּ֑וֹם, ֜וּבְשָׂרִ֗י כָּחַ֥שׁ מִשָּֽׁמֶן:

כה וַאֲנִ֤י | הָיִ֣יתִי חֶרְפָּ֣ה לָהֶ֑ם, ֜יִרְא֗וּנִי יְנִיע֥וּן רֹאשָֽׁם:

כו ֖עׇזְרֵנִי יְהֹוָ֣ה אֱלֹהָ֑י, הֽוֹשִׁיעֵ֣נִי כְחַסְדֶּֽךָ:

כז ֖וְֽיֵדְעֽוּ כִּי־יָ֣דְךָ זֹּ֑את, אַתָּ֖ה יְהֹוָ֣ה עֲשִׂיתָֽהּ:

כח יְקַֽלְלוּ־הֵֽמָּה֘ וְאַתָּ֪ה תְבָ֫רֵ֥ךְ, קָ֤מוּ | ֜וַיֵּבֹ֗שׁוּ וְֽעַבְדְּךָ֥ יִשְׂמָֽח:

כט יִלְבְּשׁ֣וּ שׂוֹטְנַ֣י כְּלִמָּ֑ה, וְיַֽעֲט֖וּ כַמְעִ֣יל בׇּשְׁתָּֽם:

ל א֘וֹדֶ֤ה יְהֹוָ֣ה מְאֹ֣ד בְּפִ֑י, וּבְת֖וֹךְ רַבִּ֣ים אֲהַלְלֶֽנּוּ:

לא כִּי־֖יַעֲמֹד לִימִ֣ין אֶבְי֑וֹן, ֜לְהוֹשִׁ֗יעַ מִשֹּׁפְטֵ֥י נַפְשֽׁוֹ:

הָעִקָּר הוּא הָרָצוֹן וְהַכִּסּוּפִין, שֶׁצָּרִיךְ לְהִתְגַּבֵּר שֶׁיִּהְיֶה לוֹ תָּמִיד רְצוֹנוֹת חֲזָקִים וְכִסּוּפִין גְּדוֹלִים לַעֲבוֹדַת ה' יִתְבָּרַךְ: (לקו"ה על פס' א)

א לְדָוִ֗ד מִ֫זְמ֥וֹר, נְאֻ֤ם יְהֹוָ֨ה | לַאדֹנִ֗י, שֵׁ֥ב לִֽימִינִ֑י, עַד־אָשִׁ֥ית ֜אֹיְבֶ֗יךָ הֲדֹ֣ם לְרַגְלֶֽיךָ:

ב מַטֵּֽה־עֻזְּךָ֗ יִשְׁלַ֣ח ֖יְהֹוָה מִצִּיּ֑וֹן, ֜רְדֵ֗ה בְּקֶ֣רֶב אֹיְבֶֽיךָ:

ג עַמְּךָ֣ נְדָבֹת֘ בְּי֪וֹם חֵ֫ילֶ֥ךָ, בְּֽהַדְרֵי־קֹ֖דֶשׁ מֵרֶ֣חֶם מִשְׁחָ֑ר, ֜לְךָ֗ טַ֣ל יַלְדֻתֶֽיךָ:

ד נִשְׁבַּ֤ע יְהֹוָ֨ה | וְלֹ֥א יִנָּחֵ֗ם, אַתָּֽה־כֹהֵ֥ן לְעוֹלָ֑ם, עַל־֜דִּבְרָתִ֗י מַלְכִּי־צֶֽדֶק:

ה אֲדֹנָ֥י עַל־יְמִֽינְךָ֑, מָחַ֖ץ בְּיוֹם־אַפּ֣וֹ מְלָכִֽים:

ו יָדִ֣ין ֖בַּגּוֹיִם מָלֵ֣א גְוִיּ֑וֹת, מָ֥חַץ ֜רֹ֗אשׁ עַל־אֶ֥רֶץ רַבָּֽה:

ז ֖מִנַּֽחַל בַּדֶּ֣רֶךְ יִשְׁתֶּ֑ה, עַל־֜כֵּ֗ן יָרִ֥ים רֹֽאשׁ:

שֶׁכָּל אֶחָד וְאֶחָד יִהְיֶה עִקַּר תְּפִלָּתוֹ רַק עַל הַיִּרְאָה, לְיִרְאָה אֶת ה' הַנִּכְבָּד וְהַנּוֹרָא הַזֶּה: (לקו"ה על פס' י)

א הַֽלְלוּ־יָ֨הּ | אוֹדֶ֣ה ֖יְהֹוָה בְּכׇל־לֵבָ֑ב, בְּס֖וֹד יְשָׁרִ֣ים וְעֵדָֽה:

ב ֖גְּדֹלִים מַעֲשֵׂ֣י יְהֹוָ֑ה, ֜דְּרוּשִׁ֗ים לְכׇל־חֶפְצֵיהֶֽם:

ג הוֹד־וְהָדָ֥ר פָּעֳל֑וֹ, ֜וְצִדְקָת֗וֹ עֹמֶ֥דֶת לָעַֽד:

ד זֵ֣כֶר ֖עָשָׂה לְנִפְלְאֹתָ֑יו, חַנּ֖וּן וְרַח֣וּם יְהֹוָֽה:

ה ֖טֶרֶף נָתַ֣ן לִירֵאָ֑יו, יִזְכֹּ֖ר לְעוֹלָ֣ם בְּרִיתֽוֹ:

ו כֹּ֣חַ ֖מַעֲשָׂיו הִגִּ֣יד לְעַמּ֑וֹ, לָתֵ֥ת ֜לָהֶ֗ם נַחֲלַ֥ת גּוֹיִֽם:

ז מַעֲשֵׂ֣י ֖יָדָיו אֱמֶ֣ת וּמִשְׁפָּ֑ט, נֶאֱמָנִ֗ים כׇּל־פִּקּוּדָֽיו:

ח סְמוּכִ֣ים לָעַ֣ד לְעוֹלָ֑ם, ֜עֲשׂוּיִ֗ם בֶּאֱמֶ֥ת וְיָשָֽׁר:

ט פְּד֤וּת | שָׁ֘לַ֤ח לְעַמּ֗וֹ, צִוָּֽה־לְעוֹלָ֥ם בְּרִית֑וֹ, קָד֖וֹשׁ וְנוֹרָ֣א שְׁמֽוֹ:

י רֵ֘אשִׁ֤ית חׇכְמָ֨ה | יִרְאַ֬ת יְהֹוָ֗ה, שֵׂ֣כֶל ֖טוֹב לְכׇל־עֹשֵׂיהֶ֑ם, תְּהִלָּת֗וֹ עֹמֶ֥דֶת לָעַֽד:

הַקָּדוֹשׁ בָּרוּךְ הוּא מִתְאַוֶּה לִתְפִלָּתָן שֶׁל יִשְׂרָאֵל, וּכְשֶׁיִּשְׂרָאֵל מִתְפַּלְּלִין לְפָנָיו הֵם מְמַלְּאִים תַּאֲוָתוֹ וְהוּא מְקַבֵּל תַּעֲנוּג מֵאִתָּנוֹּ: (לקו"ה על פס' ה)

א הַֽלְלוּ־יָ֨הּ |, אַשְׁרֵי־֖אִישׁ יָרֵ֣א אֶת־יְהֹוָ֑ה, ֜בְּמִצְוֹתָ֗יו חָפֵ֥ץ מְאֹֽד:

ב גִּבּ֣וֹר ֖בָּאָֽרֶץ יִהְיֶ֣ה זַרְע֑וֹ, דּ֖וֹר יְשָׁרִ֣ים יְבֹרָֽךְ:

ג הוֹן־וָעֹ֥שֶׁר בְּבֵית֑וֹ, ֜וְצִדְקָת֗וֹ עֹמֶ֥דֶת לָעַֽד:

ד זָ֘רַ֤ח בַּחֹ֣שֶׁךְ ֖אוֹר לַיְשָׁרִ֑ים, חַנּ֖וּן וְרַח֣וּם וְצַדִּֽיק:

ה טֽוֹב־֖אִישׁ חוֹנֵ֣ן וּמַלְוֶ֑ה, יְכַלְכֵּ֖ל דְּבָרָ֣יו בְּמִשְׁפָּֽט:

ו כִּֽי־לְעוֹלָ֥ם לֹא־יִמּ֑וֹט, לְזֵ֥כֶר ֜עוֹלָ֗ם יִהְיֶ֥ה צַדִּֽיק:

ז מִשְּׁמוּעָ֣ה ֖רָעָה לֹ֣א יִירָ֑א, נָכ֥וֹן ֜לִבּ֗וֹ בָּטֻ֥חַ בַּיהֹוָֽה:

ח סָמ֣וּךְ ֖לִבּוֹ לֹ֣א יִירָ֑א, עַ֖ד אֲשֶׁר־יִרְאֶ֣ה בְצָרָֽיו:

ט פִּזַּ֤ר | נָ֘תַ֤ן לָאֶבְיוֹנִ֗ים, ֖צִדְקָתוֹ עֹמֶ֣דֶת לָעַ֑ד, ֜קַרְנ֗וֹ תָּר֥וּם בְּכָבֽוֹד:

י רָ֘שָׁ֤ע יִרְאֶ֨ה | וְכָעָ֗ס, שִׁנָּ֣יו יַחֲרֹ֣ק וְנָמָ֑ס, תַּאֲוַ֖ת רְשָׁעִ֣ים תֹּאבֵֽד:

יִשְׁתַּדֵּל לְהַבִּיט עַל ה' וְנִפְלְאוֹתָיו אֲשֶׁר הִפְלִיא חַסְדּוֹ עִמָּנוּ, וְיַעֲנֶה לַה' דְּבָרִים הַרְבֵּה לְהוֹדוֹת וּלְהַלֵּל אוֹתוֹ יִתְבָּרַךְ עַל חַסְדּוֹ וְנִפְלְאוֹתָיו: (לקו"ה על פס' ז)

א הַֽלְלוּ־יָ֨הּ |, ֖הַלְלוּ עַבְדֵ֣י יְהֹוָ֑ה, ֜הַלְל֗וּ אֶת־שֵׁ֥ם יְהֹוָֽה:

ב יְהִ֤י שֵׁ֣ם יְהֹוָ֣ה מְבֹרָ֑ךְ, ֜מֵעַתָּ֗ה וְעַד־עוֹלָֽם:

ג מִמִּזְרַח־שֶׁ֥מֶשׁ עַד־מְבוֹא֑וֹ, ֜מְהֻלָּ֗ל שֵׁ֣ם יְהֹוָֽה:

ד רָ֖ם עַל־כׇּל־גּוֹיִ֥ם | יְהֹוָ֑ה, עַ֖ל הַשָּׁמַ֣יִם כְּבוֹדֽוֹ:

ה ֖מִי כַּיהֹוָ֣ה אֱלֹהֵ֑ינוּ, הַֽמַּגְבִּיהִ֥י לָשָֽׁבֶת:

ו הַֽמַּשְׁפִּילִ֥י לִרְא֑וֹת, בַּשָּׁמַ֥יִם וּבָאָֽרֶץ:

ז מְקִֽימִ֣י מֵעָפָ֣ר דָּ֑ל, ֜מֵאַשְׁפֹּ֗ת יָרִ֥ים אֶבְיֽוֹן:

ח לְהוֹשִׁיבִ֥י עִם־נְדִיבִ֑ים, ֜עִם נְדִיבֵ֥י עַמּֽוֹ:

ט מֽוֹשִׁיבִ֨י | עֲקֶ֬רֶת הַבַּ֗יִת, אֵֽם־הַבָּנִ֥ים שְׂמֵחָ֗ה, הַֽלְלוּ־יָֽהּ:

לְהַרְגִּיל עַצְמוֹ לִכְסֹף וּלְהִשְׁתּוֹקֵק תָּמִיד כִּסּוּפִין דִּקְדֻשָּׁה לַה' יִתְבָּרַךְ וְלַעֲבוֹדָתוֹ, וְזֶה עִקַּר הַטָּהֳרָה: (לקו"מ על פס' ח)

א בְּצֵ֣את ֖יִשְׂרָאֵל מִמִּצְרָ֑יִם, בֵּ֥ית ֜יַעֲקֹ֗ב מֵעַ֥ם לֹעֵֽז:

ב הָיְתָ֣ה יְהוּדָ֣ה לְקׇדְשׁ֑וֹ, ֜יִשְׂרָאֵ֗ל מַמְשְׁלוֹתָֽיו:

ג הַיָּ֣ם ֖רָאָֽה וַיָּנֹ֑ס, ֜הַיַּרְדֵּ֗ן יִסֹּ֥ב לְאָחֽוֹר:

ד ֖הֶהָרִים רָקְד֣וּ כְאֵילִ֑ים, ֜גְּבָע֗וֹת כִּבְנֵי־צֹֽאן:

ה מַה־לְּךָ֣ ֖הַיָּֽם כִּ֣י תָנ֑וּס, ֜הַיַּרְדֵּ֗ן תִּסֹּ֥ב לְאָחֽוֹר:

ו ֖הֶהָרִים תִּרְקְד֣וּ כְאֵילִ֑ים, ֜גְּבָע֗וֹת כִּבְנֵי־צֹֽאן:

ז מִלִּפְנֵ֣י ֖אָדוֹן ח֣וּלִי אָ֑רֶץ, ֜מִלִּפְנֵ֗י אֱל֣וֹהַּ יַעֲקֹב:

ח הַהֹפְכִ֣י הַצּ֣וּר אֲגַם־מָ֑יִם, ֜חַלָּמִ֗ישׁ לְמַעְיְנוֹ־מָֽיִם:

זֶה כָּל עֲבוֹדַת הָאָדָם כָּל יְמֵי חַיָּיו, לְהַמְשִׁיךְ שֶׁפַע וְרַב טוֹב עַל יְדֵי מַעֲשָֹיו הַטּוֹבִים וְהָעִקָּר עַל יְדֵי תְּפִלָּה: (לקו"ה על פס' טז)

א לֹ֤א לָ֥נוּ יְהֹוָ֗ה, לֹ֫א לָ֥נוּ, כִּֽי־֖לְשִׁמְךָֽ תֵּ֣ן כָּב֑וֹד, עַל־֜חַסְדְּךָ֗ עַל־אֲמִתֶּֽךָ:

ב ֖לָמָּה יֹאמְר֣וּ הַגּוֹיִ֑ם, אַיֵּה־֜נָ֗א אֱלֹהֵיהֶֽם:

ג וֵאלֹהֵ֥ינוּ בַשָּׁמָ֑יִם, כֹּ֖ל אֲשֶׁר־חָפֵ֣ץ עָשָֽׂה:

ד ֖עֲצַבֵּיהֶם כֶּ֣סֶף וְזָהָ֑ב, ֜מַעֲשֵׂ֗ה יְדֵ֣י אָדָֽם:

ה פֶּֽה־֖לָהֶם וְלֹ֣א יְדַבֵּ֑רוּ, עֵינַ֥יִם ֜לָהֶ֗ם וְלֹ֣א יִרְאֽוּ:

ו אׇזְנַ֣יִם ֖לָהֶם וְלֹ֣א יִשְׁמָ֑עוּ, אַ֥ף ֜לָהֶ֗ם וְלֹ֣א יְרִיחֽוּן:

ז יְדֵיהֶ֤ם | וְלֹ֬א יְמִישׁ֗וּן, ֖רַגְלֵיהֶם וְלֹ֣א יְהַלֵּ֑כוּ, לֹֽא־֜יֶהְגּ֗וּ בִּגְרוֹנָֽם:

ח ֖כְּמוֹהֶם יִהְי֣וּ עֹשֵׂיהֶ֑ם, ֖כֹּל אֲשֶׁר־בֹּטֵ֥חַ בָּהֶֽם:

ט ֖יִשְׂרָאֵל בְּטַ֣ח בַּיהֹוָ֑ה, עֶזְרָ֖ם וּמָגִנָּ֣ם הֽוּא:

י בֵּ֣ית ֖אַהֲרֹן בִּטְח֣וּ בַיהֹוָ֑ה, עֶזְרָ֖ם וּמָגִנָּ֣ם הֽוּא:

יא יִרְאֵ֣י ֖יְהֹוָה בִּטְח֣וּ בַיהֹוָ֑ה, עֶזְרָ֖ם וּמָגִנָּ֣ם הֽוּא:

יב יְהֹוָה֘ זְכָרָ֪נוּ יְבָ֫רֵ֥ךְ, ֖יְבָרֵךְ אֶת־בֵּ֣ית יִשְׂרָאֵ֑ל, ֜יְבָרֵ֗ךְ אֶת־בֵּ֥ית אַֽהֲרֹֽן:

יג ֖יְבָרֵךְ יִרְאֵ֣י יְהֹוָ֑ה, ֜הַקְּטַנִּ֗ים עִם־הַגְּדֹלִֽים:

יד יֹסֵ֣ף יְהֹוָ֣ה עֲלֵיכֶ֑ם, ֜עֲלֵיכֶ֗ם וְעַל־בְּנֵיכֶֽם:

טו בְּרוּכִ֣ים ֖אַתֶּם לַיהֹוָ֑ה, ֜עֹשֵׂ֗ה שָׁמַ֥יִם וָאָֽרֶץ:

טז הַשָּׁמַ֣יִם ֖שָׁמַיִם לַיהֹוָ֑ה, ֜וְהָאָ֗רֶץ נָתַ֥ן לִבְנֵי־אָדָֽם:

יז לֹ֣א ֖הַמֵּתִים יְהַֽלְלוּ־יָ֑הּ, ֜וְלֹ֗א כׇּל־יֹרְדֵ֥י דוּמָֽה:

יח וַאֲנַ֤חְנוּ | נְבָ֘רֵ֤ךְ יָ֗הּ, מֵעַתָּ֥ה וְעַד־֜עוֹלָ֗ם, הַֽלְלוּ־יָֽהּ:

לְהוֹדוֹת וּלְהַלֵּל לִשְׁמוֹ יִתְבָּרַךְ עַל הֶעָבָר, וְעַל יְדֵי זֶה יְכוֹלִין לִקְרוֹתוֹ וְלִצְעֹק אֵלָיו עַל לְהַבָּא: (לקו"ה על פס' יז)

א ֖אָהַבְתִּי כִּֽי־יִשְׁמַ֥ע | יְהֹוָ֑ה, אֶת־ק֜וֹלִ֗י תַּחֲנוּנָֽי:

ב כִּֽי־הִטָּ֣ה אׇזְנ֣וֹ לִ֑י, וּבְיָמַ֥י אֶקְרָֽא:

ג אֲפָפ֤וּנִי | חֶבְלֵי־מָ֗וֶת וּמְצָרֵ֣י שְׁא֣וֹל מְצָא֑וּנִי, צָרָ֖ה וְיָג֣וֹן אֶמְצָֽא:

ד וּבְשֵֽׁם־יְהֹוָ֥ה אֶקְרָ֑א, אָנָּ֥ה ֜יְהֹוָ֗ה מַלְּטָ֥ה נַפְשִֽׁי:

ה חַנּ֣וּן יְהֹוָ֣ה וְצַדִּ֑יק, וֵ֖אלֹהֵ֣ינוּ מְרַחֵֽם:

ו שׁוֹמֵ֣ר פְּתָאִי֣ם יְהֹוָ֑ה, ֜דַּלֹּתִ֗י וְלִ֣י יְהוֹשִֽׁיעַ:

ז שׁוּבִ֣י ֖נַפְשִׁי לִמְנוּחָ֑יְכִי, כִּי־֜יְהֹוָ֗ה גָּמַ֥ל עָלָֽיְכִי:

ח כִּ֤י חִלַּ֥צְתָּ נַפְשִׁ֗י מִ֫מָּ֥וֶת, אֶת־עֵינִ֥י מִן־דִּמְעָ֑ה, אֶת־רַגְלִ֥י מִדֶּֽחִי:

ט ֖אֶתְהַלֵּךְ לִפְנֵ֣י יְהֹוָ֑ה, ֜בְּאַרְצ֗וֹת הַחַיִּֽים:

י ֖הֶֽאֱמַֽנְתִּי כִּ֣י אֲדַבֵּ֑ר, ֜אֲנִ֗י עָנִ֥יתִי מְאֹֽד:

יא ֖אֲנִי אָמַ֣רְתִּי בְחׇפְזִ֑י, כׇּֽל־הָאָדָ֥ם כֹּזֵֽב:

יב מָֽה־אָשִׁ֥יב לַיהֹוָ֑ה, כׇּֽל־תַּגְמֻל֥וֹהִי עָלָֽי:

יג כּוֹס־יְשׁוּע֥וֹת אֶשָּׂ֑א, וּבְשֵׁ֖ם יְהֹוָ֣ה אֶקְרָֽא:

יד ֖נְדָרַי לַיהֹוָ֣ה אֲשַׁלֵּ֑ם, נֶגְדָה־֜נָּא לְכׇל־עַמּֽוֹ:

טו ֖יָקָר בְּעֵינֵ֣י יְהֹוָ֑ה ֜הַמָּ֗וְתָה לַחֲסִידָֽיו:

טז אָנָּ֣ה יְהֹוָה֘ כִּֽי־אֲנִ֪י עַ֫בְדֶּ֥ךָ, אֲֽנִי־֖עַבְדְּךָ בֶּן־אֲמָתֶ֑ךָ, ֜פִּתַּ֗חְתָּ לְמוֹסֵרָֽי:

יז לְֽךָ־֖אֶזְבַּח זֶ֣בַח תּוֹדָ֑ה, וּבְשֵׁ֖ם יְהֹוָ֣ה אֶקְרָֽא:

יח ֖נְדָרַי לַיהֹוָ֣ה אֲשַׁלֵּ֑ם, נֶגְדָה־֜נָּ֗א לְכׇל־עַמּֽוֹ:

יט בְּחַצְר֤וֹת | בֵּ֤ית יְהֹוָ֗ה בְּֽת֘וֹכֵ֤כִי ֜יְֽרוּשָׁלִָ֗ם, הַֽלְלוּ־יָֽהּ:

כָּל עֲבוֹדַת הָאָדָם בְּזֶה הָעוֹלָם לָבוֹא לָזֶה, לִזְכּוֹת לֶאֱמֶת וֶאֱמוּנָה בִּשְׁלֵמוּת בָּאֱמֶת לַאֲמִתּוֹ: (לקו"ה על פס' ב)

א הַלְל֣וּ אֶת־֖יְהֹוָה כׇּל־גּוֹיִ֑ם, ֜שַׁבְּח֗וּהוּ כׇּל־הָֽאֻמִּֽים:

ב כִּ֥י גָ֘בַ֤ר עָלֵ֨ינוּ | חַסְדּ֗וֹ, וֶֽאֱמֶת־יְהֹוָ֥ה לְעוֹלָ֗ם, הַֽלְלוּ־יָֽהּ:

לְהִתְעוֹרֵר כָּל אֶחָד מִמְּקוֹמוֹ אֲשֶׁר הוּא שָׁם לִצְעֹק וְלִזְעֹק וְלִשְׁאֹג לַה' יִתְבָּרַךְ מֵעֹמֶק הַלֵּב שֶׁזֶּה הָעִקָּר, וּבְלֹא זֶה אִי אֶפְשָׁר לְהַתְחִיל וּלְתַקֵּן שׁוּם דָּבָר: (לקו"ה על פס' ה)

א הוֹד֣וּ לַיהֹוָ֣ה כִּי־ט֑וֹב, כִּ֖י לְעוֹלָ֣ם חַסְדּֽוֹ:

ב יֹֽאמַר־נָ֥א יִשְׂרָאֵ֑ל, כִּ֖י לְעוֹלָ֣ם חַסְדּֽוֹ:

ג יֹֽאמְרוּ־נָ֥א בֵֽית־אַהֲרֹ֑ן, כִּ֖י לְעוֹלָ֣ם חַסְדּֽוֹ:

ד יֹֽאמְרוּ־֖נָא יִרְאֵ֣י יְהֹוָ֑ה, כִּ֖י לְעוֹלָ֣ם חַסְדּֽוֹ:

ה מִֽן־֖הַמֵּצַר קָרָ֣אתִי יָּ֑הּ, עָנָ֖נִי בַמֶּרְחָ֣ב יָֽהּ:

ו יְהֹוָ֣ה ֖לִי לֹ֣א אִירָ֑א, מַה־יַּעֲשֶׂ֖ה לִ֣י אָדָֽם:

ז יְהֹוָ֣ה ֖לִי בְּעֹזְרָ֑י, ֜וַאֲנִ֗י אֶרְאֶ֥ה בְשֹׂנְאָֽי:

ח ט֗וֹב לַחֲס֥וֹת בַּיהֹוָ֑ה, ֜מִבְּט֗וֹחַ בָּאָדָֽם:

ט ט֗וֹב לַחֲס֥וֹת בַּיהֹוָ֑ה, ֜מִבְּטֹ֗חַ בִּנְדִיבִֽים:

י כׇּל־גּוֹיִ֥ם סְבָב֑וּנִי, בְּשֵׁ֥ם ֜יְהֹוָ֗ה כִּ֣י אֲמִילַֽם:

יא סַבּ֥וּנִי גַם־סְבָב֑וּנִי, בְּשֵׁ֥ם ֜יְהֹוָ֗ה כִּ֣י אֲמִילַֽם:

יב סַבּ֤וּנִי כִדְבוֹרִ֗ים ֖דֹּֽעֲכוּ כְּאֵ֣שׁ קוֹצִ֑ים, בְּשֵׁ֥ם ֜יְהֹוָ֗ה כִּ֣י אֲמִילַֽם:

יג דַּחֹ֣ה דְחִיתַ֣נִי לִנְפֹּ֑ל, וַי֖הֹוָ֣ה עֲזָרָֽנִי:

יד עׇזִּ֣י וְזִמְרָ֣ת יָ֑הּ, וַֽיְהִי־֜לִ֗י לִישׁוּעָֽה:

טו ק֤וֹל | רִנָּ֬ה וִֽישׁוּעָ֗ה בְּאָהֳלֵ֥י צַדִּיקִ֑ים, יְמִ֥ין ֜יְהֹוָ֗ה עֹ֣שָׂה חָֽיִל:

טז יְמִ֣ין ֖יְהֹוָה רוֹמֵמָ֑ה, יְמִ֥ין ֜יְהֹוָ֗ה עֹ֣שָׂה חָֽיִל:

יז לֹֽא־אָמ֥וּת כִּֽי־אֶחְיֶ֑ה, ֜וַאֲסַפֵּ֗ר מַעֲשֵׂ֥י יָֽהּ:

יח יַסֹּ֣ר יִסְּרַ֣נִּי יָּ֑הּ, ֜וְלַמָּ֗וֶת לֹ֣א נְתָנָֽנִי:

יט פִּתְחוּ־לִ֥י שַֽׁעֲרֵי־צֶ֑דֶק, אָֽבֹא־בָ֜֗ם אוֹדֶ֥ה יָֽהּ:

כ זֶֽה־הַשַּׁ֥עַר לַיהֹוָ֑ה, ֜צַדִּיקִ֗ים יָבֹ֥אוּ בֽוֹ:

כא ֖אוֹדְךָ כִּ֣י עֲנִיתָ֑נִי, וַתְּהִי־֜לִ֗י לִישׁוּעָֽה:

כב ֖אֶבֶן מָאֲס֣וּ הַבּוֹנִ֑ים, ֜הָיְתָ֗ה לְרֹ֣אשׁ פִּנָּֽה:

כג מֵאֵ֣ת ֖יְהֹוָה הָ֣יְתָה זֹּ֑את, הִ֖יא נִפְלָ֣את בְּעֵינֵֽינוּ:

כד זֶ֥ה־֖הַיּוֹם עָשָׂ֣ה יְהֹוָ֑ה, נָגִ֖ילָה וְנִשְׂמְחָ֣ה בֽוֹ:

כה אָנָּ֣א ֖יְהֹוָה הוֹשִׁ֘יעָ֥ה נָּ֑א, אָנָּ֥א ֜יְהֹוָ֗ה הַצְלִ֘יחָ֥ה נָּֽא:

כו בָּר֣וּךְ ֖הַבָּֽא בְּשֵׁ֣ם יְהֹוָ֑ה, ֜בֵּרַֽכְנוּכֶ֗ם מִבֵּ֥ית יְהֹוָֽה:

כז אֵ֤ל | יְהֹוָה֘ וַיָּ֪אֶ֫ר לָ֥נוּ, אִסְרוּ־חַ֥ג בַּעֲבוֹתִ֑ים, עַד־֜קַרְנ֗וֹת הַמִּזְבֵּֽחַ:

כח אֵלִ֣י אַתָּ֣ה וְאוֹדֶ֑ךָּ, ֜אֱלֹהַ֗י אֲרוֹמְמֶֽךָּ:

כט הוֹד֣וּ לַיהֹוָ֣ה כִּי־ט֑וֹב, כִּ֖י לְעוֹלָ֣ם חַסְדּֽוֹ:

זֶה עִקַּר הַבְּחִירָה, מַה שֶּׁמְּסַלֵּק שִֹכְלוֹ וּבוֹחֵר בֶּאֱמוּנָה וּתְפִלָּה, שֶׁזֶּהוּ הָעִקָּר וְהַיְסוֹד שֶׁכָּל הַתּוֹרָה עוֹמֵד עָלֶיהָ: (לקו"ה על פס' ל)

א אַשְׁרֵ֥י תְמִֽימֵי־דָ֑רֶךְ, ֜הַהֹלְכִ֗ים בְּתוֹרַ֥ת יְהֹוָֽה:

ב ֖אַשְׁרֵי נֹצְרֵ֥י עֵדֹתָ֗יו, בְּכׇל־לֵ֥ב יִדְרְשֽׁוּהוּ:

ג ֖אַף לֹֽא־פָעֲל֣וּ עַוְלָ֑ה, בִּדְרָכָ֥יו הָלָֽכוּ:

ד ֖אַתָּה צִוִּ֥יתָה פִקֻּדֶ֗יךָ לִשְׁמֹ֥ר מְאֹֽד:

ה ֖אַחֲלַי יִכֹּ֥נוּ דְרָכָ֗י לִשְׁמֹ֥ר חֻקֶּֽיךָ:

ו אָ֥ז לֹֽא־אֵב֑וֹשׁ, ֜בְּהַבִּיטִ֗י אֶל־כׇּל־מִצְוֹתֶֽיךָ:

ז ֖אוֹדְךָ בְּיֹ֣שֶׁר לֵבָ֑ב, ֜בְּלׇמְדִ֗י מִשְׁפְּטֵ֥י צִדְקֶֽךָ:

ח אֶת־חֻקֶּ֥יךָ אֶשְׁמֹ֑ר, אַֽל־תַּעַזְבֵ֥נִי עַד־מְאֹֽד:

ט בַּמֶּ֣ה יְזַכֶּה־֖נַּעַר אֶת־אׇרְח֑וֹ, ֜לִשְׁמֹ֗ר כִּדְבָרֶֽךָ:

י בְּכׇל־לִבִּ֥י דְרַשְׁתִּ֑יךָ, אַל־תַּ֜שְׁגֵּ֗נִי מִמִּצְוֹתֶֽיךָ:

יא ֖בְּלִבִּי צָפַ֣נְתִּי אִמְרָתֶ֑ךָ, ֜לְמַ֗עַן לֹ֣א אֶֽחֱטָא־לָֽךְ:

יב בָּר֖וּךְ אַתָּ֥ה יְהֹוָ֗ה, לַמְּדֵ֥נִי חֻקֶּֽיךָ:

יג בִּשְׂפָתַ֥י סִפַּ֑רְתִּי ֜כֹּ֗ל מִשְׁפְּטֵי־פִֽיךָ:

יד בְּדֶ֖רֶךְ עֵדְוֹתֶ֥יךָ שַׂ֗שְׂתִּי, כְּעַ֣ל כׇּל־הֽוֹן:

טו בְּפִקּוּדֶ֥יךָ אָשִׂ֑יחָה, ֜וְאַבִּ֗יטָה אֹרְחֹתֶֽיךָ:

טז בְּחֻקֹּתֶ֥יךָ אֶֽשְׁתַּעֲשָׁ֑ע, לֹ֖א אֶשְׁכַּ֣ח דְּבָרֶֽךָ:

יז גְּמֹ֖ל עַֽל־עַבְדְּךָ֥ אֶֽחְיֶ֗ה, וְאֶשְׁמְרָ֥ה דְבָרֶֽךָ:

יח גַּל־עֵינַ֥י וְאַבִּ֑יטָה ֜נִפְלָא֗וֹת מִתּוֹרָתֶֽךָ:

יט גֵּ֣ר אָנֹכִ֣י בָאָ֑רֶץ, אַל־תַּסְתֵּ֥ר ֜מִמֶּ֗נִּי מִצְוֹתֶֽיךָ:

כ גָּרְסָ֣ה נַפְשִׁ֣י לְתַאֲבָ֑ה אֶֽל־מִשְׁפָּטֶ֥יךָ בְכׇל־עֵֽת:

כא ֖גָּעַרְתָּ זֵדִ֣ים אֲרוּרִ֑ים ֜הַשֹּׁגִ֗ים מִמִּצְוֹתֶֽיךָ:

כב גַּ֣ל ֖מֵעָלַי חֶרְפָּ֣ה וָב֑וּז, כִּ֖י עֵֽדוֹתֶ֣יךָ נָצָֽרְתִּי:

כג גַּ֤ם יָשְׁב֣וּ ֖שָׂרִים בִּ֣י נִדְבָּ֑רוּ, ֜עַבְדְּךָ֗ יָשִׂ֥יחַ בְּחֻקֶּֽיךָ:

כד גַּֽם־֖עֵדֹתֶיךָ שַׁעֲשֻׁעַ֗י, אַנְשֵׁ֥י עֲצָתִֽי:

כה דָּֽבְקָ֣ה לֶעָפָ֣ר נַפְשִׁ֑י, ֜חַיֵּ֗נִי כִּדְבָרֶֽךָ:

כו דְּרָכַ֣י ֖סִפַּרְתִּי וַֽתַּעֲנֵ֗נִי, לַמְּדֵ֥נִי חֻקֶּֽיךָ:

כז דֶּֽרֶךְ־פִּקּוּדֶ֥יךָ הֲבִינֵ֑נִי, ֜וְאָשִׂ֗יחָה בְּנִפְלְאוֹתֶֽיךָ:

כח דָּלְפָ֣ה ֖נַפְשִֽׁי מִתּוּגָ֑ה, ֜קַיְּמֵ֗נִי כִּדְבָרֶֽךָ:

כט דֶּֽרֶךְ־֖שֶׁקֶר הָסֵ֣ר מִמֶּ֑נִּי, וְֽתוֹרָתְךָ֥ חׇנֵּֽנִי:

ל דֶּֽרֶךְ־אֱמוּנָ֥ה בָחָ֑רְתִּי, מִשְׁפָּטֶ֥יךָ שִׁוִּֽיתִי:

לא דָּבַ֥קְתִּי בְעֵֽדְוֹתֶ֑יךָ, ֜יְהֹוָ֗ה אַל־תְּבִישֵֽׁנִי:

לב דֶּֽרֶךְ־מִצְוֹתֶ֥יךָ אָר֑וּץ, כִּ֖י תַרְחִ֣יב לִבִּֽי:

לג הוֹרֵ֣נִי ֖יְהֹוָה דֶּ֥רֶךְ חֻקֶּ֗יךָ, וְאֶצְּרֶ֥נָּה עֵֽקֶב:

לד ֖הֲבִינֵנִי וְאֶצְּרָ֥ה תוֹרָתֶ֗ךָ, וְאֶשְׁמְרֶ֥נָּה בְכׇל־לֵֽב:

לה ֖הַדְרִיכֵנִי בִּנְתִ֣יב מִצְוֹתֶ֑יךָ, כִּי־ב֥וֹ חָפָֽצְתִּי:

לו הַט־֖לִבִּי אֶל־עֵֽדְוֹתֶ֗יךָ, וְאַ֣ל אֶל־בָּֽצַע:

לז הַעֲבֵ֣ר ֖עֵינַי מֵרְא֣וֹת שָׁ֑וְא, בִּדְרָכֶ֥ךָ חַיֵּֽנִי:

לח הָקֵ֣ם ֖לְעַבְדְּךָֽ אִמְרָתֶ֑ךָ, ֜אֲשֶׁ֗ר לְיִרְאָתֶֽךָ:

לט הַעֲבֵ֣ר ֖חֶרְפָּתִי אֲשֶׁ֣ר יָגֹ֑רְתִּי, כִּ֖י מִשְׁפָּטֶ֣יךָ טוֹבִֽים:

מ ֖הִנֵּה תָּאַ֣בְתִּי לְפִקֻּדֶ֑יךָ, בְּצִדְקָתְךָ֥ חַיֵּֽנִי:

מא וִיבֹאֻ֣נִי חֲסָדֶ֣ךָ יְהֹוָ֑ה, ֜תְּשׁוּעָתְךָ֗ כְּאִמְרָתֶֽךָ:

מב וְאֶעֱנֶ֣ה חֹרְפִ֣י דָבָ֑ר, כִּֽי־בָ֜טַ֗חְתִּי בִּדְבָרֶֽךָ:

מג וְֽאַל־תַּצֵּ֬ל מִפִּ֣י דְבַר־אֱמֶ֣ת עַד־מְאֹ֑ד, כִּ֖י לְמִשְׁפָּטֶ֣ךָ יִחָֽלְתִּי:

מד וְאֶשְׁמְרָ֖ה תוֹרָתְךָ֥ תָמִ֗יד לְעוֹלָ֥ם וָעֶֽד:

מה וְאֶתְהַלְּכָ֥ה בָרְחָבָ֑ה, כִּ֖י פִקֻּדֶ֣יךָ דָרָֽשְׁתִּי:

מו וַאֲדַבְּרָ֣ה ֖בְעֵדֹתֶיךָ נֶ֥גֶד מְלָכִ֗ים וְלֹ֣א אֵבֽוֹשׁ:

מז וְאֶשְׁתַּעֲשַׁ֥ע בְּמִצְוֹתֶ֗יךָ אֲשֶׁ֣ר אָהָֽבְתִּי:

מח וְאֶשָּֽׂא־כַפַּ֗י אֶֽל־֖מִצְוֹתֶיךָ אֲשֶׁ֥ר אָהָ֗בְתִּי, וְאָשִׂ֥יחָה בְחֻקֶּֽיךָ:

מט זְכֹר־דָּבָ֥ר לְעַבְדֶּ֑ךָ, ֜עַ֗ל אֲשֶׁ֣ר יִחַלְתָּֽנִי:

נ זֹ֣את נֶחָֽמָתִ֣י בְעׇנְיִ֑י, כִּ֖י אִמְרָתְךָ֣ חִיָּֽתְנִי:

נא ֖זֵדִים הֱלִיצֻ֣נִי עַד־מְאֹ֑ד, ֜מִתּֽוֹרָתְךָ֗ לֹ֣א נָטִֽיתִי:

נב זָ֘כַ֤רְתִּי מִשְׁפָּטֶ֖יךָ מֵעוֹלָ֥ם | יְהֹוָ֗ה, וָאֶתְנֶחָֽם:

נג זַלְעָפָ֣ה ֖אֲחָזַתְנִי מֵֽרְשָׁעִ֑ים, ֜עֹזְבֵ֗י תּוֹרָתֶֽךָ:

נד ֖זְמִרוֹת הָֽיוּ־לִ֥י חֻקֶּ֗יךָ, בְּבֵ֣ית מְגוּרָֽי:

נה זָ֘כַ֤רְתִּי בַלַּ֣יְלָה שִׁמְךָ֣ יְהֹוָ֑ה, ֜וָאֶשְׁמְרָ֗ה תּוֹרָתֶֽךָ:

נו זֹ֥את הָֽיְתָה־לִּ֑י, כִּ֖י פִקֻּדֶ֣יךָ נָצָֽרְתִּי:

נז חֶלְקִ֖י יְהֹוָ֥ה אָמַ֗רְתִּי, לִשְׁמֹ֥ר דְּבָרֶֽיךָ:

נח חִלִּ֣יתִי פָנֶ֣יךָ בְכׇל־לֵ֑ב, ֜חׇנֵּ֗נִי כְּאִמְרָתֶֽךָ:

נט חִשַּׁ֥בְתִּי דְרָכָ֑י, וָאָשִׁ֥יבָה ֜רַגְלַ֗י אֶל־עֵדֹתֶֽיךָ:

ס ֖חַשְׁתִּי וְלֹ֣א הִתְמַהְמָ֑הְתִּי, ֜לִשְׁמֹ֗ר מִצְוֹתֶֽיךָ:

סא חֶבְלֵ֣י רְשָׁעִ֣ים עִוְּדֻ֑נִי, ֜תּוֹרָֽתְךָ֗ לֹ֣א שָׁכָֽחְתִּי:

סב חֲצֽוֹת־לַ֗יְלָה ֖אָקֽוּם לְהוֹד֣וֹת לָ֑ךְ, ֜עַל מִשְׁפְּטֵ֥י צִדְקֶֽךָ:

סג חָבֵ֣ר ֖אָנִי לְכׇל־אֲשֶׁ֣ר יְרֵא֑וּךָ, ֜וּלְשֹׁמְרֵ֗י פִּקּוּדֶֽיךָ:

סד חַסְדְּךָ֣ ֖יְהֹוָה מָלְאָ֥ה הָאָ֗רֶץ, חֻקֶּ֥יךָ לַמְּדֵֽנִי:

סה ֖טוֹב עָשִׂ֣יתָ עִֽם־עַבְדְּךָ֑, ֜יְהֹוָ֗ה כִּדְבָרֶֽךָ:

סו ט֤וּב טַ֣עַם וָדַ֣עַת לַמְּדֵ֑נִי, כִּ֖י בְמִצְוֹתֶ֣יךָ הֶאֱמָֽנְתִּי:

סז טֶ֣רֶם ֖אֶעֱנֶה אֲנִ֣י שֹׁגֵ֑ג, ֜וְעַתָּ֗ה אִמְרָתְךָ֥ שָׁמָֽרְתִּי:

סח טוֹב־אַתָּ֥ה וּמֵטִ֗יב, לַמְּדֵ֥נִי חֻקֶּֽיךָ:

סט טָפְל֬וּ עָלַ֣י שֶׁ֣קֶר זֵדִ֑ים, ֜אֲנִ֗י בְּכׇל־לֵ֤ב | אֶצֹּ֬ר פִּקּוּדֶֽיךָ:

ע טָפַ֣שׁ כַּחֵ֣לֶב לִבָּ֑ם, ֜אֲנִ֗י תּוֹרָתְךָ֥ שִֽׁעֲשָֽׁעְתִּי:

עא טֽוֹב־לִ֥י כִי־עֻנֵּ֑יתִי, ֜לְמַ֗עַן אֶלְמַ֥ד חֻקֶּֽיךָ:

עב טֽוֹב־לִ֥י תֽוֹרַת־פִּ֑יךָ, ֜מֵאַלְפֵ֗י זָהָ֥ב וָכָֽסֶף:

עג יָדֶ֣יךָ ֖עָשׂוּנִי וַֽיְכוֹנְנ֑וּנִי, ֜הֲבִינֵ֗נִי וְאֶלְמְדָ֥ה מִצְוֹתֶֽיךָ:

עד ֖יְרֵאֶיךָ יִרְא֣וּנִי וְיִשְׂמָ֑חוּ, כִּ֖י לִדְבָֽרְךָ֣ יִחָֽלְתִּי:

עה יָדַ֣עְתִּי ֖יְהֹוָה כִּי־צֶ֣דֶק מִשְׁפָּטֶ֑יךָ, ֜וֶאֱמוּנָ֗ה עִנִּיתָֽנִי:

עו יְהִי־נָ֣א חַסְדְּךָ֣ לְנַחֲמֵ֑נִי, כְּאִמְרָתְךָ֥ לְעַבְדֶּֽךָ:

עז יְבֹא֣וּנִי רַחֲמֶ֣יךָ וְאֶֽחְיֶ֑ה, כִּי־֜תוֹרָתְךָ֗ שַׁעֲשֻׁעָֽי:

עח יֵבֹ֣שׁוּ ֖זֵדִים כִּי־שֶׁ֣קֶר עִוְּת֑וּנִי, ֜אֲנִ֗י אָשִׂ֥יחַ בְּפִקּוּדֶֽיךָ:

עט יָשׁ֣וּבוּ לִ֣י יְרֵאֶ֑יךָ, ֜ויֹדעֵ֗י וְידְעו עֵדֹתֶֽיךָ:

פ יְהִי־לִבִּ֣י תָמִ֣ים בְּחֻקֶּ֑יךָ, ֜לְמַ֗עַן לֹ֣א אֵבֽוֹשׁ:

פא כָּֽלְתָ֣ה לִתְשׁוּעָתְךָ֣ נַפְשִׁ֑י, לִדְבָרְךָ֥ יִחָֽלְתִּי:

פב כָּל֣וּ ֖עֵינַי לְאִמְרָתֶ֑ךָ, ֜לֵאמֹ֗ר מָתַ֥י תְּֽנַחֲמֵֽנִי:

פג כִּֽי־֖הָיִיתִי כְּנֹ֣אד בְּקִיט֑וֹר, ֜חֻקֶּ֗יךָ לֹ֣א שָׁכָֽחְתִּי:

פד כַּמָּ֥ה יְמֵֽי־עַבְדֶּ֑ךָ, מָתַ֬י תַּעֲשֶׂ֖ה בְרֹדְפַ֣י מִשְׁפָּֽט:

פה כָּרוּ־לִ֣י זֵדִ֣ים שִׁיח֑וֹת, ֜אֲשֶׁ֗ר לֹ֣א כְתוֹרָתֶֽךָ:

פו כׇּל־מִצְוֹתֶ֥יךָ אֱמוּנָ֑ה, שֶׁ֖קֶר רְדָפ֣וּנִי עׇזְרֵֽנִי:

פז ֖כִּמְעַט כִּלּ֣וּנִי בָאָ֑רֶץ, ֜וַאֲנִ֗י לֹֽא־עָזַ֥בְתִּי פִקֻּדֶֽיךָ:

פח כְּחַסְדְּךָ֥ חַיֵּ֑נִי, ֜וְאֶשְׁמְרָ֗ה עֵד֥וּת פִּֽיךָ:

פט לְעוֹלָ֥ם יְהֹוָ֑ה ֜דְּבָרְךָ֗ נִצָּ֥ב בַּשָּׁמָֽיִם:

צ לְדֹ֣ר ֖וָדֹר אֱמוּנָתֶ֑ךָ, כּוֹנַ֥נְתָּ ֜אֶרֶץ וַתַּעֲמֹֽד:

צא ֖לְֽמִשְׁפָּטֶיךָ עָמְד֣וּ הַיּ֑וֹם, כִּ֖י הַכֹּ֣ל עֲבָדֶֽיךָ:

צב לוּלֵ֣י ֖תוֹרָתְךָֽ שַׁעֲשֻׁעָ֑י, ֜אָז אָבַ֥דְתִּי בְעׇנְיִֽי:

צג ֖לְעוֹלָם לֹֽא־אֶשְׁכַּ֣ח פִּקּוּדֶ֑יךָ, כִּ֥י ֜בָם חִיִּיתָֽנִי:

צד לְֽךָ־֖אֲנִי הוֹשִׁיעֵ֑נִי, כִּ֖י פִקּוּדֶ֣יךָ דָרָֽשְׁתִּי:

צה לִ֤י קִוּ֣וּ רְשָׁעִ֣ים לְאַבְּדֵ֑נִי, ֜עֵדֹתֶ֗יךָ אֶתְבּוֹנָֽן:

צו לְֽכׇל־֖תִּכְלָֽה רָאִ֣יתִי קֵ֑ץ, רְחָבָ֖ה מִצְוָֽתְךָ֣ מְאֹֽד:

צז מָֽה־אָהַ֥בְתִּי תוֹרָתֶ֑ךָ, כׇּל־֜הַיּ֗וֹם הִ֣יא שִׂיחָתִֽי:

צח ֖מֵאֹיְבַי תְּחַכְּמֵ֣נִי מִצְוֹתֶ֑ךָ, כִּ֖י לְעוֹלָ֣ם הִיא־לִֽי:

צט מִכׇּל־מְלַמְּדַ֥י הִשְׂכַּ֑לְתִּי, כִּ֥י ֜עֵֽדְוֹתֶ֗יךָ שִׂ֣יחָה לִֽי:

ק מִזְּקֵנִ֥ים אֶתְבּוֹנָ֑ן, כִּ֖י פִקּוּדֶ֣יךָ נָצָֽרְתִּי:

קא מִכׇּל־אֹ֣רַח ֖רָע כָּלִ֣אתִי רַגְלָ֑י, ֜לְמַ֗עַן אֶשְׁמֹ֥ר דְּבָרֶֽךָ:

קב מִמִּשְׁפָּטֶ֥יךָ לֹא־סָ֑רְתִּי, כִּי־֜אַתָּ֗ה הוֹרֵתָֽנִי:

קג מַה־נִּמְלְצ֣וּ ֖לְחִכִּי אִמְרָתֶ֗ךָ, מִדְּבַ֥שׁ לְפִֽי:

קד מִפִּקּוּדֶ֥יךָ אֶתְבּוֹנָ֑ן, עַל־֜כֵּן שָׂנֵ֤אתִי | כׇּל־אֹ֬רַח שָֽׁקֶר:

קה נֵר־לְרַגְלִ֥י דְבָרֶ֑ךָ, ֜וְא֗וֹר לִנְתִיבָתִֽי:

קו נִשְׁבַּ֥עְתִּי וָאֲקַיֵּ֑מָה, ֜לִשְׁמֹ֗ר מִשְׁפְּטֵ֥י צִדְקֶֽךָ:

קז נַעֲנֵ֥יתִי עַד־מְאֹ֑ד, ֜יְהֹוָ֗ה חַיֵּ֥נִי כִדְבָרֶֽךָ:

קח נִדְב֣וֹת ֖פִּי רְצֵה־נָ֣א יְהֹוָ֑ה, וּֽמִשְׁפָּטֶ֥יךָ לַמְּדֵֽנִי:

קט נַפְשִׁ֣י בְכַפִּ֣י תָמִ֑יד, ֜וְתֽוֹרָתְךָ֗ לֹ֣א שָׁכָֽחְתִּי:

קי נָתְנ֬וּ רְשָׁעִ֣ים פַּ֣ח לִ֑י, ֜וּמִפִּקּוּדֶ֗יךָ לֹ֣א תָעִֽיתִי:

קיא נָחַ֣לְתִּי עֵדְוֹתֶ֣יךָ לְעוֹלָ֑ם, כִּֽי־שְׂשׂ֖וֹן לִבִּ֣י הֵֽמָּה:

קיב נָטִ֣יתִי ֖לִבִּי לַעֲשׂ֥וֹת חֻקֶּ֗יךָ, לְעוֹלָ֥ם עֵֽקֶב:

קיג סֵעֲפִ֥ים שָׂנֵ֑אתִי, וְֽתוֹרָתְךָ֥ אָהָֽבְתִּי:

קיד סִתְרִ֣י וּמָגִנִּ֣י אָ֑תָּה, לִדְבָרְךָ֥ יִחָֽלְתִּי:

קטו סֽוּרוּ מִמֶּ֥נִּי מְרֵעִ֑ים, ֜וְאֶצְּרָ֗ה מִצְוֹ֥ת אֱלֹהָֽי:

קטז סׇמְכֵ֣נִי כְאִמְרָתְךָ֣ וְאֶֽחְיֶ֑ה, וְאַל־֜תְּבִישֵׁ֗נִי מִשִּׂבְרִֽי:

קיז סְעָדֵ֥נִי וְאִוָּשֵׁ֑עָה, וְאֶשְׁעָ֖ה בְחֻקֶּ֣יךָ תָמִֽיד:

קיח ֖סָלִיתָ כׇּל־שׁוֹגִ֣ים מֵחֻקֶּ֑יךָ, כִּי־֜שֶׁקֶר תַּרְמִיתָֽם:

קיט סִגִ֗ים הִשְׁבַּ֥תָּ כׇל־רִשְׁעֵי־אָ֑רֶץ, ֜לָכֵ֗ן אָהַ֥בְתִּי עֵדֹתֶֽיךָ:

קכ סָמַ֣ר מִפַּחְדְּךָ֣ בְשָׂרִ֑י, וּמִמִּשְׁפָּטֶ֥יךָ יָרֵֽאתִי:

קכא ֖עָשִׂיתִי מִשְׁפָּ֣ט וָצֶ֑דֶק, בַּל־֜תַּנִּיחֵ֗נִי לְעֹשְׁקָֽי:

קכב עֲרֹ֣ב עַבְדְּךָ֣ לְט֑וֹב, אַל־יַעַשְׁקֻ֥נִי זֵדִֽים:

קכג ֖עֵינַי כָּל֣וּ לִישׁוּעָתֶ֑ךָ, וּלְאִמְרַ֥ת צִדְקֶֽךָ:

קכד עֲשֵׂ֖ה עִם־עַבְדְּךָ֥ כְחַסְדֶּ֗ךָ, וְחֻקֶּ֥יךָ לַמְּדֵֽנִי:

קכה עַבְדְּךָ־אָ֥נִי הֲבִינֵ֑נִי, ֜וְאֵדְעָ֗ה עֵדֹתֶֽיךָ:

קכו ֖עֵת לַעֲשׂ֣וֹת לַיהֹוָ֑ה, ֜הֵפֵ֗רוּ תּוֹרָתֶֽךָ:

קכז עַל־֖כֵּן אָהַ֣בְתִּי מִצְוֹתֶ֑יךָ מִזָּהָ֥ב וּמִפָּֽז:

קכח עַל־כֵּ֤ן | כׇּל־פִּקּ֣וּדֵי כֹ֣ל יִשָּׁ֑רְתִּי, כׇּל־אֹ֖רַח שֶׁ֣קֶר שָׂנֵֽאתִי:

קכט פְּלָא֥וֹת עֵֽדְוֹתֶ֑יךָ, עַל־֜כֵּן נְצָרָ֥תַם נַפְשִֽׁי:

קל פֵּ֖תַח־דְּבָרֶ֥יךָ יָאִ֗יר, מֵבִ֥ין פְּתָיֽיִם:

קלא פִּֽי־֖פָעַרְתִּי וָאֶשְׁאָ֑פָה, כִּ֖י לְמִצְוֹתֶ֣יךָ יָאָֽבְתִּי:

קלב פְּנֵֽה־אֵלַ֥י וְחׇנֵּ֑נִי, ֜כְּמִשְׁפָּ֗ט לְאֹהֲבֵ֥י שְׁמֶֽךָ:

קלג ֖פְּעָמַי הָכֵ֣ן בְּאִמְרָתֶ֑ךָ, וְֽאַל־תַּשְׁלֶט־בִּ֥י כׇל־אָֽוֶן:

קלד ֖פְּדֵֽנִי מֵעֹ֣שֶׁק אָדָ֑ם, ֜וְאֶשְׁמְרָ֗ה פִּקּוּדֶֽיךָ:

קלה ֖פָּנֶיךָ הָאֵ֣ר בְּעַבְדֶּ֑ךָ, ֜וְלַמְּדֵ֗נִי אֶת־חֻקֶּֽיךָ:

קלו פַּלְגֵי־֖מַיִם יָֽרְד֣וּ עֵינָ֑י, ֜עַל לֹֽא־שָׁמְר֥וּ תוֹרָתֶֽךָ:

קלז צַדִּ֣יק אַתָּ֣ה יְהֹוָ֑ה, ֜וְיָשָׁ֗ר מִשְׁפָּטֶֽיךָ:

קלח ֖צִוִּיתָ צֶ֣דֶק עֵדֹתֶ֑יךָ, וֶאֱמוּנָ֥ה מְאֹֽד:

קלט צִמְּתַ֥תְנִי קִנְאָתִ֑י, כִּי־שָׁכְח֖וּ דְבָרֶ֣יךָ צָרָֽי:

קמ צְרוּפָ֖ה אִמְרָתְךָ֥ מְאֹ֗ד, וְֽעַבְדְּךָ֥ אֲהֵבָֽהּ:

קמא צָעִ֣יר אָנֹכִ֣י וְנִבְזֶ֑ה, ֜פִּקֻּדֶ֗יךָ לֹ֣א שָׁכָֽחְתִּי:

קמב צִדְקָֽתְךָ֣ צֶ֣דֶק לְעוֹלָ֑ם, וְֽתוֹרָתְךָ֥ אֱמֶֽת:

קמג צַר־וּמָצ֥וֹק מְצָא֑וּנִי, ֜מִצְוֹתֶ֗יךָ שַׁעֲשֻׁעָֽי:

קמד צֶ֖דֶק עֵדְוֹתֶ֥יךָ לְ֜עוֹלָ֗ם, הֲבִינֵ֥נִי וְאֶחְיֶֽה:

קמה קָרָ֣אתִי בְכׇל־֖לֵב עֲנֵ֥נִי יְהֹוָ֗ה, חֻקֶּ֥יךָ אֶצֹּֽרָה:

קמו קְרָאתִ֥יךָ הוֹשִׁיעֵ֑נִי, ֜וְאֶשְׁמְרָ֗ה עֵֽדֹתֶֽיךָ:

קמז קִדַּ֣מְתִּי ֖בַנֶּשֶׁף וָאֲשַׁוֵּ֑עָה, לִדְבָרךָ֥ לדְברְיך יִחָֽלְתִּי:

קמח קִדְּמ֣וּ ֖עֵינַי אַשְׁמֻר֑וֹת, ֜לָשִׂ֗יחַ בְּאִמְרָתֶֽךָ:

קמט ֖קוֹלִי שִׁמְעָ֣ה כְחַסְדֶּ֑ךָ, ֜יְהֹוָ֗ה כְּֽמִשְׁפָּטֶ֥ךָ חַיֵּֽנִי:

קנ ֖קָרְבוּ רֹדְפֵ֣י זִמָּ֑ה, מִתּוֹרָתְךָ֥ רָחָֽקוּ:

קנא קָר֣וֹב אַתָּ֣ה יְהֹוָ֑ה, וְֽכׇל־מִצְוֹתֶ֥ךָ אֱמֶֽת:

קנב קֶ֣דֶם ֖יָדַעְתִּי מֵעֵדֹתֶ֑יךָ, כִּ֖י לְעוֹלָ֣ם יְסַדְתָּֽם:

קנג רְאֵֽה־עׇנְיִ֥י וְחַלְּצֵ֑נִי, כִּי־֜תֽוֹרָתְךָ֗ לֹ֣א שָׁכָֽחְתִּי:

קנד רִיבָ֣ה ֖רִיבִי וּגְאָלֵ֑נִי, לְאִמְרָתְךָ֥ חַיֵּֽנִי:

קנה רָח֣וֹק מֵרְשָׁעִ֣ים יְשׁוּעָ֑ה, כִּֽי־֜חֻקֶּ֗יךָ לֹ֣א דָרָֽשׁוּ:

קנו רַחֲמֶ֖יךָ רַבִּ֥ים | יְהֹוָ֑ה, כְּֽמִשְׁפָּטֶ֥יךָ חַיֵּֽנִי:

קנז ֖רַבִּים רֹדְפַ֣י וְצָרָ֑י, ֜מֵעֵדְוֹתֶ֗יךָ לֹ֣א נָטִֽיתִי:

קנח רָאִ֣יתִי ֖בֹֽגְדִים וָֽאֶתְקוֹטָ֑טָה, אֲשֶׁ֥ר ֜אִמְרָתְךָ֗ לֹ֣א שָׁמָֽרוּ:

קנט ֖רְאֵה כִּי־פִקּוּדֶ֣יךָ אָהָ֑בְתִּי, ֜יְהֹוָ֗ה כְּֽחַסְדְּךָ֥ חַיֵּֽנִי:

קס רֹאשׁ־דְּבָרְךָ֥ אֱמֶ֑ת, ֜וּלְעוֹלָ֗ם כׇּל־מִשְׁפַּ֥ט צִדְקֶֽךָ:

קסא ֖שָׂרִים רְדָפ֣וּנִי חִנָּ֑ם, ֜וּמִדּבָרךָ֗ ומדְברְיך פָּחַ֥ד לִבִּֽי:

קסב שָׂ֣שׂ ֖אָנֹכִֽי עַל־אִמְרָתֶ֑ךָ, ֜כְּמוֹצֵ֗א שָׁלָ֥ל רָֽב:

קסג שֶׁ֣קֶר ֖שָׂנֵאתִי וַאֲתַעֵ֑בָה, תּוֹרָתְךָ֥ אָהָֽבְתִּי:

קסד שֶׁ֣בַע ֖בַּיּוֹם הִלַּלְתִּ֑יךָ, ֜עַל מִשְׁפְּטֵ֥י צִדְקֶֽךָ:

קסה שָׁל֣וֹם ֖רָב לְאֹהֲבֵ֣י תֽוֹרָתֶ֑ךָ, וְאֵֽין־לָ֥מוֹ מִכְשֽׁוֹל:

קסו שִׂבַּ֣רְתִּי לִישׁוּעָתְךָ֣ יְהֹוָ֑ה, וּֽמִצְוֹתֶ֥יךָ עָשִֽׂיתִי:

קסז שָֽׁמְרָ֣ה ֖נַפְשִׁי עֵדֹתֶ֑יךָ, וָאֹהֲבֵ֥ם מְאֹֽד:

קסח שָׁמַ֣רְתִּי ֖פִקּוּדֶיךָ וְעֵֽדֹתֶ֑יךָ, כִּ֖י כׇל־דְּרָכַ֣י נֶגְדֶּֽךָ:

קסט תִּקְרַ֤ב רִנָּתִ֣י לְפָנֶ֣יךָ יְהֹוָ֑ה, כִּדְבָרְךָ֥ הֲבִינֵֽנִי:

קע תָּב֣וֹא תְחִנָּתִ֣י לְפָנֶ֑יךָ, ֜כְּאִמְרָתְךָ֗ הַצִּילֵֽנִי:

קעא תַּבַּ֣עְנָה שְׂפָתַ֣י תְּהִלָּ֑ה, כִּ֖י תְלַמְּדֵ֣נִי חֻקֶּֽיךָ:

קעב תַּ֣עַן ֖לְשׁוֹנִי אִמְרָתֶ֑ךָ, כִּ֖י כׇל־מִצְוֹתֶ֣יךָ צֶֽדֶק:

קעג תְּהִי־יָדְךָ֥ לְעׇזְרֵ֑נִי, כִּ֖י פִקּוּדֶ֣יךָ֥ בָחָֽרְתִּי:

קעד תָּאַ֣בְתִּי לִישׁוּעָתְךָ֣ יְהֹוָ֑ה, ֜וְתוֹרָֽתְךָ֗ שַׁעֲשֻׁעָֽי:

קעה תְּֽחִי־֖נַפְשִׁי וּֽתְהַלְלֶ֑ךָּ, וּֽמִשְׁפָּטֶ֥ךָ יַעְזְרֻֽנִי:

קעו תָּעִ֗יתִי כְּשֶׂ֣ה ֖אֹבֵד בַּקֵּ֣שׁ עַבְדֶּ֑ךָ, כִּ֥י ֜מִצְוֹתֶ֗יךָ לֹ֣א שָׁכָֽחְתִּי:

עַל יְדֵי זֶה שֶׁיֵּשׁ אַהֲבָה וְשָׁלוֹם, עַל יְדֵי זֶה יוּכַל לְדַבֵּר בִּתְּפִלָּה: (לקו"מ על פס' ז)

א שִׁ֗יר הַֽמַּ֫עֲל֥וֹת, אֶל־֖יְהֹוָה בַּצָּרָ֣תָה לִּ֑י ֜קָרָ֗אתִי וַֽיַּעֲנֵֽנִי:

ב יְֽהֹוָ֗ה, הַצִּ֣ילָה ֖נַפְשִׁי מִשְּׂפַת־שֶׁ֑קֶר, מִלָּשׁ֥וֹן רְמִיָּֽה:

ג מַה־יִּתֵּ֣ן ֖לְךָ וּמַה־יֹּסִ֥יף לָ֗ךְ, לָשׁ֥וֹן רְמִיָּֽה:

ד חִצֵּ֣י גִבּ֣וֹר שְׁנוּנִ֑ים, ֜עִם גַּחֲלֵ֥י רְתָמִֽים:

ה אֽוֹיָה־֖לִּי כִּי־גַ֣רְתִּי מֶ֑שֶׁךְ, ֜שָׁכַ֗נְתִּי עִֽם־אָהֳלֵ֥י קֵדָֽר:

ו ֖רַבַּת שָֽׁכְנָה־לָּ֣הּ נַפְשִׁ֑י, ֜עִ֗ם שׂוֹנֵ֥א שָׁלֽוֹם:

ז אֲֽנִי־֖שָׁלוֹם, וְכִ֣י אֲדַבֵּ֑ר ֜הֵמָּה לַמִּלְחָמָֽה:

בְּכָל מָקוֹם יְכוֹלִין לִהְיוֹת סְמוּכִין אֵלָיו יִתְבָּרַךְ אֲפִלּוּ בִּשְׁאוֹל תַּחְתִּיּוֹת חַס וְשָׁלוֹם, וּצְרִיכִין לִזָּהֵר לֵילֵךְ בָּזֶה כָּל אָדָם שֶׁבָּעוֹלָם, כִּי הוּא יְסוֹד הַכֹּל: (לקו"ה על פס' ד)

א שִׁ֗יר לַמַּ֫עֲל֥וֹת, אֶשָּׂ֣א ֖עֵינַי אֶל־הֶֽהָרִ֑ים, ֜מֵאַ֗יִן יָבֹ֥א עֶזְרִֽי:

ב ֖עֶזְרִי מֵעִ֣ם יְהֹוָ֑ה, ֜עֹשֵׂ֗ה שָׁמַ֥יִם וָאָֽרֶץ:

ג אַל־יִתֵּ֣ן לַמּ֣וֹט רַגְלֶ֑ךָ, אַל־֜יָנ֗וּם שֹׁמְרֶֽךָ:

ד הִנֵּ֣ה לֹֽא־֖יָנוּם וְלֹ֣א יִישָׁ֑ן, ֜שׁוֹמֵ֗ר יִשְׂרָאֵֽל:

ה יְהֹוָ֥ה שֹׁמְרֶ֑ךָ, יְהֹוָ֥ה ֜צִלְּךָ֗ עַל־יַ֥ד יְמִינֶֽךָ:

ו יוֹמָ֗ם הַשֶּׁ֥מֶשׁ לֹא־יַכֶּ֗כָּה, וְיָרֵ֥חַ בַּלָּֽיְלָה:

ז יְֽהֹוָ֗ה יִשְׁמׇרְךָ֥ מִכׇּל־רָ֑ע, ֜יִשְׁמֹ֗ר אֶת־נַפְשֶֽׁךָ:

ח יְֽהֹוָ֗ה יִשְׁמׇר־צֵאתְךָ֥ וּבוֹאֶ֑ךָ, ֜מֵעַתָּ֗ה וְעַד־עוֹלָֽם:

עַל יְדֵי תְּפִלָּה יְכוֹלִין לְהִתְקָרֵב תָּמִיד לַה' יִתְבָּרַךְ אֲפִלּוּ אִם הוּא כְּמוֹ שֶׁהוּא: (לקו"ה על פס' ב)

א שִׁ֥יר הַֽמַּעֲל֗וֹת לְדָ֫וִ֥ד, ֖שָׂמַחְתִּי בְּאֹמְרִ֣ים לִ֑י, בֵּ֖ית יְהֹוָ֣ה נֵלֵֽךְ:

ב ֖עֹמְדוֹת הָי֣וּ רַגְלֵ֑ינוּ ֜בִּשְׁעָרַ֗יִךְ יְרוּשָׁלִָֽם:

ג יְֽרוּשָׁלִַ֥ם הַבְּנוּיָ֑ה, ֜כְּעִ֗יר שֶֽׁחֻבְּרָה־לָּ֥הּ יַחְדָּֽו:

ד שֶׁשָּׁ֨ם עָל֪וּ שְׁבָטִ֡ים שִׁבְטֵי־֖יָהּ, עֵד֣וּת לְיִשְׂרָאֵ֑ל, ֜לְהֹד֗וֹת לְשֵׁ֣ם יְהֹוָֽה:

ה כִּ֤י שָׁ֨מָּה | יָשְׁב֣וּ כִסְא֣וֹת לְמִשְׁפָּ֑ט, ֜כִּסְא֗וֹת לְבֵ֣ית דָּוִֽד:

ו ֖שַׁאֲלוּ שְׁל֣וֹם יְרוּשָׁלִָ֑ם, ֜יִשְׁלָ֗יוּ אֹהֲבָֽיִךְ:

ז יְהִֽי־שָׁל֥וֹם בְּחֵילֵ֑ךְ, ֜שַׁלְוָ֗ה בְּאַרְמְנוֹתָֽיִךְ:

ח ֖לְמַעַן אַחַ֣י וְרֵעָ֑י, אֲדַבְּרָה־נָּ֖א שָׁל֣וֹם בָּֽךְ:

ט ֖לְמַעַן בֵּית־יְהֹוָ֣ה אֱלֹהֵ֑ינוּ, אֲבַקְשָׁ֖ה ט֣וֹב לָֽךְ:

כְּמוֹ שֶׁהָאָדָם מִסְתַּכֵּל בְּעֵינָיו תָּמִיד לַה' יִתְבָּרַךְ, כְּמוֹ כֵן ה' יִתְבָּרַךְ מַשְׁגִּיחַ בְּעֵינֵי הַשְׁגָּחָתוֹ יִתְבָּרַךְ עָלֵינוּ תָּמִיד: (לקו"ה על פס' א-ב)

א שִׁ֗יר הַֽמַּ֫עֲל֥וֹת, ֖אֵלֶיךָ נָשָׂ֣אתִי אֶת־עֵינַ֑י, ֜הַיֹּשְׁבִ֗י בַּשָּׁמָֽיִם:

ב הִנֵּ֨ה כְעֵינֵ֪י עֲבָדִ֡ים אֶל־יַ֤ד אֲֽדוֹנֵיהֶ֗ם, כְּעֵינֵ֣י שִׁפְחָה֘ אֶל־יַ֪ד גְּבִ֫רְתָּ֥הּ, כֵּ֣ן ֖עֵינֵינוּ אֶל־יְהֹוָ֣ה אֱלֹהֵ֑ינוּ, ֜עַד שֶׁיְּחׇנֵּֽנוּ:

ג חׇנֵּ֣נוּ יְהֹוָ֣ה חׇנֵּ֑נוּ, כִּי־֜רַ֗ב שָׂבַ֥עְנוּ בֽוּז:

ד רַבַּת֘ שָֽׂבְעָה־לָּ֪הּ נַ֫פְשֵׁ֥נוּ, הַלַּ֥עַג הַשַּֽׁאֲנַנִּ֑ים, ֜הַבּ֗וּז לִגְאֵ֥י יוֹנִֽים לגאיונים:

הָעִקָּר לְהִתְגַּבֵּר בְּשִׂמְחָה עַל יְדֵי כָּל הַהַרְחָבוֹת וְהַיְשׁוּעוֹת שֶׁיִּמְצָא בְּתוֹךְ הַצָּרוֹת בְּעַצְמוֹ, וְיָבִין מֵהֶם עֶזְרָתוֹ וִישׁוּעָתוֹ יִתְבָּרַךְ: (לקו"ה על פס' ב, ו)

א שִׁ֥יר הַֽמַּעֲל֗וֹת לְדָ֫וִ֥ד, לוּלֵ֣י ֖יְהֹוָה שֶׁהָ֣יָה לָ֑נוּ, יֹֽאמַר־֜נָא יִשְׂרָאֵֽל:

ב לוּלֵ֣י ֖יְהֹוָה שֶׁהָ֣יָה לָ֑נוּ, בְּק֖וּם עָלֵ֣ינוּ אָדָֽם:

ג ֖אֲזַי חַיִּ֣ים בְּלָע֑וּנוּ, בַּֽחֲר֖וֹת אַפָּ֣ם בָּֽנוּ:

ד ֖אֲזַֽי הַמַּ֣יִם שְׁטָפ֑וּנוּ, ֜נַ֗חְלָה עָבַ֥ר עַל־נַפְשֵֽׁנוּ:

ה ֖אֲזַי עָבַ֣ר עַל־נַפְשֵׁ֑נוּ, ֜הַמַּ֗יִם הַזֵּדוֹנִֽים:

ו בָּר֥וּךְ יְהֹוָ֑ה, שֶׁלֹּ֥א נְתָנָ֥נוּ ֜טֶרֶף לְשִׁנֵּיהֶֽם:

ז נַפְשֵׁ֗נוּ כְּצִפּ֥וֹר נִמְלְטָה֘ מִפַּ֪ח י֫וֹקְשִׁ֥ים, הַפַּ֥ח נִשְׁבָּ֗ר וַאֲנַ֥חְנוּ נִמְלָֽטְנוּ:

ח ֖עֶזְרֵֽנוּ בְּשֵׁ֣ם יְהֹוָ֑ה, ֜עֹשֵׂ֗ה שָׁמַ֥יִם וָאָֽרֶץ:

עַל יְדֵי הַשָּׁלוֹם יְכוֹלִין לְהַמְשִׁיךְ כָּל הָעוֹלָם לַעֲבוֹדָתוֹ יִתְבָּרַךְ: (לקו"ה על פס' ה)

א שִׁ֗יר הַֽמַּ֫עֲל֥וֹת, הַבֹּטְחִ֥ים בַּיהֹוָ֑ה כְּֽהַר־צִיּ֥וֹן לֹא־֜יִמּ֗וֹט, לְעוֹלָ֥ם יֵשֵֽׁב:

ב יְֽרוּשָׁלִַ֗ם הָרִֽים֘ סָבִ֪יב לָ֥הּ, ֖וַֽיהֹוָה סָבִ֣יב לְעַמּ֑וֹ ֜מֵעַתָּ֗ה וְעַד־עוֹלָֽם:

ג כִּ֤י לֹ֪א יָנ֡וּחַ שֵׁ֤בֶט הָרֶ֗שַׁע עַל֘ גּוֹרַ֪ל הַצַּדִּ֫יקִ֥ים, לְמַ֡עַן לֹֽא־יִשְׁלְח֖וּ הַצַּדִּיקִ֨ים בְּעַוְלָ֬תָה יְדֵיהֶֽם:

ד הֵיטִ֣יבָה ֖יְהֹוָה לַטּוֹבִ֑ים, ֜וְלִֽישָׁרִ֗ים בְּלִבּוֹתָֽם:

ה וְהַמַּטִּ֤ים עֲֽקַלְקַלּוֹתָ֗ם יוֹלִיכֵ֣ם ֖יְהֹוָה אֶת־פֹּעֲלֵ֣י הָאָ֑וֶן, ֜שָׁל֗וֹם עַל־יִשְׂרָאֵֽל:

כָּל אָדָם צָרִיךְ לְשַׂמֵּחַ עַצְמוֹ בְּכָל יוֹם בָּזֶה, בְּהַנִּסִּים וְהַיְשׁוּעוֹת שֶׁל עָבַר וְהוֹוֶה וְעָתִיד: (לקו"ה על פס' ב)

א שִׁ֗יר הַֽמַּ֫עֲל֥וֹת, בְּשׁ֣וּב ֖יְהֹוָה אֶת־שִׁיבַ֣ת צִיּ֑וֹן, ֜הָיִ֗ינוּ כְּחֹלְמִֽים:

ב אָ֤ז יִמָּלֵ֪א שְׂח֡וֹק פִּינוּ֘ וּלְשׁוֹנֵ֪נוּ רִ֫נָּ֥ה, ֖אָז יֹאמְר֣וּ בַגּוֹיִ֑ם, הִגְדִּ֥יל ֜יְהֹוָ֗ה לַעֲשׂ֥וֹת עִם־אֵֽלֶּה:

ג הִגְדִּ֣יל ֖יְהֹוָה לַעֲשׂ֥וֹת ֜עִמָּ֗נוּ, הָיִ֥ינוּ שְׂמֵחִֽים:

ד שׁוּבָ֣ה ֖יְהֹוָה אֶת־שׁבִיתֵ֑נוּ שְבותנו, כַּאֲפִיקִ֥ים בַּנֶּֽגֶב:

ה הַזֹּרְעִ֥ים בְּדִמְעָ֗ה בְּרִנָּ֥ה יִקְצֹֽרוּ:

ו הָ֘ל֤וֹךְ יֵלֵ֨ךְ | וּבָכֹה֘ נֹשֵׂ֪א מֶֽשֶׁךְ־הַ֫זָּ֥רַע, בֹּֽא־יָבֹ֥א בְרִנָּ֑ה ֜נֹשֵׂ֗א אֲלֻמֹּתָֽיו:

כְּשֶׁזּוֹכֵר בַּה' יִתְבָּרַךְ וּמַמְשִׁיךְ אֱלֹקוּתוֹ בְּכָל דָּבָר, עַל יְדֵי זֶה נִשְׁמָר הַדָּבָר מִכָּל רַע: (לקו"ה על פס' א)

א שִׁ֥יר הַֽמַּעֲל֗וֹת לִשְׁלֹ֫מֹ֥ה, אִם־יְהֹוָ֤ה | לֹֽא־יִבְנֶ֬ה בַ֗יִת שָׁ֤וְא עָמְל֣וּ בוֹנָ֣יו בּ֑וֹ, אִם־יְהֹוָ֥ה לֹֽא־יִשְׁמׇר־֜עִ֗יר שָׁ֤וְא | שָׁקַ֬ד שׁוֹמֵֽר:

ב שָׁ֤וְא לָכֶ֨ם מַשְׁכִּ֪ימֵי ק֡וּם, מְאַֽחֲרֵי־שֶׁ֗בֶת, ֖אֹֽכְלֵי לֶ֣חֶם הָֽעֲצָבִ֑ים, כֵּ֤ן יִתֵּ֖ן לִידִיד֣וֹ שֵׁנָֽא:

ג הִנֵּ֤ה נַחֲלַ֣ת יְהֹוָ֣ה בָּנִ֑ים, ֜שָׂכָ֗ר פְּרִ֣י הַבָּֽטֶן:

ד כְּחִצִּ֥ים בְּיַד־גִּבּ֑וֹר, ֜כֵּ֗ן בְּנֵ֣י הַנְּעוּרִֽים:

ה אַשְׁרֵ֤י הַגֶּ֗בֶר אֲשֶׁ֤ר מִלֵּ֥א אֶת־אַשְׁפָּת֗וֹ מֵ֫הֶ֥ם, לֹֽא־יֵבֹ֑שׁוּ כִּֽי־יְדַבְּר֖וּ אֶת־אוֹיְבִ֣ים בַּשָּֽׁעַר:

צְרִיכִין רַק לִתְלוֹת עֵינָיו לַמָּרוֹם בְּכָל יוֹם תָּמִיד: (לקו"ה על פס' ב)

א שִׁ֗יר הַֽמַּ֫עֲל֥וֹת, ֖אַשְׁרֵֽי כׇּל־יְרֵ֣א יְהֹוָ֑ה ֜הַֽהֹלֵ֗ךְ בִּדְרָכָֽיו:

ב יְגִ֣יעַ ֖כַּפֶּיךָ כִּ֣י תֹאכֵ֑ל, ֜אַשְׁרֶ֗יךָ וְט֣וֹב לָֽךְ:

ג אֶשְׁתְּךָ֤ | כְּגֶ֥פֶן פֹּרִיָּה֘ בְּיַרְכְּתֵ֪י בֵ֫יתֶ֥ךָ, ֖בָּנֶיךָ כִּשְׁתִלֵ֣י זֵיתִ֑ים ֜סָבִ֗יב לְשֻׁלְחָנֶֽךָ:

ד הִנֵּ֣ה כִי־֖כֵן יְבֹ֥רַךְ גָּ֗בֶר, יְרֵ֣א יְהֹוָֽה:

ה יְבָרֶכְךָ֥ יְהֹוָ֗ה מִצִּ֫יּ֥וֹן, ֖וּרְאֵה בְּט֣וּב יְרֽוּשָׁלִָ֑ם ֜כֹּל יְמֵ֣י חַיֶּֽיךָ:

ו וּרְאֵֽה־בָנִ֥ים לְבָנֶ֑יךָ, ֜שָׁל֗וֹם עַל־יִשְׂרָאֵֽל:

כְּשֶׁיֵּשׁ לוֹ אֱמוּנָה בִּשְׁלֵמוּת הוּא גוֹדֵל וְצוֹמֵחַ בַּעֲבוֹדָתוֹ יִתְבָּרַךְ אֲפִלּוּ אִם יַעֲבֹר עָלָיו מָה: (לקו"ע על פס' ו)

א שִׁ֗יר הַֽמַּ֫עֲל֥וֹת, ֖רַבַּת צְרָר֣וּנִי מִנְּעוּרַ֑י, יֹֽאמַר־֜נָ֗א יִשְׂרָאֵֽל:

ב ֖רַבַּת צְרָר֣וּנִי מִנְּעוּרָ֑י, ֜גַּם לֹא־יָ֥כְלוּ לִֽי:

ג עַל־֖גַּבִּי חָרְשׁ֣וּ חֹרְשִׁ֑ים, ֜הֶאֱרִ֗יכוּ למַעֲנִיתָֽם לְמענותם:

ד יְהֹוָ֥ה צַדִּ֑יק, ֜קִצֵּ֗ץ עֲב֣וֹת רְשָׁעִֽים:

ה ֖יֵבֹשׁוּ וְיִסֹּ֣גוּ אָח֑וֹר, ֜כֹּ֗ל שֹׂנְאֵ֥י צִיּֽוֹן:

ו ֖יִהְיוּ כַּחֲצִ֣יר גַּגּ֑וֹת, שֶׁקַּדְמַ֖ת שָׁלַ֣ף יָבֵֽשׁ:

ז שֶׁלֹּ֤א מִלֵּ֖א כַפּ֥וֹ קוֹצֵ֗ר, וְחִצְנ֥וֹ מְעַמֵּֽר:

ח וְלֹ֤א אָמְר֨וּ | הָעֹבְרִ֗ים בִּרְכַּֽת־יְהֹוָ֥ה אֲלֵיכֶ֑ם, בֵּרַ֥כְנוּ ֜אֶתְכֶ֗ם בְּשֵׁ֣ם יְהֹוָֽה:

מִכָּל מִינֵי עֲמָקִים צְרִיכִין רַק לִצְעֹק וְלִקְרֹא לַה' כְּדֵי לִזְכּוֹת לְדַרְכֵּי הַפְּשִׁיטוּת וְהַתְּמִימוּת: (לקו"ה על פס' א)

א שִׁ֥יר הַֽמַּעֲל֑וֹת, מִמַּעֲמַקִּ֖ים קְרָאתִ֣יךָ יְהֹוָֽה:

ב אֲדֹנָי֘ שִׁמְעָ֪ה בְק֫וֹלִ֥י, תִּֽהְיֶ֣ינָה ֖אׇזְנֶיךָ קַשֻּׁב֑וֹת ֜לְק֗וֹל תַּחֲנוּנָֽי:

ג אִם־עֲוֹנ֥וֹת תִּשְׁמׇר־יָ֑הּ, ֜אֲדֹנָ֗י מִ֣י יַעֲמֹֽד:

ד כִּֽי־עִמְּךָ֥ הַסְּלִיחָ֑ה, ֜לְמַ֗עַן תִּוָּרֵֽא:

ה קִוִּ֣יתִי ֖יְהֹוָה קִוְּתָ֣ה נַפְשִׁ֑י, וְֽלִדְבָר֥וֹ הוֹחָֽלְתִּי:

ו נַפְשִׁ֥י לַֽאדֹנָ֑י, מִשֹּׁמְרִ֥ים ֜לַבֹּ֗קֶר, שֹׁמְרִ֥ים לַבֹּֽקֶר:

ז יַחֵ֥ל יִשְׂרָאֵ֗ל אֶל־יְהֹ֫וָ֥ה, כִּֽי־עִם־יְהֹוָ֥ה הַחֶ֑סֶד, וְהַרְבֵּ֖ה עִמּ֣וֹ פְדֽוּת:

ח ֖וְהוּא יִפְדֶּ֣ה אֶת־יִשְׂרָאֵ֑ל ֜מִכֹּ֗ל עֲוֹנֹתָֽיו:

הָעִקָּר שֶׁצְּרִיכִין לֵידַע וּלְהַאֲמִין שֶׁאֵין יוֹדְעִין כְּלוּם וּבְכָל יוֹם וּבְכָל עֵת נַעֲשִׂין חֲדָשׁוֹת לְגַמְרֵי: (לקו"ה על פס' ב)

א שִׁ֥יר הַֽמַּעֲל֗וֹת לְדָ֫וִ֥ד, יְהֹוָ֤ה | לֹא־גָבַ֣הּ ֖לִבִּֽי וְלֹֽא־רָמ֣וּ עֵינַ֑י, וְלֹֽא־הִלַּ֓כְתִּי | בִּגְדֹל֖וֹת וּבְנִפְלָא֣וֹת מִמֶּֽנִּי:

ב אִם־לֹ֤א שִׁוִּ֨יתִי | וְדוֹמַ֗מְתִּי נַ֫פְשִׁ֥י, ֖כְּגָמֻל עֲלֵ֣י אִמּ֑וֹ, כַּגָּמֻ֖ל עָלַ֣י נַפְשִֽׁי:

ג יַחֵ֣ל ֖יִשְׂרָאֵל אֶל־יְהֹוָ֑ה, ֜מֵעַתָּ֗ה וְעַד־עוֹלָֽם:

עַל יְדֵי תְּפִלָּה זוֹכִין לִשָּׁאֵר קַיָּם עַל עָמְדוֹ תָּמִיד אֲפִלּוּ אִם יִהְיֶה אֵיךְ שֶׁיִּהְיֶה: (לקו"ה על פס' ד)

א שִׁ֗יר הַֽמַּ֫עֲל֥וֹת, זְכוֹר־יְהֹוָ֥ה לְדָוִ֑ד ֜אֵת כׇּל־עֻנּוֹתֽוֹ:

ב אֲשֶׁ֣ר ֖נִשְׁבַּע לַיהֹוָ֑ה, ֜נָדַ֗ר לַאֲבִ֥יר יַעֲקֹֽב:

ג אִם־֖אָבֹא בְּאֹ֣הֶל בֵּיתִ֑י, אִם־֜אֶעֱלֶ֗ה עַל־עֶ֥רֶשׂ יְצוּעָֽי:

ד אִם־אֶתֵּ֣ן שְׁנַ֣ת לְעֵינָ֑י, לְעַפְעַפַּ֥י תְּנוּמָֽה:

ה עַד־אֶמְצָ֣א ֖מָקֽוֹם לַיהֹוָ֑ה, ֜מִשְׁכָּנ֗וֹת לַאֲבִ֥יר יַעֲקֹֽב:

ו הִנֵּֽה־שְׁמַעֲנ֥וּהָ בְאֶפְרָ֑תָה, ֜מְצָאנ֗וּהָ בִּשְׂדֵי־יָֽעַר:

ז נָב֥וֹאָה לְמִשְׁכְּנוֹתָ֑יו, ֜נִשְׁתַּֽחֲוֶ֗ה לַהֲדֹ֥ם רַגְלָֽיו:

ח קוּמָ֣ה ֖יְהֹוָה לִמְנוּחָתֶ֑ךָ, ֜אַתָּ֗ה וַאֲר֥וֹן עֻזֶּֽךָ:

ט כֹּהֲנֶ֥יךָ יִלְבְּשׁוּ־צֶ֑דֶק, וַחֲסִידֶ֥יךָ יְרַנֵּֽנוּ:

י ֖בַּעֲבוּר דָּוִ֣ד עַבְדֶּ֑ךָ, אַל־֜תָּשֵׁ֗ב פְּנֵ֣י מְשִׁיחֶֽךָ:

יא נִשְׁבַּֽע־יְהֹוָ֨ה | לְדָוִ֡ד אֱמֶת֘ לֹֽא־יָשׁ֪וּב מִ֫מֶּ֥נָּה, מִפְּרִ֥י בִטְנְךָ֑ ֜אָשִׁ֗ית לְכִסֵּא־לָֽךְ:

יב אִֽם־יִשְׁמְר֬וּ בָנֶ֨יךָ | בְּרִיתִי֘, וְעֵדֹתִ֥י ז֗וֹ אֲלַ֫מְּדֵ֥ם, גַּם־בְּנֵיהֶ֥ם עֲדֵי־עַ֑ד ֜יֵשְׁב֗וּ לְכִסֵּא־לָֽךְ:

יג כִּֽי־בָחַ֣ר יְהֹוָ֣ה בְּצִיּ֑וֹן, ֜אִוָּ֗הּ לְמוֹשָׁ֥ב לֽוֹ:

יד זֹאת־מְנוּחָתִ֥י עֲדֵי־עַ֑ד, פֹּֽה־֜אֵשֵׁ֗ב כִּ֣י אִוִּתִֽיהָ:

טו ֖צֵידָה בָּרֵ֣ךְ אֲבָרֵ֑ךְ, ֜אֶבְיוֹנֶ֗יהָ אַשְׂבִּ֥יעַ לָֽחֶם:

טז ֖וְֽכֹהֲנֶיהָ אַלְבִּ֣ישׁ יֶ֑שַׁע, ֜וַחֲסִידֶ֗יהָ רַנֵּ֥ן יְרַנֵּֽנוּ:

יז שָׁ֤ם אַצְמִ֣יחַ קֶ֣רֶן לְדָוִ֑ד, עָרַ֥כְתִּי ֜נֵר לִמְשִׁיחִֽי:

יח ֖אוֹיְבָיו אַלְבִּ֣ישׁ בֹּ֑שֶׁת, ֜וְעָלָ֗יו יָצִ֥יץ נִזְרֽוֹ:

צָרִיךְ הָאָדָם לִנְהֹג כָּל יְמֵי חַיָּיו שֶׁכָּל יוֹם וָיוֹם שֶׁהוּא מַזְקִין יוֹתֵר, יָאִיר בְּיוֹתֵר בַּעֲבוֹדַת ה': (לקו"ה על פס' ב)

א שִׁ֥יר הַֽמַּעֲל֗וֹת לְדָ֫וִ֥ד, הִנֵּ֣ה מַה־֖טּוֹב וּמַה־נָּעִ֑ים שֶׁ֖בֶת אַחִ֣ים גַּם־יָֽחַד:

ב כַּשֶּׁ֤מֶן הַטּ֨וֹב | עַל־הָרֹ֗אשׁ יֹרֵ֗ד עַֽל־הַזָּ֫קָ֥ן, זְקַֽן־אַהֲרֹ֑ן, ֜שֶׁיֹּרֵ֗ד עַל־פִּ֥י מִדּוֹתָֽיו:

ג כְּטַל־חֶרְמ֗וֹן שֶׁיֹּרֵד֘ עַל־הַרְרֵ֪י צִ֫יּ֥וֹן, כִּ֤י שָׁ֨ם | צִוָּ֣ה ֖יְהֹוָה אֶת־הַבְּרָכָ֑ה, ֜חַיִּ֗ים עַד־הָעוֹלָֽם:

עִקַּר הַקְּדֻשָּׁה, כְּשֶׁיּוֹדְעִין שֶׁהַכֹּל מֵאִתּוֹ יִתְבָּרַךְ: (לקו"ה על פס' ב)

א שִׁ֗יר הַֽמַּ֫עֲל֥וֹת, הִנֵּ֤ה | בָּרכ֣וּ אֶת־֖יְהֹוָה כׇּל־עַבְדֵ֣י יְהֹוָ֑ה, הָעֹמְדִ֥ים בְּבֵית־֜יְהֹוָ֗ה בַּלֵּילֽוֹת:

ב שְׂאֽוּ־יְדֵכֶ֥ם קֹ֑דֶשׁ, ֜וּבָרכ֗וּ אֶת־יְהֹוָֽה:

ג יְבָרֶכְךָ֣ ֖יְהֹוָה מִצִּיּ֑וֹן, ֜עֹשֵׂ֗ה שָׁמַ֥יִם וָאָֽרֶץ:

עִקַּר הַתַּכְלִית לָדַעַת וּלְהַכִּיר אוֹתוֹ יִתְבָּרַךְ וּלְבָרֵךְ וּלְהוֹדוֹת אוֹתוֹ יִתְבָּרַךְ, כִּי זֶה תָּלוּי בָּזֶה: (לקו"ה על פס' ה)

א הַ֥לְלוּ־יָ֨הּ |, ֖הַֽלְלֽוּ אֶת־שֵׁ֣ם יְהֹוָ֑ה, ֜הַֽלְל֗וּ עַבְדֵ֥י יְהֹוָֽה:

ב ֖שֶׁעֹ֣מְדִים בְּבֵ֣ית יְהֹוָ֑ה, ֜בְּחַצְר֗וֹת בֵּ֣ית אֱלֹהֵֽינוּ:

ג ֖הַֽלְלוּ־יָ֥הּ, כִּי־ט֣וֹב יְהֹוָ֑ה, זַמְּר֥וּ ֜לִשְׁמ֗וֹ כִּ֣י נָעִֽים:

ד כִּי־יַעֲקֹ֗ב בָּחַ֣ר ל֣וֹ יָ֑הּ, ֜יִשְׂרָאֵ֗ל לִסְגֻלָּתֽוֹ:

ה כִּ֤י אֲנִ֣י ֖יָדַעְתִּי כִּֽי־גָד֣וֹל יְהֹוָ֑ה, ֜וַאֲדֹנֵ֗ינוּ מִכׇּל־אֱלֹהִֽים:

ו כֹּ֤ל אֲשֶׁר־חָפֵ֥ץ יְהֹוָ֗ה עָ֫שָׂ֥ה, בַּשָּׁמַ֥יִם וּבָאָ֑רֶץ, ֜בַּיַּמִּ֗ים וְכׇל־תְּהֹמֽוֹת:

ז מַעֲלֶ֣ה נְשִׂאִים֘ מִקְצֵ֪ה הָ֫אָ֥רֶץ, בְּרָקִ֣ים לַמָּטָ֣ר עָשָׂ֑ה, מֽוֹצֵא־֜רוּחַ מֵאוֹצְרוֹתָֽיו:

ח ֖שֶֽׁהִכָּה בְּכוֹרֵ֣י מִצְרָ֑יִם, ֜מֵֽאָדָ֗ם עַד־בְּהֵמָֽה:

ט שָׁלַ֤ח | אוֹתֹ֣ת ֖וּמֹפְתִים בְּתוֹכֵ֣כִי מִצְרָ֑יִם, ֜בְּפַרְעֹ֗ה וּבְכׇל־עֲבָדָֽיו:

י ֖שֶׁהִכָּה גּוֹיִ֣ם רַבִּ֑ים, ֜וְהָרַ֗ג מְלָכִ֥ים עֲצוּמִֽים:

יא לְסִיח֤וֹן | מֶ֤לֶךְ הָאֱמֹרִ֗י, ֖וּלְעוֹג מֶ֣לֶךְ הַבָּשָׁ֑ן, ֜וּלְכֹ֗ל מַמְלְכ֥וֹת כְּנָֽעַן:

יב וְנָתַ֣ן אַרְצָ֣ם נַחֲלָ֑ה, ֜נַחֲלָ֗ה לְיִשְׂרָאֵ֥ל עַמּֽוֹ:

יג ֖יְהֹוָה שִׁמְךָ֣ לְעוֹלָ֑ם, ֜יְהֹוָ֗ה זִכְרְךָ֥ לְדֹר־וָדֹֽר:

יד כִּי־יָדִ֣ין יְהֹוָ֣ה עַמּ֑וֹ, וְעַל־֜עֲבָדָ֗יו יִתְנֶחָֽם:

טו עֲצַבֵּ֣י ֖הַגּוֹיִם כֶּ֣סֶף וְזָהָ֑ב, ֜מַעֲשֵׂ֗ה יְדֵ֣י אָדָֽם:

טז פֶּֽה־֖לָהֶם וְלֹ֣א יְדַבֵּ֑רוּ, עֵינַ֥יִם ֜לָהֶ֗ם וְלֹ֣א יִרְאֽוּ:

יז אׇזְנַ֣יִם ֖לָהֶם וְלֹ֣א יַאֲזִ֑ינוּ, ֜אַ֗ף אֵֽין־יֶשׁ־ר֥וּחַ בְּפִיהֶֽם:

יח ֖כְּמוֹהֶם יִהְי֣וּ עֹשֵׂיהֶ֑ם, כֹּ֖ל אֲשֶׁר־בֹּטֵ֣חַ בָּהֶֽם:

יט בֵּ֣ית ֖יִשְׂרָאֵל בָּרכ֣וּ אֶת־יְהֹוָ֑ה, בֵּ֥ית ֜אַהֲרֹ֗ן בָּרכ֥וּ אֶת־יְהֹוָֽה:

כ בֵּ֣ית ֖הַלֵּוִי בָּרכ֣וּ אֶת־יְהֹוָ֑ה, יִֽרְאֵ֥י ֜יְהֹוָ֗ה בָּרכ֥וּ אֶת־יְהֹוָֽה:

כא בָּ֘ר֤וּךְ יְהֹוָ֨ה | מִצִּיּ֗וֹן, שֹׁ֘כֵ֤ן יְֽרוּשָׁלִָ֗ם, הַֽלְלוּ־יָֽהּ:

בְּכָל מַה שֶּׁעוֹבֵר עַל הָאָדָם צָרִיךְ לִזְכֹּר אֶת עַצְמוֹ בְּכָל עֵת בּוֹ יִתְבָּרַךְ, וּלְהַזְכִּיר אֶת עַצְמוֹ שֶׁהוּא אִישׁ יִשְׂרְאֵלִי וּמַאֲמִין בֵּאלֹקִים חַיִּים וּמֶלֶךְ עוֹלָם: (לקו"ה על פס' ד)

א הוֹד֣וּ לַיהֹוָ֣ה כִּי־ט֑וֹב, כִּ֖י לְעוֹלָ֣ם חַסְדּֽוֹ:

ב ֖הוֹדוּ לֵאלֹהֵ֣י הָאֱלֹהִ֑ים, כִּ֖י לְעוֹלָ֣ם חַסְדּֽוֹ:

ג ֖הוֹדוּ לַאֲדֹנֵ֣י הָאֲדֹנִ֑ים, כִּ֖י לְעוֹלָ֣ם חַסְדּֽוֹ:

ד לְעֹ֘שֵׂ֤ה נִפְלָא֣וֹת גְּדֹל֣וֹת לְבַדּ֑וֹ, כִּ֖י לְעוֹלָ֣ם חַסְדּֽוֹ:

ה לְעֹשֵׂ֣ה ֖הַשָּׁמַֽיִם בִּתְבוּנָ֑ה, כִּ֖י לְעוֹלָ֣ם חַסְדּֽוֹ:

ו לְרֹקַ֣ע ֖הָאָרֶץ עַל־הַמָּ֑יִם, כִּ֖י לְעוֹלָ֣ם חַסְדּֽוֹ:

ז ֖לְעֹשֵׂה אוֹרִ֣ים גְּדֹלִ֑ים, כִּ֖י לְעוֹלָ֣ם חַסְדּֽוֹ:

ח אֶת־֖הַשֶּׁמֶשׁ לְמֶמְשֶׁ֣לֶת בַּיּ֑וֹם, כִּ֖י לְעוֹלָ֣ם חַסְדּֽוֹ:

ט אֶת־הַיָּרֵ֣חַ ֖וְכוֹכָבִים לְמֶמְשְׁל֣וֹת בַּלָּ֑יְלָה, כִּ֖י לְעוֹלָ֣ם חַסְדּֽוֹ:

י לְמַכֵּ֣ה ֖מִצְרַיִם בִּבְכוֹרֵיהֶ֑ם, כִּ֖י לְעוֹלָ֣ם חַסְדּֽוֹ:

יא וַיּוֹצֵ֣א ֖יִשְׂרָאֵל מִתּוֹכָ֑ם, כִּ֖י לְעוֹלָ֣ם חַסְדּֽוֹ:

יב בְּיָ֣ד ֖חֲזָקָה וּבִזְר֣וֹעַ נְטוּיָ֑ה, כִּ֖י לְעוֹלָ֣ם חַסְדּֽוֹ:

יג לְגֹזֵ֣ר יַם־֖סוּף לִגְזָרִ֑ים, כִּ֖י לְעוֹלָ֣ם חַסְדּֽוֹ:

יד וְהֶעֱבִ֣יר יִשְׂרָאֵ֣ל בְּתוֹכ֑וֹ, כִּ֖י לְעוֹלָ֣ם חַסְדּֽוֹ:

טו וְנִ֘עֵ֤ר פַּרְעֹ֣ה וְחֵיל֣וֹ בְיַם־ס֑וּף, כִּ֖י לְעוֹלָ֣ם חַסְדּֽוֹ:

טז לְמוֹלִ֣יךְ ֖עַמּוֹ בַּמִּדְבָּ֑ר, כִּ֖י לְעוֹלָ֣ם חַסְדּֽוֹ:

יז ֖לְמַכֵּה מְלָכִ֣ים גְּדֹלִ֑ים, כִּ֖י לְעוֹלָ֣ם חַסְדּֽוֹ:

יח ֖וַֽיַּהֲרֹג מְלָכִ֣ים אַדִּירִ֑ים, כִּ֖י לְעוֹלָ֣ם חַסְדּֽוֹ:

יט ֖לְסִיחוֹן מֶ֣לֶךְ הָֽאֱמֹרִ֑י, כִּ֖י לְעוֹלָ֣ם חַסְדּֽוֹ:

כ ֖וּלְעֽוֹג מֶ֣לֶךְ הַבָּשָׁ֑ן, כִּ֖י לְעוֹלָ֣ם חַסְדּֽוֹ:

כא וְנָתַ֣ן אַרְצָ֣ם לְנַֽחֲלָ֑ה, כִּ֖י לְעוֹלָ֣ם חַסְדּֽוֹ:

כב ֖נַֽחֲלָֽה לְיִשְׂרָאֵ֣ל עַבְדּ֑וֹ, כִּ֖י לְעוֹלָ֣ם חַסְדּֽוֹ:

כג ֖שֶׁבְּשִׁפְלֵנוּ זָ֣כַר לָ֑נוּ, כִּ֖י לְעוֹלָ֣ם חַסְדּֽוֹ:

כד וַיִּפְרְקֵ֥נוּ מִצָּרֵ֑ינוּ, כִּ֖י לְעוֹלָ֣ם חַסְדּֽוֹ:

כה נוֹתֵ֣ן ֖לֶחֶם לְכׇל־בָּשָׂ֑ר, כִּ֖י לְעוֹלָ֣ם חַסְדּֽוֹ:

כו ֖הוֹדוּ לְאֵ֣ל הַשָּׁמָ֑יִם, כִּ֖י לְעוֹלָ֣ם חַסְדּֽוֹ:

כָּל אֶחָד מִיִּשְׂרָאֵל צָרִיךְ לְהַחֲיוֹת אֶת עַצְמוֹ עַל יְדֵי יְסוֹד הָאֱמוּנָה שֶׁיֵּשׁ בּוֹ, שֶׁזֶּה עִקַּר הַיְסוֹד שֶׁעַל זֶה עוֹמֵד הַכֹּל: (לקו"ה על פס' ז)

א עַ֥ל־נַהֲר֨וֹת | בָּבֶ֗ל שָׁ֣ם ֖יָשַׁבְנוּ גַּם־בָּכִ֑ינוּ, ֜בְּזׇכְרֵ֗נוּ אֶת־צִיּֽוֹן:

ב עַֽל־עֲרָבִ֥ים בְּתוֹכָ֑הּ ֜תָּלִ֗ינוּ כִּנֹּרוֹתֵֽינוּ:

ג כִּ֤י שָׁ֨ם שְֽׁאֵל֪וּנוּ שׁוֹבֵ֡נוּ דִּבְרֵי־֖שִׁיר וְתוֹלָלֵ֣ינוּ שִׂמְחָ֑ה, שִׁ֥ירוּ ֜לָנוּ מִשִּׁ֥יר צִיּֽוֹן:

ד אֵ֗יךְ נָשִׁ֥יר אֶת־שִׁיר־יְהֹוָ֑ה, ֜עַל אַדְמַ֥ת נֵכָֽר:

ה אִֽם־אֶשְׁכָּחֵ֥ךְ יְֽרוּשָׁלִָ֗ם, תִּשְׁכַּ֥ח יְמִינִֽי:

ו תִּדְבַּ֤ק לְשׁוֹנִ֨י | לְחִכִּי֘ אִם־לֹ֪א אֶ֫זְכְּרֵ֥כִי, אִם־לֹ֣א ֖אַֽעֲלֶֽה אֶת־יְרוּשָׁלִַ֑ם, ֜עַל רֹ֣אשׁ שִׂמְחָתִֽי:

ז זְכֹ֤ר יְהֹוָ֨ה | לִבְנֵ֬י אֱד֗וֹם אֵת֘ י֤וֹם יְֽרוּשָׁ֫לִָ֥ם, ֖הָאֹ֣מְרִים עָ֤רוּ | עָ֑רוּ, ֜עַד הַיְּס֥וֹד בָּֽהּ:

ח בַּת־בָּבֶ֗ל הַשְּׁד֫וּדָ֥ה, אַשְׁרֵ֥י שֶׁיְשַׁלֶּם־לָ֑ךְ, אֶת־֜גְּמוּלֵ֗ךְ שֶׁגָּמַ֥לְתְּ לָֽנוּ:

ט אַשְׁרֵ֤י | שֶׁיֹּאחֵ֓ז וְנִפֵּ֬ץ אֶת־עֹלָלַ֗יִךְ אֶל־הַסָּֽלַע:

עִקַּר הַשִּׁירָה עַל יְדֵי שֶׁיּוֹדְעִין וּמַאֲמִינִים כִּי יְשָׁרִים דַּרְכֵי ה' מִשְׁפָּטָיו וְהַנְהָגוֹתָיו יִתְבָּרַךְ: (לקו"ה על פס' ה)

א לְדָוִ֨ד |, אוֹדְךָ֥ בְכׇל־לִבִּ֑י, נֶ֖גֶד אֱלֹהִ֣ים אֲזַמְּרֶֽךָּ:

ב אֶשְׁתַּחֲוֶ֨ה אֶל־הֵיכַ֪ל קׇדְשְׁךָ֡ וְא֘וֹדֶ֤ה אֶת־שְׁמֶ֗ךָ, עַל־חַסְדְּךָ֥ וְעַל־אֲמִתֶּ֑ךָ, כִּֽי־הִגְדַּ֥לְתָּ עַל־כׇּל־שִׁ֜מְךָ֗ אִמְרָתֶֽךָ:

ג בְּי֣וֹם ֖קָרָֽאתִי וַֽתַּעֲנֵ֑נִי, תַּרְהִבֵ֖נִי בְנַפְשִׁ֣י עֹֽז:

ד יוֹד֣וּךָ ֖יְהֹוָה כׇּל־מַלְכֵי־אָ֑רֶץ, כִּ֥י ֜שָׁמְע֗וּ אִמְרֵי־פִֽיךָ:

ה ֖וְיָשִׁירוּ בְּדַרְכֵ֣י יְהֹוָ֑ה, כִּֽי־֜גָד֗וֹל כְּב֣וֹד יְהֹוָֽה:

ו כִּי־רָ֣ם ֖יְהֹוָה וְשָׁפָ֣ל יִרְאֶ֑ה, ֜וְגָבֹ֗הַּ מִמֶּרְחָ֥ק יְיֵדָֽע:

ז אִם־אֵלֵ֤ךְ | בְּקֶ֥רֶב צָרָ֗ה תְּחַ֫יֵּי֥נִי, עַ֤ל אַ֣ף ֖אֹיְבַי תִּשְׁלַ֣ח יָדֶ֑ךָ, וְת֖וֹשִׁיעֵ֣נִי יְמִינֶֽךָ:

ח יְהֹוָה֘ יִגְמֹ֪ר בַּ֫עֲדִ֥י, ֖יְהֹוָה חַסְדְּךָ֣ לְעוֹלָ֑ם, מַעֲשֵׂ֖י יָדֶ֣ךָ אַל־תֶּֽרֶף:

אֵין שׁוּם מָקוֹם לִבְרֹחַ וּלְהִתְיָאֵשׁ חָס וְשָׁלוֹם מֵה' יִתְבָּרַךְ, כִּי אֵין שׁוּם מָקוֹם שֶׁלֹּא יִמָּצֵא בּוֹ ה' יִתְבָּרַךְ: (לקו"ה על פס' ז-ט)

א ֖לַֽמְנַצֵּֽחַ לְדָוִ֣ד מִזְמ֑וֹר, יְהֹוָ֥ה ֜חֲקַרְתַּ֗נִי וַתֵּדָֽע:

ב אַתָּ֣ה ֖יָדַעְתָּ שִׁבְתִּ֣י וְקוּמִ֑י, בַּ֥נְתָּה ֜לְרֵעִ֗י מֵרָחֽוֹק:

ג אׇרְחִ֣י וְרִבְעִ֣י זֵרִ֑יתָ, וְֽכׇל־דְּרָכַ֥י הִסְכַּֽנְתָּה:

ד כִּ֤י אֵ֣ין ֖מִלָּֽה בִּלְשׁוֹנִ֑י, הֵ֥ן ֜יְהֹוָ֗ה יָדַ֥עְתָּ כֻלָּֽהּ:

ה אָח֣וֹר וָקֶ֣דֶם צַרְתָּ֑נִי, וַתָּ֖שֶׁת עָלַ֣י כַּפֶּֽכָה:

ו פּלִ֣יאָה פְלאיה דַ֣עַת מִמֶּ֑נִּי, ֜נִשְׂגְּבָ֗ה לֹא־א֥וּכַל לָֽהּ:

ז ֖אָנָה אֵלֵ֥ךְ מֵרוּחֶ֑ךָ, ֜וְאָ֗נָה מִפָּנֶ֥יךָ אֶבְרָֽח:

ח אִם־אֶסַּ֣ק ֖שָׁמַיִם שָׁ֣ם אָ֑תָּה, וְאַצִּ֖יעָה שְּׁא֣וֹל הִנֶּֽךָּ:

ט אֶשָּׂ֥א כַנְפֵי־שָׁ֑חַר, ֜אֶשְׁכְּנָ֗ה בְּאַֽחֲרִ֥ית יָֽם:

י גַּם־֖שָׁם יָדְךָ֣ תַנְחֵ֑נִי, וְֽתֹאחֲזֵ֥נִי יְמִינֶֽךָ:

יא ֖וָאֹמַר אַךְ־חֹ֣שֶׁךְ יְשׁוּפֵ֑נִי, ֜וְלַ֗יְלָה א֣וֹר בַּעֲדֵֽנִי:

יב גַּם־חֹשֶׁךְ֘ לֹֽא־יַחְשִׁ֪יךְ מִ֫מֶּ֥ךָּ, ֖וְלַיְלָה כַּיּ֣וֹם יָאִ֑יר, ֜כַּֽחֲשֵׁיכָ֗ה כָּאוֹרָֽה:

יג כִּֽי־֖אַתָּה קָנִ֣יתָ כִלְיֹתָ֑י, ֜תְּסֻכֵּ֗נִי בְּבֶ֣טֶן אִמִּֽי:

יד אוֹדְךָ֗ עַ֤ל כִּ֥י נוֹרָא֗וֹת נִ֫פְלֵ֥יתִי, נִפְלָאִ֥ים מַעֲשֶׂ֑יךָ, ֜וְנַפְשִׁ֗י יֹדַ֥עַת מְאֹֽד:

טו לֹֽא־נִכְחַ֥ד עׇצְמִ֗י מִ֫מֶּ֥ךָּ, אֲשֶׁר־עֻשֵּׂ֥יתִי בַסֵּ֑תֶר, ֜רֻקַּ֗מְתִּי בְּֽתַחְתִּיּ֥וֹת אָֽרֶץ:

טז גׇּלְמִ֤י | רָ֘א֤וּ עֵינֶ֗יךָ, וְעַֽל־סִפְרְךָֽ֘ כֻּלָּ֪ם יִכָּ֫תֵ֥בוּ, יָמִ֥ים יֻצָּ֑רוּ, ול֖וֹ וְלא אֶחָ֣ד בָּהֶֽם:

יז וְלִ֗י מַה־יָּקְר֣וּ רֵעֶ֣יךָ אֵ֑ל, מֶ֥ה ֜עָצְמ֗וּ רָֽאשֵׁיהֶֽם:

יח ֖אֶסְפְּרֵם מֵח֣וֹל יִרְבּ֑וּן, ֜הֱקִיצֹ֗תִי וְעוֹדִ֥י עִמָּֽךְ:

יט אִם־תִּקְטֹ֖ל אֱל֥וֹהַּ | רָשָׁ֑ע, וְאַנְשֵׁ֥י ֜דָמִ֗ים ס֣וּרוּ מֶֽנִּי:

כ אֲשֶׁ֣ר ֖יֹאמְרוּךָ לִמְזִמָּ֑ה, נָשׂ֖וּא לַשָּׁ֣וְא עָרֶֽיךָ:

כא הֲלֽוֹא־מְשַׂנְאֶ֖יךָ יְהֹוָ֥ה | אֶשְׂנָ֑א, ֜וּבִתְקוֹמְמֶ֗יךָ אֶתְקוֹטָֽט:

כב תַּכְלִ֣ית שִׂנְאָ֣ה שְׂנֵאתִ֑ים, ֜לְאוֹיְבִ֗ים הָ֣יוּ לִֽי:

כג חׇקְרֵ֣נִי ֖אֵל וְדַ֣ע לְבָבִ֑י, ֜בְּחָנֵ֗נִי וְדַ֣ע שַׂרְעַפָּֽי:

כד וּרְאֵ֗ה אִם־דֶּֽרֶךְ־עֹ֥צֶב בִּ֑י, ֜וּנְחֵ֗נִי בְּדֶ֣רֶךְ עוֹלָֽם:

כָּל מַה שֶּׁעוֹשִׂין בִּשְׁבִיל נִצְחוֹן דִּקְדֻשָּׁה נִשְׁאָר קַיָּם לְעוֹלָם, בִּפְרָט דִּבּוּר וְקוֹל שֶׁל תְּפִלָּה שֶׁיָּקָר מֵהַכֹּל: (לקו"ה על פס' א)

א לַֽמְנַצֵּ֗חַ, מִזְמ֥וֹר לְדָוִֽד:

ב חַלְּצֵ֣נִי ֖יְהֹוָה מֵאָדָ֣ם רָ֑ע, מֵאִ֖ישׁ חֲמָסִ֣ים תִּנְצְרֵֽנִי:

ג אֲשֶׁ֤ר חָשְׁב֣וּ רָע֣וֹת בְּלֵ֑ב, כׇּל־י֜֗וֹם יָג֥וּרוּ מִלְחָמֽוֹת:

ד שָֽׁננ֣וּ לְשׁוֹנָם֘ כְּֽמוֹ־נָ֫חָ֥שׁ, חֲמַ֥ת עַכְשׁ֑וּב תַּ֖חַת שְׂפָתֵ֣ימוֹ סֶֽלָה:

ה שׇׁמְרֵ֤נִי יְהֹוָ֨ה | מִ֘ידֵ֤י רָשָׁ֗ע, מֵאִ֣ישׁ חֲמָסִ֣ים תִּנְצְרֵ֑נִי, אֲשֶׁ֥ר ֜חָֽשְׁב֗וּ לִדְח֥וֹת פְּעָמָֽי:

ו טָֽמְנ֥וּ־גֵאִ֨ים | פַּ֡ח לִ֗י, וַחֲבָלִ֗ים פָּ֣רְשׂוּ ֖רֶשֶׁת לְיַד־מַעְגָּ֑ל, מֹקְשִׁ֖ים שָֽׁתוּ־לִ֣י סֶֽלָה:

ז אָמַ֣רְתִּי ֖לַיהֹוָה אֵ֣לִי אָ֑תָּה, הַֽאֲזִ֥ינָה ֜יְהֹוָ֗ה ק֣וֹל תַּחֲנוּנָֽי:

ח יְֱהֹוִ֣ה אֱלֹהִ֣ים קרי ֖אֲדֹנָי עֹ֣ז יְשׁוּעָתִ֑י, סַכֹּ֥תָה ֜לְרֹאשִׁ֗י בְּי֣וֹם נָֽשֶׁק:

ט אַל־תִּתֵּ֣ן ֖יְהֹוָה מַאֲוַיֵּ֣י רָשָׁ֑ע, זְמָמ֥וֹ אַל־֜תָּפֵ֗ק, יָר֥וּמוּ סֶֽלָה:

י רֹ֥אשׁ מְסִבָּ֑י, עֲמַ֖ל שְׂפָתֵ֣ימוֹ יכַסֵּֽימוֹ יְכסומו:

יא יִמּ֥וֹטוּ ימיטו עֲלֵיהֶ֗ם גֶּחָ֫לִ֥ים, בָּאֵ֥שׁ יַפִּלֵ֑ם, ֜בְּמַהֲמֹר֗וֹת בַּל־יָקֽוּמוּ:

יב אִ֥ישׁ לָשׁוֹן֘ בַּל־יִכּ֪וֹן בָּ֫אָ֥רֶץ, אִישׁ־חָמָ֥ס רָ֑ע ֜יְצוּדֶ֗נּוּ לְמַדְחֵפֽוֹת:

יג יָדַ֗עְתִּי ידעְת כִּי־יַעֲשֶׂ֣ה ֖יְהֹוָה דִּ֣ין עָנִ֑י, ֜מִשְׁפַּ֗ט אֶבְיֹנִֽים:

יד אַ֣ךְ ֖צַדִּיקִים יוֹד֣וּ לִשְׁמֶ֑ךָ, יֵשְׁב֥וּ ֜יְשָׁרִ֗ים אֶת־פָּנֶֽיךָ:

עִקַּר הַתִּקּוּן עַל יְדֵי שֶׁמְּבִינִים בְּלִבּוֹ שֶׁאֵין יוֹדְעִין כְּלָל, וּמִתְחַזְּקִים עַל יְדֵי זֶה דַּיְקָא לִצְעֹק וְלִצְעֹק וּלְהִתְפַּלֵּל וּלְבַקֵּשׁ רַחֲמִים: (לקו"ה על פס' ב)

א מִזְמ֗וֹר לְדָ֫וִ֥ד, יְהֹוָ֣ה ֖קְרָאתִיךָ ח֣וּשָׁה לִּ֑י, הַאֲזִ֥ינָה ֜קוֹלִ֗י בְּקׇרְאִי־לָֽךְ:

ב תִּכּ֤וֹן תְּפִלָּתִ֣י קְטֹ֣רֶת לְפָנֶ֑יךָ, מַֽשְׂאַ֥ת ֜כַּפַּ֗י מִנְחַת־עָֽרֶב:

ג שִׁיתָ֣ה ֖יְהֹוָה שׇׁמְרָ֣ה לְפִ֑י, ֜נִצְּרָ֗ה עַל־דַּ֥ל שְׂפָתָֽי:

ד אַל־תַּט־לִבִּ֥י לְדָבָ֪ר | רָ֡ע, לְהִתְע֘וֹלֵ֤ל עֲלִל֨וֹת | בְּרֶ֗שַׁע אֶת־אִישִׁ֥ים פֹּֽעֲלֵי־אָ֑וֶן, וּבַל־֜אֶלְחַ֗ם בְּמַנְעַמֵּיהֶֽם:

ה יֶֽהֶלְמֵ֥נִי צַדִּ֨יק | חֶ֡סֶד וְֽיוֹכִיחֵ֗נִי, שֶׁ֣מֶן ֖רֹאשׁ אַל־יָנִ֣י רֹאשִׁ֑י, כִּי־ע֥וֹד ֜וּתְפִלָּתִ֗י בְּרָעוֹתֵיהֶֽם:

ו נִשְׁמְט֣וּ בִֽידֵי־֖סֶלַע שֹׁפְטֵיהֶ֑ם, וְשָׁמְע֥וּ ֜אֲמָרַ֗י כִּ֣י נָעֵֽמוּ:

ז כְּמ֤וֹ פֹלֵ֣חַ וּבֹקֵ֣עַ בָּאָ֑רֶץ, נִפְזְר֥וּ ֜עֲצָמֵ֗ינוּ לְפִ֣י שְׁאֽוֹל:

ח כִּ֤י אֵלֶ֨יךָ | יְֱהֹוִ֣ה אֱלֹהִ֣ים קרי אֲדֹנָ֣י עֵינָ֑י, בְּכָ֥ה ֜חָסִ֗יתִי אַל־תְּעַ֥ר נַפְשִֽׁי:

ט שׇׁמְרֵ֗נִי מִ֣ידֵי ֖פַח יָ֣קְשׁוּ לִ֑י, ֜וּמֹקְשׁ֗וֹת פֹּ֣עֲלֵי אָֽוֶן:

י יִפְּל֣וּ בְמַכְמֹרָ֣יו רְשָׁעִ֑ים, יַ֥חַד ֜אָנֹכִ֗י עַֽד־אֶעֱבֽוֹר:

צָרִיךְ לְהִתְפַּלֵּל מְאֹד מְאֹד לְה' יִתְבָּרַךְ שֶׁיְּזַכֵּהוּ לְעֵצָה שְׁלֵמָה אֲמִתִּיִּית בְּאֹפֶן שֶׁיִּזְכֶּה לָשׁוּב בֶּאֱמֶת, כִּי בְּכָל מָקוֹם שֶׁהוּא בְּוַדַּאי יֵשׁ שָׁם עֵצָה אֵיךְ לָצֵאת מִשָּׁם: (לקו"ה על פס' ד)

א מַשְׂכִּ֥יל לְדָוִ֑ד, בִּֽהְיוֹת֖וֹ בַמְּעָרָ֣ה תְפִלָּֽה:

ב ֖קוֹלִי אֶל־יְהֹוָ֣ה אֶזְעָ֑ק, ֜קוֹלִ֗י אֶל־יְהֹוָ֥ה אֶתְחַנָּֽן:

ג אֶשְׁפֹּ֣ךְ לְפָנָ֣יו שִׂיחִ֑י, ֜צָרָתִ֗י לְפָנָ֥יו אַגִּֽיד:

ד בְּהִתְעַטֵּ֬ף עָלַ֨י | רוּחִ֗י. וְאַתָּה֘ יָדַ֪עְתָּ נְֽתִיבָ֫תִ֥י, בְּאֹֽרַח־ז֥וּ אֲהַלֵּ֑ךְ טָמְנ֖וּ פַ֣ח לִֽי:

ה הַבֵּ֤יט יָמִ֨ין | וּרְאֵה֘ וְאֵין־לִ֪י מַ֫כִּ֥יר, אָבַ֣ד מָנ֣וֹס מִמֶּ֑נִּי, אֵ֖ין דּוֹרֵ֣שׁ לְנַפְשִֽׁי:

ו זָעַ֥קְתִּי אֵלֶ֗יךָ יְהֹ֫וָ֥ה, ֖אָמַרְתִּי אַתָּ֣ה מַחְסִ֑י, ֜חֶלְקִ֗י בְּאֶ֣רֶץ הַחַיִּֽים:

ז הַקְשִׁ֤יבָה | אֶֽל־רִנָּתִי֘ כִּֽי־דַלּ֪וֹתִ֫י מְאֹ֥ד, הַצִּילֵ֥נִי מֵרֹדְפַ֑י כִּ֖י אָֽמְצ֣וּ מִמֶּֽנִּי:

ח ה֘וֹצִ֤יאָה מִמַּסְגֵּ֨ר | נַפְשִׁי֘ לְהוֹד֪וֹת אֶת־שְׁ֫מֶ֥ךָ, ֖בִּי יַכְתִּ֣רוּ צַדִּיקִ֑ים כִּ֖י תִגְמֹ֣ל עָלָֽי:

אַף עַל פִּי שֶׁהַכֹּל בְּמִשְׁפָּט, אַף עַל פִּי כֵן בְּוַדַּאי בְּיַד ה' יִתְבָּרַךְ לִמְחֹל כְּשֶׁמְּבַקְּשִׁין מִמֶּנּוּ: (לקו"ה על פס' ב)

א מִזְמ֗וֹר לְדָ֫וִ֥ד, יְהֹוָ֤ה | שְׁמַ֬ע תְּפִלָּתִ֗י, הַאֲזִ֥ינָה אֶל־תַּחֲנוּנָ֑י, בֶּאֱמֻנָתְךָ֥ ֜עֲנֵ֗נִי בְּצִדְקָתֶֽךָ:

ב וְאַל־תָּב֣וֹא ֖בְמִשְׁפָּט אֶת־עַבְדֶּ֑ךָ, כִּ֤י לֹֽא־יִצְדַּ֖ק לְפָנֶ֣יךָ כׇל־חָֽי:

ג כִּ֥י רָ֘דַ֤ף אוֹיֵ֨ב | נַפְשִׁ֗י, דִּכָּ֣א ֖לָאָרֶץ חַיָּתִ֑י, הוֹשִׁיבַ֥נִי ֜בְמַחֲשַׁכִּ֗ים כְּמֵתֵ֥י עוֹלָֽם:

ד וַתִּתְעַטֵּ֣ף עָלַ֣י רוּחִ֑י, ֜בְּתוֹכִ֗י יִשְׁתּוֹמֵ֥ם לִבִּֽי:

ה זָ֘כַ֤רְתִּי יָמִ֨ים | מִקֶּ֗דֶם, הָגִ֥יתִי בְכׇל־פָּעֳלֶ֑ךָ, בְּֽמַעֲשֵׂ֖ה יָדֶ֣יךָ אֲשׂוֹחֵֽחַ:

ו פֵּרַ֣שְׂתִּי יָדַ֣י אֵלֶ֑יךָ, נַפְשִׁ֓י | כְּאֶֽרֶץ־עֲיֵפָ֖ה לְךָ֣ סֶֽלָה:

ז מַ֘הֵ֤ר עֲנֵ֨נִי | יְהֹוָה֘ כָּלְתָ֪ה ר֫וּחִ֥י, אַל־תַּסְתֵּ֣ר פָּנֶ֣יךָ מִמֶּ֑נִּי, ֜וְנִמְשַׁ֗לְתִּי עִם־יֹ֥רְדֵי בֽוֹר:

ח הַשְׁמִ֘יעֵ֤נִי בַבֹּ֨קֶר | חַסְדֶּךָ֘ כִּֽי־בְךָ֪ בָ֫טָ֥חְתִּי, הֽוֹדִיעֵ֗נִי דֶּֽרֶךְ־ז֥וּ אֵלֵ֑ךְ, כִּֽי־֜אֵלֶ֗יךָ נָשָׂ֥אתִי נַפְשִֽׁי:

ט הַצִּילֵ֖נִי מֵאֹיְבַ֥י | יְהֹוָ֗ה, אֵלֶ֥יךָ כִסִּֽתִי:

י לַמְּדֵ֤נִי | לַֽעֲשׂ֣וֹת רְצוֹנֶךָ֘ כִּֽי־אַתָּ֪ה אֱל֫וֹהָ֥י, רוּחֲךָ֥ טוֹבָ֑ה ֜תַּנְחֵ֗נִי בְּאֶ֣רֶץ מִישֽׁוֹר:

יא לְמַ֥עַן־שִׁמְךָ֣ יְהֹוָ֣ה תְּחַיֵּ֑נִי, בְּצִדְקָֽתְךָ֓ | תּוֹצִ֖יא מִצָּרָ֣ה נַפְשִֽׁי:

יב וּבְחַסְדְּךָ֘ תַּצְמִ֪ית אֹ֫יְבָ֥י, ֖וְֽהַאֲבַדְתָּ כׇּל־צֹררֵ֣י נַפְשִׁ֑י, ֜כִּ֗י אֲנִ֣י עַבְדֶּֽךָ:

צָּרִיךְ לְבַלּוֹת כָּל יָמָיו לְבַקֵּשׁ וּלְחַפֵּשׂ אַחַר רְצוֹנוֹ יִתְבָּרַךְ, וּלְבַטֵּל כָּל רְצוֹנוֹתָיו נֶגֶד רְצוֹנוֹ יִתְבָּרַךְ: (לקו"ה על פס' ד)

א לְדָוִ֨ד |, בָּ֘ר֤וּךְ יְהֹוָ֨ה | צוּרִ֗י, הַֽמְלַמֵּ֣ד יָדַ֣י לַקְרָ֑ב, ֜אֶצְבְּעוֹתַ֗י לַמִּלְחָמָֽה:

ב חַסְדִּ֥י וּמְצוּדָתִי֘, מִשְׂגַּבִּ֪י וּֽמְפַלְטִ֫י לִ֥י, ֖מָגִנִּי וּב֣וֹ חָסִ֑יתִי, הָרוֹדֵ֖ד עַמִּ֣י תַחְתָּֽי:

ג יְֽהֹוָ֗ה, מָה־֖אָדָם וַתֵּדָעֵ֑הוּ, בֶּן־אֱ֜נ֗וֹשׁ וַֽתְּחַשְּׁבֵֽהוּ:

ד ֖אָדָם לַהֶ֣בֶל דָּמָ֑ה, ֜יָמָ֗יו כְּצֵ֣ל עוֹבֵֽר:

ה ֖יְהֹוָה הַט־שָׁמֶ֣יךָ וְתֵרֵ֑ד, גַּ֖ע בֶּֽהָרִ֣ים וְֽיֶעֱשָֽׁנוּ:

ו בְּר֣וֹק ֖בָּרָק וּתְפִיצֵ֑ם, שְׁלַ֥ח ֜חִצֶּ֗יךָ וּתְהֻמֵּֽם:

ז שְׁלַ֥ח יָדֶ֗יךָ מִמָּ֫ר֥וֹם, פְּצֵ֣נִי ֖וְהַצִּילֵנִי מִמַּ֣יִם רַבִּ֑ים, ֜מִיַּ֗ד בְּֽנֵ֣י נֵכָֽר:

ח אֲשֶׁ֣ר ֖פִּיהֶם דִּבֶּר־שָׁ֑וְא, ֜וִימִינָ֗ם יְמִ֣ין שָֽׁקֶר:

ט אֱֽלֹהִ֗ים שִׁ֣יר ֖חָדָשׁ אָשִׁ֣ירָה לָּ֑ךְ, בְּנֵ֥בֶל ֜עָשׂ֗וֹר אֲזַמְּרָה־לָּֽךְ:

י הַנּוֹתֵ֥ן תְּשׁוּעָ֗ה לַמְּלָ֫כִ֥ים, ֖הַפּוֹצֶה אֶת־דָּוִ֥ד ֜עַבְדּ֗וֹ מֵחֶ֥רֶב רָעָֽה:

יא פְּצֵ֥נִי וְהַצִּילֵנִי֘ מִיַּ֪ד בְּֽנֵי־נֵ֫כָ֥ר, אֲשֶׁ֣ר ֖פִּיהֶֽם דִּבֶּר־שָׁ֑וְא, ֜וִימִינָ֗ם יְמִ֣ין שָֽׁקֶר:

יב אֲשֶׁ֤ר בָּנֵ֨ינוּ | כִּנְטִעִים֘ מְגֻדָּלִ֪ים בִּנְעוּרֵ֫יהֶ֥ם, בְּנוֹתֵ֥ינוּ כְזָוִיֹּ֑ת, ֜מְחֻטָּב֗וֹת תַּבְנִ֥ית הֵיכָֽל:

יג מְזָוֵ֣ינוּ מְלֵאִים֘ מְפִיקִ֥ים מִזַּ֗ן אֶ֫ל זַ֥ן, צֹאונֵ֣נוּ ֖מַאֲלִיפוֹת ֜מְרֻבָּב֗וֹת בְּחוּצוֹתֵֽינוּ:

יד אַלּוּפֵ֗ינוּ מְֽסֻבָּ֫לִ֥ים, אֵ֥ין ֖פֶּרֶץ וְאֵ֣ין יוֹצֵ֑את, וְאֵ֥ין ֜צְוָחָ֗ה בִּרְחֹבֹתֵֽינוּ:

טו אַשְׁרֵ֣י ֖הָעָֽם שֶׁכָּ֣כָה לּ֑וֹ, אַֽשְׁרֵ֥י ֜הָעָ֗ם שֶֽׁיְהֹוָ֥ה אֱלֹהָֽיו:

אֵין שׁוּם דָּבָר שֶׁיִּקָּרֵב וִידַבֵּק אֶת הָאָדָם לַה' יִתְבָּרַךְ כְּמוֹ הַתְּפִלָּה, שֶׁהִיא עִקַּר הִתְחַבְּרוּת וּדְבֵקוּת שֶׁל יִשְׂרָאֵל לַה' יִתְבָּרַךְ: (לקו"ה על פס יח)

א תְּהִלָּ֗ה לְדָ֫וִ֥ד, אֲרוֹמִמְךָ֣ אֱלוֹהַ֣י הַמֶּ֑לֶךְ וַאֲבָרכָ֥ה ֜שִׁמְךָ֗ לְעוֹלָ֥ם וָעֶֽד:

ב בְּכׇל־י֥וֹם אֲבָרכֶ֑ךָּ, וַאֲהַלְלָ֥ה ֜שִׁמְךָ֗ לְעוֹלָ֥ם וָעֶֽד:

ג גָּ֘ד֤וֹל יְהֹוָ֣ה וּמְהֻלָּ֣ל מְאֹ֑ד, ֜וְלִגְדֻלָּת֗וֹ אֵ֣ין חֵֽקֶר:

ד דּ֣וֹר ֖לְדוֹר יְשַׁבַּ֣ח מַֽעֲשֶׂ֑יךָ, וּגְב֖וּרֹתֶ֣יךָ יַגִּֽידוּ:

ה ֖הֲדַר כְּב֣וֹד הוֹדֶ֑ךָ, וְדִבְרֵ֖י נִפְלְאֹתֶ֣יךָ אָשִֽׂיחָה:

ו וֶעֱז֣וּז נוֹרְאֹתֶ֣יךָ יֹאמֵ֑רוּ, וּגְדֻלָּתךָ֥ וגְדלותְיך אֲסַפְּרֶֽנָּה:

ז זֵ֣כֶר רַב־טוּבְךָ֣ יַבִּ֑יעוּ, וְצִדְקָתְךָ֥ יְרַנֵּֽינוּ:

ח חַנּ֣וּן וְרַח֣וּם יְהֹוָ֑ה, אֶ֥רֶךְ ֜אַפַּ֗יִם וגדול וּגְדׇל־חָֽסֶד:

ט טוֹב־יְהֹוָ֥ה לַכֹּ֑ל ֜וְרַחֲמָ֗יו עַל־כׇּל־מַעֲשָֽׂיו:

י יוֹד֣וּךָ ֖יְהֹוָה כׇּל־מַעֲשֶׂ֑יךָ, ֜וַחֲסִידֶ֗יךָ יְבָרכֽוּכָה:

יא כְּב֣וֹד מַלְכוּתְךָ֣ יֹאמֵ֑רוּ, וּגְבוּרָתְךָ֥ יְדַבֵּֽרוּ:

יב לְהוֹדִ֤יעַ | לִבְנֵ֣י ֖הָאָדָם גְּבוּרֹתָ֑יו, ֜וּכְב֗וֹד הֲדַ֣ר מַלְכוּתֽוֹ:

יג מַֽלְכוּתְךָ֗ מַלְכ֥וּת כׇּל־עֹלָמִ֑ים, ֜וּמֶֽמְשַׁלְתְּךָ֗ בְּכׇל־דּ֥וֹר וָדֽוֹר:

יד סוֹמֵ֣ךְ ֖יְהֹוָה לְכׇל־הַנֹּפְלִ֑ים, ֜וְזוֹקֵ֗ף לְכׇל־הַכְּפוּפִֽים:

טו עֵֽינֵי־֖כֹל אֵלֶ֣יךָ יְשַׂבֵּ֑רוּ, וְאַתָּ֤ה נֽוֹתֵן־לָהֶ֖ם אֶת־אׇכְלָ֣ם בְּעִתּֽוֹ:

טז פּוֹתֵ֥חַ אֶת־יָדֶ֑ךָ, וּמַשְׂבִּ֖יעַ לְכׇל־חַ֣י רָצֽוֹן:

יז צַדִּ֣יק ֖יְהֹוָה בְּכׇל־דְּרָכָ֑יו, ֜וְחָסִ֗יד בְּכׇל־מַעֲשָֽׂיו:

יח קָר֣וֹב ֖יְהֹוָה לְכׇל־קֹרְאָ֑יו, לְכֹ֤ל אֲשֶׁ֖ר יִקְרָאֻ֣הוּ בֶאֱמֶֽת:

יט רְצוֹן־יְרֵאָ֥יו יַעֲשֶׂ֑ה, וְֽאֶת־שַׁוְעָתָ֥ם ֜יִשְׁמַ֗ע וְיוֹשִׁיעֵם:

כ שׁוֹמֵ֣ר ֖יְהֹוָה אֶת־כׇּל־אֹהֲבָ֑יו, וְאֵ֖ת כׇּל־הָֽרְשָׁעִ֣ים יַשְׁמִֽיד:

כא תְּהִלַּ֥ת יְהֹוָ֗ה יְֽדַבֶּ֫ר פִּ֥י, וִיבָרֵ֣ךְ כׇּל־֖בָּשָׂר שֵׁ֥ם קׇדְשׁ֗וֹ לְעוֹלָ֥ם וָעֶֽד:

עִקַּר הִתְגַּלּוּת מַלְכוּתוֹ יִתְבָּרַךְ לְעוֹלָם לְדוֹר וָדוֹר לָנֶצַח הִיא עַל יְדֵי תְּפִלַּת יִשְׂרָאֵל, שֶׁהוּא עִקַּר שְׁלֵמוּת הַקְּדֻשָּׁה: (לקו"ה על פס' י)

א הַֽלְלוּ־יָ֡הּ, הַֽלְלִ֥י ֜נַפְשִׁ֗י אֶת־יְהֹוָֽה:

ב אֲהַלְלָ֣ה יְהֹוָ֣ה בְּחַיָּ֑י, אֲזַמְּרָ֖ה לֵאלֹהַ֣י בְּעוֹדִֽי:

ג אַל־תִּבְטְח֥וּ בִנְדִיבִ֑ים, בְּבֶן־אָדָ֓ם | שֶׁ֤אֵין ל֥וֹ תְשׁוּעָֽה:

ד תֵּצֵ֣א ֖רוּחוֹ יָשֻׁ֣ב לְאַדְמָת֑וֹ, בַּיּ֥וֹם ֜הַה֗וּא אָבְד֥וּ עֶשְׁתּוֹנֹתָֽיו:

ה אַשְׁרֵ֗י שֶׁ֤אֵ֣ל יַעֲקֹ֣ב בְּעֶזְר֑וֹ, ֜שִׂבְר֗וֹ עַל־יְהֹוָ֥ה אֱלֹהָֽיו:

ו עֹשֶׂ֤ה | שָׁ֘מַ֤יִם וָאָ֗רֶץ, אֶת־הַיָּ֥ם וְאֶת־כׇּל־אֲשֶׁר־בָּ֑ם, הַשֹּׁמֵ֖ר אֱמֶ֣ת לְעוֹלָֽם:

ז עֹשֶׂ֤ה מִשְׁפָּ֨ט | לָעֲשׁוּקִ֗ים, נֹתֵ֣ן ֖לֶחֶם לָרְעֵבִ֑ים, ֜יְהֹוָ֗ה מַתִּ֥יר אֲסוּרִֽים:

ח יְהֹוָ֤ה | פֹּ֘קֵ֤חַ עִוְרִ֗ים, ֖יְהֹוָה זֹקֵ֣ף כְּפוּפִ֑ים, ֜יְהֹוָ֗ה אֹהֵ֥ב צַדִּיקִֽים:

ט יְהֹוָ֤ה שֹׁ֘מֵ֤ר אֶת־גֵּרִ֗ים, יָת֣וֹם וְאַלְמָנָ֣ה יְעוֹדֵ֑ד, וְדֶ֖רֶךְ רְשָׁעִ֣ים יְעַוֵּֽת:

י יִמְלֹ֤ךְ יְהֹוָ֨ה | לְעוֹלָ֗ם, אֱלֹהַ֣יִךְ ֖צִיּוֹן לְדֹ֥ר וָדֹ֗ר, הַֽלְלוּ־יָֽהּ:

אִי אֶפְשָׁר לִדָּבֵק בְּהַבּוֹרֵא יִתְבָּרַךְ שְׁמוֹ לִזְכּוֹת לַנֹּעַם הָעֶלְיוֹן לַחֲזוֹת בְּנֹעַם ה', כִּי אִם עַל יְדֵי דִּבּוּרֵי בְּרָכוֹת וְהוֹדָאוֹת וּתְפִלּוֹת וְשִׁירוֹת וְתִשְׁבָּחוֹת: (לקו"ה על פס' א)

א הַֽלְלוּ־יָ֨הּ |, כִּי־֖טוֹב זַמְּרָ֣ה אֱלֹהֵ֑ינוּ, כִּֽי־֜נָעִ֗ים נָאוָ֥ה תְהִלָּֽה:

ב בּוֹנֵ֣ה יְרוּשָׁלִַ֣ם יְהֹוָ֑ה, נִדְחֵ֖י יִשְׂרָאֵ֣ל יְכַנֵּֽס:

ג ֖הָרֹפֵא לִשְׁב֣וּרֵי לֵ֑ב, ֜וּמְחַבֵּ֗שׁ לְעַצְּבוֹתָֽם:

ד מוֹנֶ֣ה ֖מִסְפָּר לַכּוֹכָבִ֑ים, ֜לְכֻלָּ֗ם שֵׁמ֥וֹת יִקְרָֽא:

ה גָּד֣וֹל אֲדוֹנֵ֣ינוּ וְרַב־כֹּ֑חַ, ֜לִתְבוּנָת֗וֹ אֵ֣ין מִסְפָּֽר:

ו מְעוֹדֵ֣ד עֲנָוִ֣ים יְהֹוָ֑ה, מַשְׁפִּ֖יל רְשָׁעִ֣ים עֲדֵי־אָֽרֶץ:

ז עֱנ֣וּ לַיהֹוָ֣ה בְּתוֹדָ֑ה, זַמְּר֖וּ לֵאלֹהֵ֣ינוּ בְכִנּֽוֹר:

ח הַֽמְכַסֶּ֬ה שָׁמַ֨יִם | בְּעָבִ֗ים, הַמֵּכִ֣ין לָאָ֣רֶץ מָטָ֑ר, הַמַּצְמִ֖יחַ הָרִ֣ים חָצִֽיר:

ט נֹתֵ֣ן לִבְהֵמָ֣ה לַחְמָ֑הּ, לִבְנֵ֥י ֜עֹרֵ֗ב אֲשֶׁ֣ר יִקְרָֽאוּ:

י לֹ֤א בִגְבוּרַ֣ת הַסּ֣וּס יֶחְפָּ֑ץ, לֹֽא־בְשׁוֹקֵ֖י הָאִ֣ישׁ יִרְצֶֽה:

יא רוֹצֶ֣ה ֖יְהֹוָה אֶת־יְרֵאָ֑יו, אֶת־הַמְיַחֲלִ֥ים לְחַסְדּֽוֹ:

יב שַׁבְּחִ֣י ֖יְרוּשָׁלִַם אֶת־יְהֹוָ֑ה, הַֽלְלִ֖י אֱלֹהַ֣יִךְ צִיּֽוֹן:

יג כִּֽי־֖חִזַּק בְּרִיחֵ֣י שְׁעָרָ֑יִךְ, בֵּרַ֖ךְ בָּנַ֣יִךְ בְּקִרְבֵּֽךְ:

יד הַשָּׂם־גְּבוּלֵ֥ךְ שָׁל֑וֹם, חֵ֥לֶב ֜חִטִּ֗ים יַשְׂבִּיעֵֽךְ:

טו הַשֹּׁלֵ֣חַ אִמְרָת֣וֹ אָ֑רֶץ, עַד־֜מְהֵרָ֗ה יָר֥וּץ דְּבָרֽוֹ:

טז הַנֹּתֵ֣ן שֶׁ֣לֶג כַּצָּ֑מֶר, ֜כְּפ֗וֹר כָּאֵ֥פֶר יְפַזֵּֽר:

יז מַשְׁלִ֣יךְ קַרְח֣וֹ כְפִתִּ֑ים, לִפְנֵ֥י ֜קָרָת֗וֹ מִ֣י יַעֲמֹֽד:

יח יִשְׁלַ֣ח דְּבָר֣וֹ וְיַמְסֵ֑ם, יַשֵּׁ֥ב ֜רוּח֗וֹ יִזְּלוּ־מָֽיִם:

יט מַגִּ֣יד דּבָרָ֣יו דְברו לְיַעֲקֹ֑ב, חֻקָּ֥יו ֜וּמִשְׁפָּטָ֗יו לְיִשְׂרָאֵֽל:

כ לֹ֘א עָ֤שָׂה כֵ֨ן | לְכׇל־גּ֗וֹי, וּמִשְׁפָּטִ֥ים בַּל־יְדָע֗וּם, הַֽלְלוּ־יָֽהּ:

רָאוּי לָאָדָם לְהִתְעוֹרֵר לִתְפִלָּה בְּכַוָּנַת הַלֵּב, מֵאַחַר שֶׁבִּתְפִלָּתוֹ קוֹרֵא לְכָל הָעוֹלָמוֹת לְהַלְּלוֹ וּלְשַׁבְּחוֹ יִתְבָּרַךְ: (לקו"מ על המזמור)

א הַ֥לְלוּ־יָ֨הּ |, הַלְל֣וּ אֶת־֖יְהֹוָה מִן־הַשָּׁמַ֑יִם, ֜הַלְל֗וּהוּ בַּמְּרוֹמִֽים:

ב הַלְל֥וּהוּ כׇל־מַלְאָכָ֑יו, ֜הַלְל֗וּהוּ כׇּל־צבָאָֽיו צְבאו:

ג ֖הַלְלוּהוּ שֶׁ֣מֶשׁ וְיָרֵ֑חַ, ֜הַלְל֗וּהוּ כׇּל־כּ֥וֹכְבֵי אֽוֹר:

ד ֖הַלְלוּהוּ שְׁמֵ֣י הַשָּׁמָ֑יִם, ֜וְהַמַּ֗יִם אֲשֶׁ֤ר | מֵעַ֬ל הַשָּׁמָֽיִם:

ה ֖יְֽהַלְלוּ אֶת־שֵׁ֣ם יְהֹוָ֑ה, כִּ֤י ה֖וּא צִוָּ֣ה וְנִבְרָֽאוּ:

ו וַיַּעֲמִידֵ֣ם לָעַ֣ד לְעוֹלָ֑ם, חׇק־֜נָתַ֗ן וְלֹ֣א יַעֲבֽוֹר:

ז הַֽלְל֣וּ אֶת־֖יְהֹוָה מִן־הָאָ֑רֶץ, ֜תַּנִּינִ֗ים וְכׇל־תְּהֹמֽוֹת:

ח אֵ֣שׁ ֖וּבָרָד שֶׁ֣לֶג וְקִיט֑וֹר, ר֥וּחַ ֜סְעָרָ֗ה עֹשָׂ֥ה דְבָרֽוֹ:

ט הֶהָרִ֥ים וְכׇל־גְּבָע֑וֹת, עֵ֥ץ ֜פְּרִ֗י וְכׇל־אֲרָזִֽים:

י הַחַיָּ֥ה וְכׇל־בְּהֵמָ֑ה, ֜רֶמֶשׂ וְצִפּ֥וֹר כָּנָֽף:

יא מַלְכֵי־֖אֶרֶץ וְכׇל־לְאֻמִּ֑ים, ֜שָׂרִ֗ים וְכׇל־שֹׁ֥פְטֵי אָֽרֶץ:

יב בַּחוּרִ֥ים וְגַם־בְּתוּל֑וֹת, ֜זְקֵנִ֗ים עִם־נְעָרִֽים:

יג יְהַלְל֤וּ | אֶת־שֵׁ֬ם יְהֹוָ֗ה, כִּֽי־נִשְׂגָּ֣ב שְׁמ֣וֹ לְבַדּ֑וֹ, ֜הוֹד֗וֹ עַל־אֶ֥רֶץ וְשָׁמָֽיִם:

יד וַיָּ֤רֶם קֶ֨רֶן | לְעַמּ֗וֹ, תְּהִלָּ֤ה לְֽכׇל־חֲסִידָ֗יו, לִבְנֵ֣י ֖יִשְׂרָאֵל עַ֥ם קְרֹב֗וֹ, הַֽלְלוּ־יָֽהּ:

עִקַּר הַטּוֹב וְהַתַּעֲנוּג הָאֲמִתִּי כְּשֶׁזּוֹכִין לִשְׂמֹחַ בּוֹ יִתְבָּרַךְ, עַל כֵּן בָּרָא אֶת כָּל הָעוֹלָמוֹת מֵרֹאשׁ וְעַד סוֹף: (לקו"ה על פס' ב)

א הַֽלְלוּ־יָ֨הּ |, שִׁ֣ירוּ ֖לַיהֹוָה שִׁ֣יר חָדָ֑שׁ, ֜תְּהִלָּת֗וֹ בִּקְהַ֥ל חֲסִידִֽים:

ב יִשְׂמַ֣ח יִשְׂרָאֵ֣ל בְּעֹשָׂ֑יו, בְּנֵי־֜צִיּ֗וֹן יָגִ֥ילוּ בְמַלְכָּֽם:

ג יְהַלְל֣וּ שְׁמ֣וֹ בְמָח֑וֹל, בְּתֹ֥ף ֜וְכִנּ֗וֹר יְזַמְּרוּ־לֽוֹ:

ד כִּֽי־רוֹצֶ֣ה יְהֹוָ֣ה בְּעַמּ֑וֹ, יְפָאֵ֥ר ֜עֲנָוִ֗ים בִּישׁוּעָֽה:

ה יַעְלְז֣וּ חֲסִידִ֣ים בְּכָב֑וֹד, ֜יְרַנְּנ֗וּ עַל־מִשְׁכְּבוֹתָֽם:

ו רוֹמְמ֣וֹת ֖אֵל בִּגְרוֹנָ֑ם, וְחֶ֖רֶב פִּיפִיּ֣וֹת בְּיָדָֽם:

ז לַעֲשׂ֣וֹת ֖נְקָמָה בַּגּוֹיִ֑ם, ֜תּוֹכֵח֗וֹת בַּלְאֻמִּֽים:

ח לֶאְס֣וֹר מַלְכֵיהֶ֣ם בְּזִקִּ֑ים, ֜וְנִכְבְּדֵיהֶ֗ם בְּכַבְלֵ֥י בַרְזֶֽל:

ט לַעֲשׂ֤וֹת בָּהֶ֨ם | מִשְׁפָּ֬ט כָּת֗וּב, הָדָ֣ר ֖הוּא לְֽכׇל־חֲסִידָ֗יו, הַֽלְלוּ־יָֽהּ:

עִקַּר הַנְּשִׁימָה, שֶׁהוּא הַנְּשָׁמָה, הוּא לְהַלֵּל שְׁמוֹ יִתְבָּרַךְ: (לקו"ה על פס' ו)

א הַֽלְלוּ־יָ֨הּ |, הַֽלְלוּ־אֵ֥ל בְּקׇדְשׁ֑וֹ, ֜הַֽלְל֗וּהוּ בִּרְקִ֥יעַ עֻזּֽוֹ:

ב הַֽלְל֥וּהוּ בִגְבוּרֹתָ֑יו, ֜הַֽלְל֗וּהוּ כְּרֹ֣ב גֻּדְלֽוֹ:

ג ֖הַֽלְלוּהוּ בְּתֵ֣קַע שׁוֹפָ֑ר, ֜הַֽלְל֗וּהוּ בְּנֵ֣בֶל וְכִנּֽוֹר:

ד ֖הַֽלְלֽוּהוּ בְּתֹ֣ף וּמָח֑וֹל, ֜הַֽלְל֗וּהוּ בְּמִנִּ֥ים וְעֻגָֽב:

ה הַֽלְל֥וּהוּ בְצִלְצְלֵי־שָׁ֑מַע, ֜הַלְל֗וּהוּ בְּֽצִלְצְלֵ֥י תְרוּעָֽה:

ו כֹּ֣ל ֖הַנְּשָׁמָה תְּהַלֵּ֥ל יָ֗הּ, הַֽלְלוּ־יָהּ:

לְאַחַר סִיּוּם הַמִּזְמוֹרִים יֵשׁ לוֹמַר שְׁלוֹשָׁה פְּסוּקִים אֵלּוּ:

מִ֥י יִתֵּ֣ן מִצִּיּוֹן֘ יְשׁוּעַ֪ת יִשְׂרָ֫אֵ֥ל, בְּשׁ֣וּב ֖יְהֹוָה שְׁב֣וּת עַמּ֑וֹ, יָגֵ֥ל ֜יַֽעֲקֹ֗ב יִשְׂמַ֥ח יִשְׂרָאֵֽל:

וּתְשׁוּעַ֣ת ֖צַדִּיקִים מֵֽיְהֹוָ֑ה, ֜מָֽעוּזָּ֗ם בְּעֵ֣ת צָרָֽה:

וַ֥יַּעְזְרֵ֥ם יְהֹוָ֗ה וַֽיְפַ֫לְּטֵ֥ם, יְפַלְּטֵ֣ם ֖מֵֽרְשָׁעִים וְיֽוֹשִׁיעֵ֑ם כִּי־חָ֥סוּ בֽוֹ: